من بیر قیزام زمانه سیه پوش ایدیب منی #راه_شام_معنوی_اردبیلی

زبانحال حضرت رقیه در راه شام
#من_بیر_قیزام
.
.
مرحوم معنوی اردبیلی
.
.
من بیر قیزام زمانه سیه پوش ائدیب منی
گوزدن سالیب دی درده هم آغوش ائدیب منی
هر غصه بیر یانا، بو غمه من چوخ آغلارام
چوخ ایستین بیبیمده فراموش ائدیب منی
.
.
من بیر قیزام ایشیم یتشوبدور یامان یره
گوگدن زمانه ووردی منی بی امان یره
وار علتی گلایه می گر عمه مه دییم
چارم ندور همیشه باخار گوز اومان یره
.
.
من بیر قیزام سالیبدی فلک دام دشمنه
کوچ ایلیوبدی قافله میز کول قالیب منه
ای عالمی گورن گوزه گورسنمین اوزی
آچ بنده وه فرج قاپوسین ایش قالیب سنه
.
.
من بیر قیزام گئجیله منه یوخ آچان قاپی
آغلار منیم ملالیمه یارب یانان قاپی
درد اهلنه هامی قاپیلار باغلانار گئجه
تک بیر سنوندی یوزلره باغلانمیان قاپی
.
.
من بیر قیزام اورکده سانا گلمین غمی
چول قورخوسی سالیب دی منیم تنگه سینمی
ای گوندوزی گئجه، گئجه نی گوندوز ایلین
سندن من ایندی ایستیورم زینب عمّه می
.
.
من تک زمانه هیچ کیمی جبریله یخمادی
قلبین سالوب فشاره عداوتله سیخمادی
قیز خَیلاقی، قرا گئجه، یول چوخ، اوزومده تک
باخ قاره بختیمه، بو گئجه آیدا چیخمادی
.
.
قورخی دولوبدی قلبیمه تیترور دوداقلاریم
فکر عالمینده سسلنور هردم قولاقلاریم
یوللار تیکاندی، داشدی، اوزومده ایاق یالین
راحت قویانمورام یره گوینور ایاقلاریم
.
.
گورجک همان قرالتی قباقیمده قورخورام
سوز دوتمیور دیلیمده، دوداقیمده قورخورام
قلبیم یارالی قوش کیمی سینمده چیرپینور
شمرین سسی قالوبدی قولاقیمده قورخورام
.
.
قلبیم کیمی ستم اوخی هیچ قلبی دلمه دی
گوزیاشیمی گوروب فلکین رحمی گلمدی
گوزدن دوشن کیمی بیله دوشدوم قطاریدن
باخدیم دالیجا دردیمی عمم ده بیلمه دی
.
.
من آسمان عزتین آیدین سهیلیم
دل واپَسَم قرا گئجه می گوندوز ایلیم
سوز یوخ بابام اوزی منی تاپشوردی عمه مه
قلبیم سینوبدی هر ایکی سیندن گلیلیم
.
.
گوللر خزان گورنده سولارمیش منیم کیمین
گوگده بلوط دولاندا دولارمیش منیم کیمین
اوز دردیمه گرک من اوزوم آغلیام فقط
گوزدن دوشن گوگولدن اولارمیش منیم کیمین
.
.
#راه_شام #معنوی_اردبیلی #ترکی #زبدةالاشعار