یا مهدی
…..
مرحوم حاج حیدر خسرو شاهی (حزین)
…..
نَقَدر خالقِ عالم سنی زیبایارادیب
او قَدَر عاشق شوریده و شیدا یارادیب
منه گلسین قاداسی گوزلروون بیرباخشی
اورگیمده نئجه دنیابویی غوغا یارادیب
نرگسی گؤزلره قربان دییه سن خالق عشق
اولاری صبر و قرار آلماقا شهلا یارادیب
هانی درد اهلی دییم دردیمی بلکه آزالا
منی غم چکماقا غم صاحبی تنها یارادیب
نَقَدرآتش هجرانه یانیم ، منده مگر؟
نَقَدرتاب وتوان حیّ توانا یارادیب
یوخ گلایه یئری امّا ئوزی اوّل گوندن
عاشقین خالقی ، معشوقی شکیبایارادیب
حقلیم شام وسحرکویوی ماوا ائلسم
کوی یاری ، یارادان عاشقه ماوا یارادیب
حدّسیزحمدوثناصنعونه صورتگروون
که بو صورتده نه عالم نئجه معنایارادیب
بونه صورتدی ، نه قامتدی که خلّاق ازل
عالمی قامتوه محو تماشا یارادیب
بیربئله حسن خدادادیله ای آیت حُسن
کیم دییرحُسنده خالق سنه همتایارادیب
غبطه ایلرله وجاهتده گؤزللرسنه ، چون
اولسالارقطره گوزللر ، سنی دریا یارادیب
وئرخبرپیک صبا یوسف مصری گله تا
گؤره نه جلوه نه فریوسف زهرا یارادیب
حدّاعلاده دی حُسنون سنون ای حُسنه مَثَل
جلوه حُسنونه خالق سنی مَجلا یارادیب
سن، او ، بیتُ الغزلِ شعرِ وفاسن که سنی
خالق شعرئوزونه دلکش وشیوا یارادیب
هانی صهبای محبّت ، وئیره ساقیِّ وفا
گؤره دُردیلره ،نه دَرد، اوصهبایارادیب
چوخالیر عمر چوخالدیقجا تمّنا دئیه سن
باشدا سودای جوانلیق بوتمّنایارادیب
چوخ دئدیم گویلومه پروا ائله عاشیق لیقدان
دئدی خلاّق مگرعاشقه پروا یارادیب
دئدیم افراط ائلمه عشقده رسوای اولاسان
یاردان سویلدی عاشقلری رسوا یارادیب
عشق اگراولماسا آیا ندی معنای حیات؟
بشری عشقیله توأم حق یکتا یارادیب
عشق مولانی خدایا الیمیزدن آلما
دل احبّایه صفایِ غمِ مولا یارادیب
دلده گرنور ولا اولماسا دل، یوخدی ،گِله
گوهرجانه بها نور تولّا یارادیب
عاقل اولماق سنه ایش وئرمدی دنیاده #حزین
ئوزونه اهل جنون گؤرنئجه دنیا یارادیب
#مهدیه
#نقدر_خالق_عالم_سنی_زیبا_یارادیب
#حزین_خسروشاهی
#ترکی
نظر دهید