دعوت حضرت زهرا سلام الله علیها به مجلس عروسی یهودی
#گریز به #خرابه_شام
.
.
.
مرحوم #خوندل_تبریزی
.
لوح دلده جلوه گر اولدی گئنه روی نگار
هوش باشیمدن آپاردی ایلدی دیوانه وار
.
داد بو چرخین الیندن ای خدای دادگر
دلده یارا یوخ ایدم ظلمین اونون بیر بیر شمار
.
ایلیوب از بس خطا دورینده دنیای دنی
منفعلدور کج مداریندن بو چرخ کجمدار
.
گورمیوب بو بیوفادن بیر نفر هرگز وفا
ایلیوبدور چوخ عزیز عالمی عالمده خوار
.
شاهدیم وار عرضیمه بیجا دگل بو سوزلریم
گور نه اندازه اولوب ظاهرده غالب نوره نار
.
حضرت زهرایه ثانینی مسلط ایلدی
فکر ایله گور بیر هارا منجر اولوب انجام کار
.
ووردی اود یاندی قاپو اودلاندی قلب فاطمه
سقط اولوب ظلمیله محسن اولدی زهرا بیقرار
.
یوخ نظر صدیقه کبری ملالین عرض ایدم
مقصدیم مرضیه نین اولسون جلالی آشکار
.
نه جلالت صاحبیدی بو خانم حیراندی عقل
کیم بُلر زهرا مقامین جز خدای کردگار
.
نقل ایدر راوی که بیر گون محضر پیغمبره
مکر اوزیله گلدی بیر عده یهود همجوار
.
عرض ایدوبلر بیزده برپادور بوگون بزم زفاف
وئر قیزین زهرایه رخصت ای شه عالی تبار
.
ایلسون رنجه قدم ائتسون مُزَیَّن مجلسی
گلسه زهراده او مجلسده بیر اوزگه حسن وار
.
ظاهراً مهر و محبت باطناً توهینیدی
فکر ایدوبلر کی گلر زهرا اولار مجلسده خوار
.
وار اونون بیر نچه یردن وصلۀ چادر شبی
بیزده وار اما لباس پرنیان و زرنگار
.
ایتدی فرمایش گَرَک وئرسین اجازه مرتضی
منده سوز یوخدور اودور زهرایه صاحب اختیار
.
الغرض اصراریله تکرار ایدوبلر مطلبی
اولدی راضی هم پیمبر هم ولی کردگار
.
شأنه باخ حق اولمادی راضی ملول اولسون خانم
گوندروب بیر بقچه جنتدن اونا پروردگار
.
اگنینه گیدی لباس سُندس و اِستَبرقی
ووردی شانه دوشدی نظمه گیسوان مشکبار
.
عزم ایدوب بزم زفافه شافع روز جزا
بیر وقاریله گلوب اول معدن عزّ و وقار
.
داخل مجلس اولاندا دختر شاه حجاز
اهل مجلس یرلریندن دوردولار بی اختیار
.
بیر صلابت اگلشوب حضاره اول خاتونیدن
دوشدی دیللر نطقیدن سلب اولدی دللردن قرار
.
اول جلال و شوکتی تا گوردی زهرادن عروس
مقدمینده ایلدی جان آفرینه جان نثار
.
طوی دونوب یاسه مُبَدَّل اولدی عشرت محنته
گوردولر اول حالی حضار اولدی یکسر دلفگار
.
اولمادی راضی ملول اولسونلا اول محبوب حق
میوۀ قلب پیمبر هیکل ناموس و عار
.
قیلدی اخلاصیله اَوَّلده ایکی رکعت نماز
اللرین آچدی دعایه دخت شاه تاجدار
.
جسم بی جانه دوباره حقّیدن جان ایستدی
مستجاب اولدی دعا فوراً مسلمدور اولار
.
داخل اولدی قالب بی روحه روحی تازه دن
دوردی اگلشدی عروس اولدی قضیه انتشار
.
دین اسلامه مشرف اولدی بیر عده یهود
بوردا قلبیم اودلانور تیترور قلم اشکیم آخار
.
آه یا زهرا گلیدون گوشه ویرانیَه
اوز قیزین تپراقلار اوسته ویردی جان زار و نزار
.
اولمادی بیر کس گلوب ایتسون اونا غسل و کفن
قالدی یرده نعشی حالین فکر ایدنده دل یانار
.
جمله آهنگ عراقیله خواتین حجاز
باشلیوبلار ناله شوریله اولوبلار اشکبار
.
گوز یاشیله ویردیلر آل پیمبر غسلینی
وار کفنده نچه سوز لازمدی اولسون آشکار
.
بیله بُلَّم اول غریبه اولدی گویا اوچ کفن
هر اوچی قلب رسول اکرمه سالدی شرار
.
بیر کفن نشر ائتدی زلفین دختران مصطفی
فرش ایدوب یعنی او نعش اوستنده زلف تابدار
.
بیر کفنده اولدی اگنینده او کهنه کوینگی
پاره پاره پیرهن گل جسمین ائتدی استتار
.
بو ایکی امّا اونا اولدی اوچومچی بیر کفن
حشر اولونجا قلب زهرانی او مطلب یاندیرار
.
آچدیلار باشدان قرا معجرلری آل رسول
بیر کفنده دختر پیغمبره اولدی خِمار
.
زینب کبری اونی ویرانه ده دفن ایلدی
اشک چشمیله ویروب تشکیل او یرده بیر مزار
.
اولماسین نسگل خانیملار هر بیری بیر قاره شمع
قبرینین اوستنده دود آهیله یاندیردیلار
.
لطفدور « خوندل » یقین بو نطق و طبع آتشین
روز و شب شکرانه سینده آغلا ایله آه و زار
.
.
#فاطمیه_شهادت
#لوح_دلده_جلوه_گر_اولدی_گئنه_روی_نگار
#ترکی
.
.
نظر دهید