نه حاله قالدی او ساعتده بلمورم شه دین #اکبریه_صحاف_تبریزی

زبانحال امام (ع) بر بالین علی اکبر(ع)
.
.
.
مرحوم صحاف تبریزی
.
.
نه حاله قالدی او ساعتده بلمورم شه دین
که تاپدی جدینه بنزر جوانین بدنین
.
گوروب که گلشن جسمنده یاره لر گل آچوب
قلج یرینه دگوب اوخ گل اوسته سُنبل آچوب
.
قلجلانوب باش آخوب قان گوزه اولوب پرده
قالوبدی گُل کیمی صد چاک پیکری یرده
.
قاشی گوزی خط و خالی یوزی باتوب قانه
شبیه اولوب، بدنی قطعه قطعه قرآنه
.
ز بس دوشنده آت استن یره چالوب آل أیاق
یتوبدی صدمه یوزینه گوزینه گوزدن ایراق
.
ایکی الیله باشین قوزویوب اؤپوب گوزینی
قویوب او توپراقا قانه باتان یوزه یوزینی
.
بویوردی یا وَلَدى بَعدَکَ عَلَى الدُّنیا
اَفا وَ لا ضَحَکَ سَنَّه اِلَى العُقبا
.
باخوب گورردی بویاندا جوانی جان ویروری
اویاندا زاده لرین سعدین اوغلی سان ویروری
.
تصورایله او حال شهنشهِ زمنی
نجه خیامه گتوردی او دوغرانان بدنی
.
بویوردی اوغلی ئولن شاه اوز قَبایِلینه
بو نعشی حمل ایلیون خیمه لر مقابلینه
.
جنازه نون قباقنجه امام تشنه جگر
دلنده واوَلَدا وای اوغول علی اکبر
.
یتوب خیامه چکوب داغلی سینه دن بیر آه
ساقا صولا نظر ایتدی شهید عشق اِلاه
.
بویوردی گل ای آنام فاطمه نشانی باجی
مشایعت ایله بو دوغرانان جوانی باجی
.
منیم دلیمجه دئ باشی بلالی لیلایه
گتوردوم اکبری گلسون اودا تماشایه
.
اوزوم نه حالدیم یوخ بلن خدا بلوری
بوحالی بیرده جوانی ئولن آتا بلوری
.
توکولدی خارجه یکسر مُخدَّرات خِیَم
گوروب حرم بلشوب قانینه غزال حرم
.
او نازنین بدن اوسته آچلدی چوخ باشلار
یولوندی ساچلار عذاره توکولدى قان یاشلار
.
جنازه اوسته یتن وقته لیلی مضطر
قیامت اولدی عیان آشکار اولوب محشر
.
اوجالدی عرشه نوا اهلبیت طاهادن
دوشوب تحیّره گوی اهلی صبر لیلادن
.
دوتوب امامه یوزین عرض قیلدی یابن رسول
منای عشقده حق ایلسون فداوی قبول
.
بوگون بو یرده رَهِ حقده چوخ فدا ویردون
دوزوب بلایه قضای حقه رضا ویردون
.
دوداقلارون کیمی قلب شریفون اودلاندی
گوزون باخا باخا جدون شبیهی دوغراندی
.
خدای عالمه چوخ ایتمسن خطا «صحّاف»
صحیفۀ عملون دولدوروبدی جرم و خلاف
.
حسینی ایستین اولماز ذلیل حتم ایله
بو غمفزا غمه چوخ طول ویرمه ختم ایله
.
#اکبریه_شهادت
#نه_حاله_قالدی_او_ساعتده_بلمورم_شه_دین
#ترکی
.
.