ویرانه ، پایگاه عشق ، دانشگاه عزت
.
.
مرحوم هادی تبریزی
.
.
بو خرابه شامیده کاخ سفارتدور بابا
پایگاه عشق و دانشگاه عزتدور بابا
.
.
ای کوله باتمیش جمالی شمع خلوتگاه عشق
نیزلر باشیندا باشی رهنمای راه عشق
سن کیمی منده بابا اولام فنا فی الله عشق
غم حشم عمم منه پیر طریقتدور بابا
.
.
خانقاهیم فقریدن بو گوشۀ ویرانه دور
اهل عشقه گوشۀ ویرانه چون میخانه دور
گل جمالون زینت صهبای هر پیمانه دور
مست جام عشقیدور مأنوس وحتدور بابا
.
.
دیدۀ افسونگر حقیله من افسانیم
قانلی باشون شمع محفلدور اونا پروانیم
فقردور فخریم بودور که ساکن ویرانیم
مرتضادن بو طریقت چون وراثتدور بابا
.
.
بیزلره دشت بلا دانشسرای عشقدور
نی که دانشگاه آزاد خدای عشقدور
گوزلریمده اشگ حسرت دکترای عشقدور
مدرک تحصیلیمیز بو اشگ حسرتدور بابا
.
.
بیزلره استادسن اما گوزندن آتموسان
خون دل غمدن گوزومده سیل اشگه قاتموسان
وای منه مطبخ سراده کوللر اوسته یاتموسان
بو نه آثار و نشانه نه حکایتدور بابا
.
.
بو کسیک باشون ایدر رمزیله شرح داستان
موج خیز اولموش گینه دریای قاندان تازه قان
لبلرونده گورسنور آثار چوب خیزران
اول یزید کینه پرودن علامتدور بابا
.
.
ملک عشقین من کیمی یوخ بیر نفر آواره سی
باغلانار بیچاره نین دنیاده راه چاره سی
وای منه آنوندا واردی ای بابا داش یاره سی
کوفه اهلیندن سنه بو نه جسارتدور بابا
.
.
قان دوتوبدی صورتون توپراقلیه مستور اولوب
بو سببدن قلب شادیم ظلمیله رنجور اولوب
رمح نیزیله سنون نحرون اودور منحور اولوب
سو سراغین آلماقوندان یاخشی آیتدور بابا
.
.
مرغ آهیم سرینه وار علتی سیره چیخوب
منجنیق غم سیخلموش روحیمی بیرده سیخوب
نچه دفعه ناقۀ عریان منی یولدا یخوب
چکموشم بو یولدا هر رنج و ریاضتدور بابا
.
.
غنچۀ عشقم منی دست طبیعت سولدوروب
آتش غم هر دم آتشگاه عشقه دولدوروب
قتلگاهوندا منی چوخ ای بابا دشمن ووروب
قولاریم باخسان ورم ایتموش جراحتدور بابا
.
.
هر یانی گزدیم دولاندیم ناقۀ عریانیده
قالمیوبدور طاقتیم بیر ذره اصلا جانیده
کوفه شهرینده قالان گوندن بابا زندانیده
دشمن خونخواریده بو نه شقاوتدور بابا
.
.
تحفه دور بو قطعه شاهه پنجۀ درویشیده
یا که مرهمدور که قویسون هر دل اولسا ریشیده
نظم ایدوب «هادی» بو شعری هیئت دلریشیده
گوز تیکن بو قطعیه آز بیر جماعتدور بابا
.
.
#حضرت_رقیه #هادی_تبریزی #حضرت_رقیه_شهادت #ترکی #زبدةالاشعار
نظر دهید