وصیت حضرت زهرا به دخترش زینب (ع)
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
هارداسان گل نازدانم وقت هجراندور قزیم
قاصد مرگیم گلوب حالیم پریشاندور قزیم
.
.
عمریم آز دردیم فراواندور جهاندان دویموشام
عصردن چوخ اینجبوب من جسم وجاندان دویموشام
گرچه سیزدن دویمادوم چرخ زماندان دویموشام
گل اوتور یانیمده منده غرق محنت سن بالا
آدیوه قربان اولوم ام المصیبت سن بالا
.
.
گورمیوبسن گر معلم آدون والموش عالمه
آغلاما سینّون اوشاقدور ناگرانسان حالمه
گل سنه الان قزیم ایتسون وصیّت فاطمه
وقت اولوب گلشن پوزولسون گللرون سولسون قزیم
جان سنون جان بو حسینیله حسن اولسون قزیم
.
.
یادگار ختم مرسلدور بو نازدانه لر
شمع پرنور بابامدور هر ایکی دردانه لر
شعله سینده منتظردور پر وورا پروانه لر
اولمارام من هر بیری الله یولوندا جان ویرر
بیر قوزی قربان حسینیم امّته قربان ویرر
.
.
ایوده سن اولدون بویوک قیز دوت وظیفوندن سراق
گون باتان وقته اوشاقه سخت اولی درد و فراق
باتجاقین گون جهد قیل یاندور قیزیم ائوده چراغ
قویما ظلمتده ایوی تا درد و غم سایه سالا
مهربان اول بو یتیمانه آنالار تک بالا
.
.
بیر بله شمعه یقین پروانه لازمدور قزیم
قول قانادسیز بیر اوشاقه شانه لازمدور قزیم
دورد اوشاق بی مادر اولسا خانه لازمدور قزیم
من دوشنده یادنه قوی ایوده سینه داغلاسون
قویما گیتسون سن حسینی قونشولاردا آغلاسون
.
.
عادت ایت رسم وفانی قلبدن آتما بالا
آغلیوب سن ام کلثومی چوخ آغلاتما بالا
تا حسینیم یاتمونجا ، سن ئوزون یاتما بالا
صحبت ایت غمله دولان قلبین چراغان ایتگلن
جهد قبل خوابه گیدن وقتنده خندان ایتگلن
.
.
بیرده بیر سوز وار دیسم سندن آلار گر صبر و تاب
هر گجه بیدار اولوب مندن حسین ایستردی آب
سن سو قوی باش اوسته دورسا اولماسون قلبی کباب
وار سویا اوغلوم حسینون بسکه میل رغبتی
گر سوسوز قالسا بالام ساللام نوابه جنتی
.
.
هر آنا من تک جوانلقدا اونون سولسا گلی
درد هجرانه چتیندور تاب ایده قوم و ائلی
اولدی بی یاور بو شهر ایچره عموم اوغلی علی
کامه یتدی دشمنیم قالدى ئورکده حسرتیم
دورد اوشاقیم کورپه وقتی اولدى مادردن یتیم
.
.
آچمایش گلشنده گل غنچه چاقندا یاندیلار
اولماسا مادر اوشاقلار کوچه ده ویلاندیلار
بوینی چگننده الی قوینوندا سرگرداندیلار
رسم دور ئولسه آنا اولادی قاره باغلاسون
قاره اوستن قاره سال من گیتدوم الله ساخلاسون
.
.
قوی سنه واضح دیوم ای زینب شیرین کلام
فرصتون وار ایت یتیمدار اولماقین مشقین تمام
قوى قالا رفتاریوه حیران او گونده اهل شام
شامده جور و جفانی جان دلدن ایت قبول
قوی سنه جدّون باخاندا سویله سین احسن بتول
.
.
وار شهامت جوهرونده چوخدی سنده معرفت
صولتی حیدر ویروب مندن آلوبسان تربیت
ایت حسین روحیّه سین کرب و بلاده تقویت
جمع قیل اطرافیوه مهر و وفا اولدوزلارین
دشمنین امّدینه قویما حسینون قزلارین
.
.
بیل یتیمدار اولماقا چودور قزیم اجر و ثواب
قویما سن مندن صورا اولسون حسینی دلکباب
شست و شو ایت کاکلین سپ باشنه عطر و گلاب
سینم اوسته بسلیردوم عطری سینمدن آلا
کاکل مشکیننه سن قویما توز قونسون بالا
.
.
باشنی شاید کسنده قاتلی رحم ایله سون
مطبخنده خولی باخسون عطرنه شرم ایله سون
یا تنوره کول توکوب باش آلتنی نرم ایله سون
ای فلک چرخون پوزولسون قلبیمه ورما یارا
من هارا کوفه هارا ؟ یا مطبخ خولی هارا
.
.
حالتیم اولدی دگرگون زینب خونین جگر
کربلا دشتنده بیر گون روز عاشورا گلر
چاره یوخدور اول قزیم اسراردن سن باخبر
قوم و قارداشین ئولر قاره سالارسان باشیوه
نوبت میدان یتر اوندا حسین قارداشوه
.
.
آلگلان بو جعبه نی ساخلا امانت زینبیم
کهنه بیر کوینکدی اسباب شفاعت زینبیم
ایستیر سندن حسین وقت شهادت زینبیم
گر چه عاشورا گونی گریان ایدر کوینک منی
شیعه نی اوددان خلاص ایلر حسین پیراهنی
.
.
کربلا دشمن له صف باغلار او گون فوج ملک
الفتون چوخدور حسینه گوردون اودلاندی ئورک
طاقنون طاق اولسا زینب فضه دن ایسته کومک
فضه چون اسراریمه بو ایده محرمدور قزیم
هر بلا گلسه شریک درد و ماتمدور قزیم
.
.
قوی آلا خورشید او کوینکدن شفق ذراتنه
ایله بیر کوینک اضافه شامیان سوغاتنه
دوت رکابین سن سوار ایله حسینی آتنه
هیچ باجی قارداشی گوندرمز ئولوم میداننه
سن اطاعت ایت قزیم زهرا آنان فرماننه
.
.
طشته کسمزلر حسین باشین اگر یحیا کمی
باش ویرر معشوقنه بیر عاشق شیدا کمی
قاب قوسین اوسته یانسین شاه او ادنی کمی
روز عاشورا سالار هفت آسمانه شور و شین
حجله گاه عشقده معشوقنی گورسون حسین
.
.
طور سیناده حسین تک هاردا جان ویردی کلیم
هاردا ذبح اولدی مناده بیر بله ذبح عظیم
صبر ویر اوغلوم حسینه ای خداوند کریم
سینۀ مجروحی اوسته قاتلی ایلر مقام
قاتله سویلر الون ساخلا گله شاید آنام
.
.
زینب کبرا بو سوزلردن اولوبدور باغریقان
دوشدی زهر سینه سی اوسته چکوب آه و فغان
عرض ایدوب بو اودلی سوزدن یاندی مادر جسم و جان
کربلا هاردا نه یردی ای عزیزعالمین
بس بابام هاردا قالار یالقوز قالان وقته حسین
.
.
غم گلور مادر منه چوخ گردش ایامدن
آد آپاردون کربلادن کوفه شهری شامدن
هانسی یردور غم نواسی موج ایدور بو نامدن
گرمنه امر ایلسون امرون یره سالمام آنا
ئولدوره دشمن حسینی منکه ساق قالمام آنا
.
.
هئچ کیمین قلبی منیم تک درد و غمدن دولماسون
هیچ گلی گلشنده سن تک غنچه لقدا سولماسون
بیر ئولوم، بیر آیریلوق، الله آراده اولماسون
گر آتام ساقدور ولی تأمین اولونماز نیتیم
چون اوشاقه چوخ چتیندور اولسا مادردن یتیم
.
.
هر مصیبت بیر یانا مادر فراقی بیر یانا
من یتیمدارلق باشارمام قلبی دوندرمه قانا
سعی قیل اوّل منی سن بیر کسه تاپشور آنا
آد وطن اولموش ولی غربتدن آرتوخدور بیزه
شهر ایچنده بیر نفر دلسوز اولان یوخدور بیزه
.
.
من حسینیله آناجان عهد و پیمان باغلارام
گر حسینیم آغلاسا منده اونیلان آغلارام
خسته اولسا من باشین آللام دیز اوسته ساخلارام
بس منیم کیمدور بو ایوده قیدیمه قالسون آنا
آغلیاندا سندن ئوتری گوگلومی آلسون آنا
.
.
قان اولان قلبیم نجه حل ایلسون بو عقده نی
من حسینیمدن اوشاقم سالما چوخ گوزدن منی
گوزلریمدن من علاوه ایسترم مادر سنی
آخ نه وقتیمدور قرا اوستن گده قاره سالوم
وای منه مادر نجه دنیاده من سنسیز قالوم
.
.
دوره می غم فوجی آلدی یالقوزام فریاد ایدوم
جدّیم احمد گیتدی الدن وار آنام زهرا دیدوم
سن منی ترک ایلوسن بس من کیمه داده گیدوم
چون یتیمه بیر قیز اولسام خوار ایدر دوران منی
اولماسون سن اینجیدر قنفذ کیمی عدوان منی
.
.
صبح و شام اولسا گرک گوزدن توکم گوز یاشمی
کاکل مشکین یوووب شاد ایلیم قارداشمی
لیک مادر کیم توکر سو کیم یوار ئوز باشمی
یوخدی چارم عفو قیل ناراحت ایتدوم من سنی
پس منیم باره مده فکر ایت بیر کسه تاپشور منی
.
.
آغلادی زهرا دیدی قلبیمده من غم بسلرم
الوداع زینب قزیم ، گل قتلگهده گوزلرم
گلمسون دشت مغیلاندا آدونلان سسلرم
هاردا بیر مادر اولار ای #نادری زهرا کمی
شیره زن بیر قز بجرده زینب کبرا کمی
.
.
کوفه ده گرچه قوپوب اولگون قیامت زینبه
یوز ویروب بازار ایچنده ئوزگه حالت زینبه
ارث دور حیدر باباسیندن شهامت زینبه
اسکتوا صوتین ایشیت جک کوفه نی دوتدی سکوت
خطبۀ معروفی ایتدی حقّی دنیایه ثبوت
.
.
.
#فاطمیه_نادری
#فاطمیه_شهادت
#هارداسان_گل_نازدانم_وقت_هجراندور_قزیم
#ترکی
.
✍️ #زبدةالاشعار ✍️
.
🆔: @nohe_torki
نظر دهید