ندور سنده بو حالت بیان ائت منه قارداش #حسنیه_اشکی_تبریزی

شهادت امام حسن مجتبی علیه السّلام
.
زبدة الاشعار
.
?: @nohe_torki
.
حاج مجید اشکی تبریزی
.
ندور سنده بو حالت
بیان ائت منه قارداش
دوداقوندان آخور قان
فدا من سنه قارداش
.
.
بیله باخما باخاندا شرر جانه سالورسان
توانین گئدوب الدن توان الدن آلورسان
سودان آیری دوشن بیر بالیق تک چابالورسان
بو حالین اثر ایلر دل آهنه قارداش
.
.
گلر بلبل شیدا نوایه چمن اوسته
گورر قطرۀ شبنم دوروب یاسمن اوسته
دوزر قان قطراتین او وجه الحسن اوسته
دوروب دانه بدانه دونوب گلشنه قارداش
.
.
سنین درد ملالین جهاندا بُلن آغلار
گلن قبریوه پوزقون مزارین گورن آغلار
غریب وطن اولدون دیر وا حسن اغلار
یانار اهل دل آغلار گلرشیونه قارداش
.
.
گوزون یاشینه قارداش بو زینب اولا قربان
اؤرک باشینا قویما الین اولما پریشان
دونر هجره وصالین عیاندور من نالان
گرک سیل سرشکی توکم دامنه قارداش
.
.
روا گوردی بو ظلمی سنه هانسی ستمگر
بیان ائت ندی دردین ایا حجّت داور
سزادور آچا باشین آتام ساقی کوثر
آناما ایده شِکوه دوتا یاس سنه قارداش
.
.
اولوب قلب شریفین هامی غملره خازن
گهی دل یاراسیله گهی رنج مدائن
بو نسگل منه بسدورکه هم بستر خائن
سنین قتلیوی وعده ویروب دشمنه قارداش
.
.
بلا مونسییَم من یوزوم دهریده گلمز
حوادث هله چوخدور باجین گورمه سه ئولمز
نلر وار گله جاقدا بونی کیمسنه بلمز
قالوب ارث آنامدان بو محنت منه قارداش
.
.
بو غمدن منه واردور منه بیر غم دیگر
اولار کرب و بلاده عیان شورش محشر
قالار دشمن الینده او گون آل پیمبر
تاپولماز چکه کیمسه منی مَأمنه قارداش
.
.
سنه «اشکی» امامِ رضا ائتدی عنایت
که پابوسینه گلدون بو ایام زیارت
جوارینده ائدوبسن بو اشعاری کتابت
ندور سنده بو حالت بیان ائت منه قارداش
.
.
.
#سبک_علی_جان_بالا_لبیک
.
.
#حسنیه_شهادت
#ندور_سنده_بو_حالت_بیان_ائت_منه_قارداش
#اشکی_تبریزی
#ترکی
.
#زبدةالاشعار
.
?: @nohe_torki