نصایح گریز به احوالات کوفه
.
مرحوم تائب تبریزی
.
هر بیر اورک که آینۀ حق نماسی وار
انوار کبریائیله صدق و صفاسی وار
.
سعی ایت حلاوت حَسَدی سینه دن بوشات
چون نیشکر بوشالسا شکردن نواسی وار
.
تقوی ضمیر پاکیله دور نه لباسیله
وار چوخ پلید دل که نظافت لباسی وار
.
یاندیردی شمعی بی ادب ایولرده گولماقی
سانموب که گولماقیندا محلّ سزاسی وار
.
بی جا دانشما گولمه که بیهوده گولماقین
الدن آلار وقاریوی ننگین جزاسی وار
.
بتخانیه سالوب یولووی اولما بت پرست
گل هوشه هوش ایله که بو ملكین خداسی وار
.
سالماز اؤزون دخیل سلیمانه مورچه
هر قدر لانه سینده که قوت وغذاسی وار
.
اولماز چراغ ره یاری یانمیش اودون سنه
یاندیر ایله چراغ که عالی ضیاسی وار
.
بیهوده ایتمه عمر گرانمایه وی تلف
آخر بو گوهرین بولوسن نه بهاسی وار
.
پررولریندی یر یوزونون ناز و نعمتی
خون جگر ییر او که یوزده حیاسی وار (1)
.
آقا منِش یاشا گوزوم اولما گدا صفت
ال دوت که ال دوتانلارین عالی جزاسی وار
.
گربه خصال اولماز اولان نوکر حسین
چون سفرۀ حسینین اونا اکتفاسی وار
.
بیگانه سفره سی باشنیا گیتسَه ننگدور
اَرجی گیدر دُؤوَلّه دؤگولماق سَزاسی وار
.
کَلب حسین یازدیر آدون ویر وفا نشان
قیمتلیدور او کیمسَه که مهر و وفاسی وار
.
گیتمه یزید سفره سینین باشینه گوزوم
هر لقمه سینده مین اثر کفر زاسی وار
.
هر کس اولا گدای در خانۀ حسین
مطلق غنی دی چون که حسین تک آقاسی وار
.
الله ویروب حسینه گوزل شوکت و جلال
وصفه قلمزنین قلم نارساسی وار
.
دنیا سولارینا سالوب از بس محبّتین
عالم ایچوبدی دلده او مهر خفاسی وار
.
گر چه اؤزی جفائیله خانه بدوش اولوب
امّا هامی اؤرکده محبّت سراسی وار
.
عالم سُوَر مرامینی قربان مرامینه
اولموش فنا مرام یولوندا بقاسی وار
.
گاندیّ هندى قاندی حسینین یولون دوتوب
ویردی نجات ملّت هنده صلاسی وار
.
افسوس کوفیان تانموبلار بوله بوله
زهرا عزیزیدور شرف مصطفاسی وار
.
روح کرم کریم اَبَوینون بالاسیدور
دریای مهردور کرم کبریاسی وار
.
نامه یازوب قوناق چاغیروب چکدیلر قلج
ئولدوردیلر سوسوز بیر اوزون ماجراسی وار
.
شهره قوناقچیلار قوناقی قویمادی گله
باشین کسوب گتوردیله جای بکاسی وار
.
گزدیردیلر قوناق باشینی نوک نیزه ده
گور میزبانلارین نه وفا نه حیاسی وار
.
عرض ایلدی گوزل سسیوه زینبون فدا
خوش لحنویله سینه ده دردیم دواسی وار
.
سن نوک نی ده صحبت ایله ناقه اوسته من
هنگام اخذ بهره دی وقت اقتضاسی وار
.
بیدار ایداخ بیانیله غافل یاتانلاری
غافل یاتانلارین باشینین چوخ بلاسی وار
.
قربان او قانلو لبلره کیم نوک نیزه ده
قرآن تلاوت ایلوری شیوا اداسی وار
.
قرآن اوخی یارالی بو قرآن دانانلارا
بولسونله بو بلالی باشین نه هواسی وار
.
قربان اولوم او گل یوزه کیم چولقانوب کوله
دوتقون آیا شبیهدی ایله نماسی وار
.
قربان او مه جبینوه کیم تازه قان آخور
وار سنگسار علامتی تازه یاراسی وار
.
باشون دالنجا منده سورونّم هایان گله
هشتاده دین باشمدا بلا مبتلاسی وار
.
«تائب» ایکی جهاندا اولار اَغنَى الاَغنیا
یازسا حسین که «تائب» آدینلی گداسی وار
.
عمرین ویروبدی آخره عشق حسینیله
شرکت ایدوبدی هاردا حسینون عزاسی وار
.
چون آشنا اولوبدی حسینه غم ایلمز
محشر گونی حسین کیمی آشناسی وار
.
(1) نعمت خوب زمین قسمت پر رویان است // خون دل میخورد آن کس که حیایی دارد
.
#پندیات_کوفه #تائب_تبریزی #هر_بیر_اورک_که_آینه_حق_نماسی_وار #ترکی
نظر دهید