شهادت حضرت رقیه (س)
.
.
مرحوم یحیوی اردبیلی
.
.
مدتیدی بو خرابه یئرده آغلاردی بالام
بو گئجه شمرون الیندن ئولدى قورتاردی بالام
.
.
پاره کرپیچ بالشی فرش و لحافی بوریا
هر گئجه بختی کیمی ظلمت همین ویرانسرا
چون چکردی گوزلرینه سرمه ی خوابی قضا
اصغره لایلای دیوب رؤیاده اوخشاردی بالام
.
.
تپراق اوسته یاتدی رخت استراحت گورمدی
زحمت و اشکنجه دن آنی فراغت گورمدی
شمر بی ایمانیدن رحم و مروت گورمدی
کوفه و شامون یولیندا هرچه یالواردی بالام
.
.
اوز قوجاقیمده یاتورداردیم بو طفل زاری من
غم چکن باشینی قویمازدیم کناره سینه دن
هانسی بیر ظلمی گوروب رؤیاده تیترردی بدن
دیسگینوب قالخاردی بوینومی قوجاقلاردی بالام
.
.
نازپرور شاهزاده ذات پاکی حق شناس
أئتمیوب ظالم لره عمرینده عجز و التماس
قاره گونلر گورمیوبدور گیمیوب کهنه لباس
کهنه پیراهن گیوب قلبیمی داغلاردی بالام
.
.
عمه سی اولسون أونون هر لحظه قربان جانینه
سینّی آز دردی بیوک نالان و گریان جانینه
آجلیقیندان یاتمیان حالی پریشان جانینه
قورخوسیندان زعفران رنگینه اوخشاردی بالام
.
.
ساربان یولدا سالاری بو بالانی قهریله
هی قاچاردی پا پیاده بلکه یتسون منزله
خسته و رنجور اولوب آخر او حالیلن بئله
باش قویوب خاک بیابان اوسته یوخلاردی بالام
.
.
آز قالوردی زجرون اولسون نعره سیندن زهره چاک
بیر نفر یوخ دادرس ایلردی جان هولی هلاک
قمچی آلتدا پا برهنه آت دوشونده هولناک
ناوک خار مغیلانی ایاقلاردی بالام
.
.
کربلادن شامه دین سسلردی اکبر قارداشین
ابر نیسان تک توکردی تپراق اوسته گوز یاشین
ال تاپان وقته آتاسینون کسوک قانلی باشین
جاندان آرتوق قلبینون باشینده ساخلاردی بالام
.
.
هر زمانی که آتاردى تاقه لر سنگین قدم
ساربانلار ناقیه قمچی ووراردی دمبدم
اوزگه بیر حاله دوشردی بو یتیمه قز اودم
تازیانه سسلریندن بسکه قورخاردی بالام
.
.
داغلى قلبیمی دوباره داغلادی بو نصف شب
ایندی یاتمیشدی آئیلدی حالی اولدی منقلب
چکدی فریاد ایلدی مندن باباسینی طلب
گوشه ی ویرانسرانی دوردی آختاردی بالام
.
.
هانسی شهزاده مگر بو نسگلیله وئردی جان
نسگلی چوخدور بو نیسگیلدور منی چوخ یاندیران
سانجیلان وقته ایاقی آلتینا اوخ تک تکان
معجرینی پاره لردی زخمی باغلاردی بالام
.
.
«یحیوی» عمرون وفا ائتسه یازوب جمع ائت کتاب
دئ خانم شهزادیه نوحه اورک اولسون کباب
اوخشیوب گویا بو نوعی زینب علیا جناب
بو گئجه شمرون الیندن ئولدی قورتاردی بالام
.
.
#حضرت_رقیه #یحیوی_اردبیلی #حضرت_رقیه_شهادت #ترکی #زبدةالاشعار
نظر دهید