حالات وداع امام حسین (ع) با اهل بیت
.
.
.
مرحوم تقایی اردبیلی
.
.
.
مهر جمال سرمدی قورتاروب اغترابیدن
چهر کمال احمدی ظاهر اولوب نقابیدن
یاغدی سحاب معرفت، تاپدی صفا گول آبیدن
چیخدی ائلئیکی شمس دین خیمه مستطابیدن
آلدی قرار و طاقتی نرگس نیمه خوابیدن
یعنی حسین کفن گئیوب مخمل آفتابیدن
.
.
سبز مناده سرخ گون جامه گییه نده مهر حق
بیتینه قاره چکدیروب حضرت فالق الفلق
عدل گئیوب لباس غم ماتمه باتدی ماخلق
آچدی بساط غم فلق، قان یمینه دونوب شفق
رنگی سولوب شقایقون بولبوله قالمادی رمق
روح الامین انوب یئره جانب ارزیابیدن
.
.
حوری لر آچدی ساچلارین جنت آرا حسین دئدی
قانه دونوبدی نینوا نی ده نوا حسین دئدی
کوه ابوقبیس دن گلدی صدا حسین دئدی
خاذن عدن جنته چکدی قرا حسین دئدی
تیتره دی عرش کبریا ذات خدا حسین دئدی
حیرته توشدی ماسبق، حق ائلییه ن خطابیدن
.
.
ذبح عظیم باشلادی نوحه ذبیح اعظمه
گلدی او غم مناسینه جن و ملک ده ماتمه
گرد و غبار غم دولوب چشمه پاک زمزمه
دجله داشوب فراتیدن گلدی بلالی زمزمه
بیچدی بلی قضا الی جامه شرم علقمه
شرم ائلئیوبدی آب اوزی آخماغا روح آبیدن
.
.
طایر عشق آچاندا پر قونماغا عشق بامینه
نخل لر اولدی منحنی حضرتون احترامینه
گلدی شمیم جنتی اهل حقون مشامینه
باخدی حبیب عاشقون قامتینون خرامینه
ساقی عشق دولدوروب باده نی عشق جامینه
باده وصل حق آلوب طاقتی اول جنابیدن
.
.
بدرده آغلاماق سسی عرشه اوجالدی بئردن
واابتاسی قیزلارون قوشلاری قویدی سیردن
عالمی توتدی یاحسین صوتی کنشت و دیردن
حب حرم قویانمادی حضرتی کار خیردن
غیرخدا اودور حسین الفتی کسدی غیردن
چیخدی او دمده عشق اوزی پرده احتجابیدن
.
.
گون گئیینوبدی کسوت شرمی سماده آغلادی
حل و حرم قرا گئیوب کوه منا ده آغلادی
مروه غبار غم توتوب غار حرا ده آغلادی
حضرت ختم الانبیا عرش خداده آغلادی
باغ جناندا فاطمه چهره گشاده آغلادی
نی ده نوا ائدوب غرض، ناله بوترابیدن
.
.
حضرته حکم ارجعی گلدی حضور یاردن
آلدی وصال مژده سین ساحت کردگاردن
گوردی گرکدی کام آلا میکده نگاردن
چهره سینون طراوتی طاقت آلوب بهاردن
توکدی کلام مشکبو لعل گهر نثاردن
خبره بیلوب بهالی دیر سوزلری در نابیدن
.
.
ائتدی خطاب زینبه پادشه ملک خدم
گل باجی ای عفیفه عترت شاه ذی حشم
دعوت ائدوب حسینووی بزم وصاله ذوالکرم
من ده گرک وئره م بو دم ریشه دین حقه دم
حاضر ائله حرملری قیزلاری، ایستورم گئدم
اسمه تله سمه چکمه ال لحظه ده صبر و تابیدن
.
.
حاضر ائله سرشکینی خون دله قاتانلاری
عشق یولوندا شوقیله غنچه و گول سانانلاری
خیمه سراده کوکب صبح کیمین باتانلاری
عزتی دست ظلم ایله خاتمییه چاتانلاری
بیربیر اویات خیامیده غش ائله ییب یاتانلاری
گوزله گوزل رقیه می اولمه سین اضطرابیدن
.
.
سعی ائله سویگولوم باجی اشکینی قانه قاتماسون
بیر جور ائله من اولمه میش گرد عزایه باتماسون
بیر ده او خیردا اللرین زولف سیاهه آتماسون
تاپشور اونا قوجاقیمه گلسه ده چوخ یوباتماسون
ظهردی قورخورام الیم فیض وصاله چاتماسون
قیل عجله بیر اود گوتور سن بو دل کبابیدن
.
.
سن علوی تبارسن سیر ائله سلک حیدری
شاد ائله روح اطهر فاطمه مطهری
عهد الستی یاده سال ناله یه اولما مشتری
آغلاما یانما هجریمه، قلبیمه وورما اخگری
حفظ حجابه سعی ائله ساخلا باشوندا معجری
اخذ وقار ائده ر بلی عورت اولان حجابیدن
.
.
امر امامه باش اگوب زینب مرتضی سیر
سسله دی وا محمدا ائتدی نوا او خونجگر
قارداشینون وداعینی عترتینه وئروب خبر
اهل حرم سراسیمه بزم فراقه گلدیلر
ال لر اورکده دوردولار حضرته قیلدیلار نظر
گوزلری صحبت ائیله دی قلب پر التهابیدن
.
.
زینب او دشت سرخیده بیر ده یاراتدی منظره
حاضر اولان خانیم لاری قیزلاری بولدی اوچ یئره
دوزدی ردیف اوله قیزلاری طرح دایره
گتدی حرم خانیملارین دوزدی ردیف دیگره
چاتدی ولی اوچ اینجی صف قاره گییه ن کنیزلره
طاقت آلوب او منظره سید کامیابیدن
.
.
آری اشاره اهلینه پرده لی سوز ائده ر کفاف
قالدی اراده کعبه تک کعبه اهل قلب صاف
اهل حرم او کعبه یه چکدیله پرده عفاف
حضرتی بیت حق کیمین حاجیه لر ائدوب طواف
گوردوله عزم رزمیدن یوخدی او شه ده انصراف
یاندیلا نار فرقته کئچدی بلا حسابیدن
.
.
گوردی حسین کی ال لره دوشدی او واسعه اته ک
سسله دی آی آنام باجی، غملی حسینه قیل کمک
وقت شهادتیم کئچور قیزلاری بیر کناره چک
آل بولارین طلالرین باشلارا سال قرا لئچک
یعنی بو ماه رولری قاره گونه سالور فلک
ایستور عدو نقاب آلا فوج قمر نقابیدن
.
.
آز باجی سوز آهیلن شمع عزانی یاندورون
آز بو بلالی عرصه ده قلب بتوله اود وورون
سعی ائلئیون بو دهریده ریشه ظلمی سیز قیرون
سسله رباب و لیلینی مجلس مشورت قورون
آغلامئیون من اولمه میش قیزلاریمی سویوندورون
انجم عشقی قویمئیون صدمه گوره شهابیدن
.
.
سیل بلایه توش اولوب خانه محکم امل
آتش چرخ کینه دن قلب لر اولدی مشتعل
امر امیر نهضته ائتدیله مو به مو عمل
هر بالانون قولاقینه بوینونا زینب آتدی ال
سسله دی آی علم توتان یاتما مناده داده گل
گور نئجه ناله قوزانور عرشه دل مذابیدن
.
.
اهل حرم یاراتدیلار صحنه محنت آفرین
چوخ چتین اولدی حضرته یعنی وداع آخرین
هر بالانی سویوندوروب سیلدیله دیده ترین
قاره هوروکلرین آچوب سالدیلا قاره معجرین
کوهنه عبا گئییندیروب باغلادیلار کمرلرین
واعتصموا بحبل ده ذکر اولونان طنابیدن
.
.
واردی یئری الی الابد جامه اشکی گوز گییه
موج بلادن آز قالوب عرش، تزلزل ائیلییه
محور چرخ کج روش سینمادی بیلمورم نییه
زینب ایشین تمام ائدوب واابتا دییه دییه
قیزلار اسیره اوخشادی نوبه چاتوب رقیییه
توکدی سرشکی ایسلانوب دامن گول، گلابیدن
.
.
سبط رسول اکرمون زینب آلوب اشاره سین
توکدی یوزه اورک قانین کسدی زمانه چاره سین
گوردی کی سولدوروب فلک باغ غمون بهاره سین
وئردی گونون قوجاقینه برج بلا ستاره سین
سویگولوون آلانمارام من دئدی گوشواره سین
سن اوزون آل طلالرین، غنچه آفتابیدن
.
.
رافتیله حسین چکوب باشینه ال او دخترین
هئی دئدی نازنین بالام سیلدی سرشک گوهرین
دوتدی دیله قیزیم دئدی، سویدی لباس و معجرین
تا ال آتوب قولاقینه آلماغا زیب و زیورین
بیر بابا سویله دی او قیز بیر ده چاغیردی اکبرین
اسدی سارالدی آغلادی طاقت آلوب ربابیدن
.
.
گئتدی طلاسی گرد غم توتدی اونون یاناقلارین
گوز یاشی توکدی دولدوروب گوزلرینون بولاقلارین
ائممیزی ایستیره م دئدی، دویدی یئره ایاقلارین
دل دئدی کوس حسین سویوب فاطمه نین اوشاقلارین
عشق دئدی اوجال بیر آز، اوپ بابانین دوداقلارین
عشق سوزی له بوسه نین فیضینی آلدی بابیدن
.
.
دوردی چکیلدی دالدالی سسله دی ماحصل، بابا
درک ایلئیوبدی سویگولون نیتووی ازل بابا
عشق بو نوعی حکم ائدور قدیما منه محل بابا
بیر ده قوجاقه آل ائله امر حقه عمل بابا
باشیمه بیر ده چک الون قوی یئره گئت گوزل بابا
شامه کیمین خمار اولوم بو عمل ثوابیدن
.
.
باغرینا باسدی اول قیزی زاده ی سیدالبشر
آغلاما وورما قلبیمه اود دئدی ائیلورم سفر
سینما کی گوشوارووی آلمیشام ای فرشته فر
کئچدی عزیز گونون داخی قلبووی توتماسون کدر
فکر زر ائتمه سویگولوم چون سنه درد سردی زر
کیمده قیزیم زر اواماسا راحت اولار عذابیدن
.
.
من الی بوش تقایی ام باب حسینده نوکرم
قیرخ اولار او حضرته شعریله خدمت ائیله رم
فاطمه اوغلی شاکرم چوخ منه ائیلئیوب کرم
هر کس ائده ر مفاخره ظاهری جاهه لاجرم
فخر ائدورم بو منصبه من ده گدای اصغرم
هر نه واریمدی آلمیشام من او کرم لی بابیدن
.
.
.
#وداع #تقایی_اردبیلی #حسینیه_تقایی_اردبیلی #حسینیه_وداع #ترکی #زبدةالاشعار
نظر دهید