زبانحال حضرت رقیه (س) خطاب به سر مقدس پدر
.
.
مرحوم صافی تبریزی
.
.
منزلیم هر چند ویراندور بابا خوش گلموسن
حسرت فردوس رضواندور بابا خوش گلموسن
.
.
کیمسه بولمور وار ندن ویرانه ده بو قدر شو
دمبدم ساعت ساعت نور حق ایلر ظهور
ایلیوبسن بو خرابه منزلی سن رشگ طور
جلوه گاه پور عمراندور بابا خوش گلموسن
.
.
گرچه شیون روز و شب منله بابا دمساز دور
ناله مه باعث ئوزی کشف اولمین بیر راز دور
بو دمون گوز یاشی تشریفونده پای انداز دور
گوزلریم وار سرّی گریاندور بابا خوش گلموسن
.
.
بو یتیمه قزلار ایچره ای شهنشاه حجاز
گلماقون بو نصف شب وئردی منه بیر امتیاز
عفو قیل گرچه جنابون ائتمدیم من پیشواز
بولمدیم فکریم پریشاندور بابا خوش گلموسن
.
.
من بو فکریله توکردیم دائم اشک آلیمی
گل یوزون بیرده گوروب شرح ایلییدیم حالیمی
ایمدی دل یوخدور دیم ئوز صورت احوالیمی
گورموسن گویلوم دولی قاندور بابا خوش گلموسن
.
.
منزلیم گرچه محقّردور قوری یردور یریم
لیک حقیمدور سنه گوز مردمینده یر وئریم
بولمورم نه دللریله من جنابون دیندیریم
هر نه گلسه فکره نقصاندور بابا خوش گلموسن
.
.
بو کسیک باشون دلیل شاهراه عشقدور
هر کسون کیفیت حالی گواه عشقدور
گرچه ویراندور بو منزل خانقاه عشقدور
مجمع جمع فقیراندور بابا خوش گلموسن
.
.
ذکر ایدر بو کثرتین هر فرد فردی یا احد
جمله سی واصل به حقدور ایلیوب هو حق مدد
سن ئوزون پیر طریقت سن دگولسن نابلد
عارضون مرآت عرفاندور بابا خوش گلموسن
.
.
.
چوخ تشکر ایلرم باخدیقجا ئوز اقبالیمه
آخر عمرومده یتدیم اوّل آمالیمه
گرچه درویشم اولوب شهدن رعایت حالیمه
منظریم دیدار سلطاندور بابا خوش گلموسن
.
.
آختارار بیر بیله منزل دائماً خلوت نشین
فرشی خاک اولسون چراغ بزمی آه آتشین
چوخ شرافت وار بو یرده حجت روی زمین
سید سجاد درباندور بابا خوش گلموسن
.
.
بیر اوزون مدت سراغوندیدوم آخر من سنون
کربلادن شامه تک وئرمزدی فرصت دشمنون
سالموشام یاخشی اله بو نصف شبده دامنون
بو سعادت لطف یزداندور بابا خوش گلموسن
.
.
جان وئروردیم من دیدیم جانانیمی یارب یتور
یاخشی موقع گلموسن قال نعشیمی یردن گوتور
بو سنق پوزقون پریشان قافله سندن ئوتور
باغریقان چاک گریباندور بابا خوش گلموسن
.
.
.
#حضرت_رقیه #صافی_تبریزی
#حضرت_رقیه_شهادت
#منزلیم_هر_چند_ویراندور_بابا_خوش_گلموسن
#ترکی
#زبدةالاشعار
نظر دهید