اذن میدان حضرت قاسم علیه السلام
.
✍️ زبدة الاشعار ✍️
?: @nohe_torki
.
مرحوم رجائی تبریزی
.
من بُلورسن قتلیمه وار الده فرمانیم عمو
قوی قارشسون اوغلون اکبر قانینه قانیم عمو
.
.
گلمیشم اذن جهاده ای شهنشاه حجاز
ایستورم کسب ایلیم اوغلون علی تک امتیاز
آخر عمریمده آلّام قانیله من دستماز
تا او قان محشرده اولسون الده برهانیم عمو
.
.
سن پیمبر اوغلوسان عالم سنون جدّون تانور
من سنی یالقیز گورنده اود دوتور قلبیم یانور
نار حسرتدن آلور شعله وجودیم اوتلانور
سنده بولّم وار یقین بو درده درمانیم عمو
.
.
من نجه صبر ایلیوم ای دین حقّ پروانه سی
خیمه لردن عرشه اوج ایتسون سکینه ناله سی
صبریمی الدن آلور لیلانون اکبر وای سسی
دویموشام جاندان داخی یوخ صبره امکانیم عمو
.
.
چوخ چتیندور من بو درده صبر ایدوب آسان سانام
اوغلون اکبر قانه باتسون من باخام دلدن یانام
لیلی آغلور خیمه ده خجلت چکور بیکس آنام
قویما چوخ تأخیره دوشسون اذن میدانیم عمو
.
.
بو امیدیله آنام گوندردی عالی محضره
گیت دیدی سنده فدا اول مظهر پیغمبره
گلمیشم منده اولام قربان عم اوغلوم اکبره
مطمئن اول وار آنامدان قتله اذعانیم عمو
.
.
اوغلون اکبر شوق ایدوب شرع نبی اجراسینه
ویردی جان قربان بو چولده دینینون احیاسینه
منده بو منظوریله گلدیم بلا صحراسینه
اذن ویر قربان اولا اوز دینیمه جانیم عمو
.
.
دوشموشم منده بو فکره جان سوسوز عطشان ویرم
بو حیات مستعاری دینیمه قربان ویرم
یوخسا منده یوخ لیاقت دین یولوندا جان ویرم
سن بلورسن دینیمه وار دلده ایمانیم عمو
.
.
من عم اوغلومدان شهادت مشقینی آلدیم بو گون
بوینوما اوغلون علی تک بیر کفن سالدیم بو گون
حیف اولا گیتدی عم اوغلوم منده تک قالدیم بو گون
قالمیشام یالقیز گیدوبدور جان جانانیم عمو
.
.
روز روشن تار اولوب چشم حقیقت بینیمه
حاضرم اولسون فدا جانیم گوزل آئینیمه
اذن ویر منده گیدیم قربان اولوم اوز دینیمه
مجتبا فخر ایلسون وار دینه قربانیم عمو
.
.
بیر سوزوم وار یاده سالسام گلمه داد و شیونه
قارداشون ایتدی وصیت جان ویرن ساعت منه
کربلاده قویمیام یالقیز ایدم نصرت سنه
ایستورم اجرا اولا اول عهد و پیمانیم عمو
.
.
سن بلورسن ئولماقا دلدن خوشام باک ایتمرم
ایچمسم جام شهادت دن مرامه یئتمرم
اذن میدان اولماسا بیرده خیامه گئتمرم
دست خالی گتماقا یوخ الده عنوانیم عمو
.
.
باخما بیر طفل صغیرم قالما مندن ناگران
رخصت اولسا بیر رشادت لشگره ویرّم نشان
قانین آلّام اوغلوون حیرتده قالسون کوفیان
آشنا گورسون فنون جنگه عدوانیم عمو
.
.
بسکه غم چکدیم علاقم قالمیوب اوز جانیمه
سربلند اولام اگر باتسام بو چولده قانیمه
بسدی بو لطفون ئولن ساعتده گلسون یانیمه
فخر قیلام باشیم اوسته گلدی سلطانیم عمو
.
.
باب رحمتدور قاپون بُلسونله بو قوم یزید
گلسه هر کیمسه #رجائیله قیتمز نا امید
نا امید ایتمه منی ای باب رضوانه کلید
قالماسون اوز دینیمه خدمتده نقصانیم عمو
.
#سبک_زینبم_جان_اوستیم (بیش از 4 سبک)
.
#قاسمیه_شهادت
#من_بلورسن_قتلیمه_وار_الده_فرمانیم_عمو
#رجایی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید