#ای_اوخ …
زبانحال حضرت اباعبدالله الحسین(ع) به تیر سه شعبه در قتلگاه
.
.
امیر سفیدی اقدم اهری(عاذل)
.
.
مکان لامکان اولدی سنه آخر مکان ای اوخ
منه جانبخش سن سانما اولوبسان جانستان ای اوخ
.
.
اگرچه ظاهرا بیر قان توکن شیاد پیکانسان
ولیکن باطنا پیک خداسن ،راحت جانسان
اگر کافرده اولسان حرمتون وار چونکه مهمانسان
گورونمز سن کیمی مهمان منیم تک میزبان ای اوخ
.
.
سن ای پیک اجل بولمم ندن بو سمته یول سالدون
بو چولده بیکسم گوردون اودور سن قیدیمه قالدون
اوغول داغی دگن یردن دگوب آرامیمی آلدون
یقین دور یاندیرار من تک سنی داغ جوان ای اوخ
.
.
بو گون صبحون زمانیندن اولوب بو دشت ده غوغا
پوزا نظم و نظام عالمی دشمن قوروب شورا
سنی گویا سفیر ایتدی بو سمته یوللادی اعدا
منیم سن دادیمه چاتدون یامان گون ده عیان ای اوخ
.
.
چخییب ایری کماندان قانیمه اولدون منیم عطشان
قزشدین سوزشِ خورشید عالم تابیله حیران
یتشدین مقصده تاپدین ولی سرچشمه حیوان
یانان بو قلبدن ایچ جرعه جرعه ایستی قان ای اوخ
.
.
اوتوردون داغ اکبرده ، بولورم اصغره یاندین
سینم اوسته او خوردا قبرینی قازدین الولاندین
قازاندا سینمی سیندین منیم تک سن یارالاندین
نه خوشدی میزبانه اوخشیا هر میهمان ای اوخ
.
.
سن ای پیکان آهن دل نقدری سخت اولورسان اول
گلیب دوز سینمه دگدون یولوندان اولمادین صاق صول
نه چون مشتاقیدون سن مخزن اسراره تاپدین یول
نه گورسن مخزن الاسراری ده ساخلا نهان ای اوخ
.
.
منه ای قان توکن پیکان بو ظلمون علتین قیل فاش
ندن بو سمته میل ایتدون بو قلبی ایلدون خونپاش
بو حالیله سنی زینب سینم ده گورمسین ایکاش
اگر گورسه اولار قدی کمانون تک کمان ای اوخ
.
.
جهاندا هر زمان اولدی اوزون بیر صورته سالدون
ازل مسمار اولوب خیرالنسانین قیدینه قالدون
صورا شمشیره دوندون فرقِ پاک حیدره چالدون
گهی زهر اولموسان گاهی اولارسان خیزران ای اوخ
.
.
گچن گونلرده ده بیر نازنین تابوته دگدون سن
دیمم تابوته، جسمِ عالمِ لاهوته دگدون سن
نه تک لاهوته صدرِ عالم ناسوته دگدون سن
اولوبسان دوغرانان اکباده آخر سایبان ای اوخ
.
.
نچه یرده سالوبسان یاده سن یالقیز قالان شاهی
کنار نهرده اما اوجاتدین شاهدن آهی
نشان ناصوابیلن آیردین مهریلن ماهی
نجه چکدی جبینیندن سنی اول باغریقان ای اوخ
.
.
نچه لحظه قاباق نازک بیر حلقی سن نشان ایتدون
جهانه ولوله سالدون منی بی خانمان ایتدون
بو گردش دن ربابین قلبنی مخیم ده قان ایتدون
مگر بولمزدی یول گوزلور آناسی، اوخ آتان ای اوخ؟
.
.
#حسینیه #اقدم_اهری
#حسینیه_شهادت
#ترکی #ای_اوخ_اقدم_اهری
#زبدةالاشعار
نظر دهید