کوفه
زبانحال حضرت زینب (س)
.
.
محیّر اردبیلی
.
.
عمریمده خیالین ایلمزدیم
بو دهر پر ابتلاده قارداش
بیر گون دولاناق بو کوفه شهرین
من ناقه ده سن جداده قارداش
.
.
بو کوفه همین او شهریدور کی
بش ایل آتامز خلافت ایتدی
ظاهرده اونا بو بی وفالر
عرض ادب و ارادت ایتدی
هر تک تکی بیعت ایلینده
اوّلده الین زیارت ایتدی
نیرنگ و ریا و حیله چخدی
نیّتلری انتهاده قارداش
.
.
بیر یول آتامون خلافتینده
گلدیم بو خرابه شهره مهمان
چوخلاری الیمدن اؤپدی اوندا
ذبح ایتدی ایافیم آلتدا قربان
بعضی لری گل سپوبدی بعضی
بالای سریمده دوتدی قرآن
اولدی آرامیزدا حرمتیلن
گرمیّت فوق العاده قارداش
.
.
بو ملک عراقه گتدی بیرده
دعوتله بیزی بو بی وفالر
اؤز اؤزلرین ایتدیلر سیه رو
عکس اولدی یالانچی ادّعالر
ایندی منه دوره دن باخولّار
بیگانه گوزیلن آشنالى
شرم ایلمیوب دیولّه حتّى
بعضی لری نارواده قارداش
.
.
بو شهر ایچینه اولاندا داخل
فکریم آنام اوغلی برهم اولدی
باشیمه دولاندی شهر کوفه
عالم منه آیری عالم اولدی
یومدوم گوزومی کجاوه اوسته
قلبیمده نه لر مجسم اولدی
گوردوم منی پیشواز ایدنلر
یاخموشلار اله حناده قارداش
.
.
بیز کرب و بلا دن آیریلاندا
سالدی منی فوج غم حصاره
گوردوم اوز ئولنلرین قویوبدی
بو لشگر کینه جو مزاره
امّا بو غم هر غمیمدن آرتوق
قلبیمه منیم سالوب شراره
نعشون سنون ایستی قوملار اوسته
الآندا قالوب آراده قارداش
.
.
بو قلب پر اضطرابه ایندی
صبر ایستورم حیّ قادریمدن
قلبیمده که محنتیم عیاندی
گر چه سنه حال ظاهریمدن
یثربده گچیرتدیگیم او گونلر
بیر بیر گیجور ایندی خاطریمدن
قویمور بو خیال محنت افزا
طاقت من بینواده قارداش
.
.
یثربده او گونکه ایسته سیدیم
جدّیم حرمین ایدم زیارت
گوزلردوک او قدری گون باتاردی
ایلردی هوانی تار و ظلمت
گل گئت کسیلردی کوچه لردن
تا اینکه اولاردی شهر خلوت
نصف شب اولاندا ایلیردی
بو امره باجون اراده قارداش
.
.
اولمازدی رضا شه ولایت
گورسونله بو قامت رسانی
خاموش ایلیه چراغ وشمعی
یوللاردى قاباقدا مجتبانی
عباس صاقیمدا سن صولومدا
ایلردوز او نوعی پاسبانی
یانیمجه منیم گلردی اوندا
حتى اوزی مرتضاده قارداش
.
.
من تازه عروسیدوم کی بیر گون
گلدون منیله وطنده دیده
من یاتمشیدوم گلنده گوردون
گون صورتیمه اولوب دمیده
فوراً یوزیمه عبانی چکدون
تا اینجمه سین بو غم کشیده
زینب دیدون آرتوخ اینجور ایتسه
گون تابشنی زیاده قارداش
.
.
من ایندی همان او زینبم کی
روشن گونوزوم اولوبدی قاره
عریان دَوَه محملیم شکسته
قوللاردا رسن باشیمدا یاره
قانیم سوزولور هوروکلریمدن
اوفّ اولسون حسین بو روزگاره
یوخدور بیری یدّی قارداشیمدان
گلسون بیله وقته داده قارداش
.
.
ایکاش بیری خبر ویریدی
زهرا آناما بو ماجرانی
آگاه ایلیوب بابام رسولی
سسلیدی بقیعده مجتبانی
یا اینکه گیدوب نجف چولوندن
داده چاغوریدی مرتضانی
قویمیدی قالا کجاوه اوسته
زهرا قیزی سرگشاده قارداش
.
.
گورموشدیم حسین اوشاقلقوندا
پیغمبر اوپردی لبلروندن
آنّوندان اوزوندن حنجروندن
هم سینۀ پاک و اطهروندن
گول تک سنی ایگلیوب دویونجان
آخرده أؤپردی اللروندن
رخسارینه گوز یاشین توکردی
ساخلاردى الین دعاده قارداش
.
.
عرض ایلریدی الهی حفظ ایت
بو سویگلوی اؤزون بلادن
آینده ده چوخلی انتظاریم
واردور بیلوسن بو مه لقادن
لطف ایله آلا او گون نتیجه
تا نهضت سرخ نینوادن
شامی باجی ایلیه مسخّر
پیروز اولا کربلاده قارداش
.
.
#کوفه #محیر_اردبیلی #ترکی #زبدةالاشعار
نظر دهید