نیزه ده شوریله سن اوخی قرآن یارالی #کوفه_تائب_تبریزی

کوفه
زبانحال حضرت زینب (س)
.
.
مرحوم تائب تبریزی
.
.
نیزه ده شوریله سن اوخی قرآن یارالی
ایلیوم ناقه ده من حقّى اعلان یارالی
خلقی هشیار ایلیاق
خلقی بیدار ایلیاق
.
.
اوخی قرآنی حسین دین ساتانلار اویانا
دینین آئینه سینه داش آتانلار اویانا
اوخی غفلتله دوشوب بو یاتانلار اویانا
بو قدر ویرمیه لركفره میدان یارالی
.
.
گل وراق بیربیریله دست همت ایکیمیز
باجی قارداش ایلیاق خلقه صحبت ایکیمیز
کوفه شهرینده سالاق بیر قیامت ایکیمیز
ایلیاق شور جزا بیز نمایان یارالی
.
.
ایکی قارداش باجیوخ بیردی ماهیّتیمیز
بیر مرام اوسته بیزیم باشلانوب نهضتیمیز
بیردی هر نیّتیمیز بیردی هر صحبتیمیز
بیردی هر صحبتیمیز بیردی عنوان یارالی
.
.
ایکی قارداش باجی گل بزم الفت یاراداخ
شوریله جامعه ده روح نهضت یاراداخ
کوفه شهرینده بوگون بیر قیامت یاراداخ
حقّى حقّ منطقیله ایداخ اعلان یارالی
.
.
یغموسان باشوه سن اؤز گوزل گل لریوی
اوز گوزل گلریوی زلفی سنبل لریوی
منده جمع ایلمیشم باشه بلبل لریوی
گوسترور قافله میز بیر گلستان یارالی
.
.
سن اؤزون ایلموسن منه تعیین مسیر
منه آسان گلی بو یولدا هر امر عسیر
أؤزوم آزاده ولی قید عشقونده اسیر
چکه عشقون گیدرم گله هر یان یارالی
.
.
تیر عشقونله حسین باغریمی من دلرم
یوزومه گوز یاشیمی دلده عشقون الرم
من سنون عاشقوم هارا گتسن گلرم
ذرّه عشقیمده منیم یوخدی نقصان یارالی
.
.
عشقوین باده سینین ایله مستانه سیم
سن اولان شمع وفا منده پروانه سیم
نیلیوم شوره گلن عشق دیوانه سیم
سلک دیوانه لره یوخدی دیوان یارالی
.
.
گلمیشم عشقویله من ازل دنیایه
گئتمیشم عشق یولون باشا پایه پایه
سالموسان عشقیله سن منی بو غوغایه
ایلیوبسن بیله بی سر و سامان یارالی
.
.
اهل عشقه بولوسن سر و سامان اولماز
عاشقین مشکلی هیچ وقت آسان اولماز
درد عشقه دوشنه داخی درمان اولماز
دردینه درد دلی اولی درمان یارالی
.
.
سنه عشقیم ایله وار داخی صحبت یری یوخ
غیر مهرون سینه ده بیر محبت یری یوخ
عشق دیوانه سینه هیچ ملامت یری یوخ
عاشق صادق اولار عشقه قربان یارالی
.
.
کوی عشقونده سنون مالكم صبر ایوینه
اشک عشقمدی سالان رخنه هر ابر ایوینه
عشقویله ئولرم گیدرم قبر ایوینه
دورّام عشقونله سنون حشر اولان آن یارالی
.
.
درد تائب چوخالوب ای گوزل آدی دوا
ای اولان ذکری شفا ای اولان روحی صفا
وار مریضی ایدوری او تقاضای شفا
آل شفا دردینه سن ایله درمان یارالی
.
.
#کوفه #تائب_تبریزی #ترکی #زبدةالاشعار