قتلگاه
.
.
شاهی اردبیلی
.
.
✔️ #پندیات
.
هزار تجربه یاتمیش مرور دوراندا
هزار رستمی آخر بوغوب زمان قاندا
.
هزار مرتبه تاریخی ائتمیشم رویت
هزار دبدبه نابود الوبدی بیر آندا
.
نه حرفدور نه حکایت دروس عبرتدور
او قصه لر که خدا نقل ائدوبدی قرآندا
.
قزیشما عرصه ده اویناتما آت اویان شاهی
سواره لر ایاق آلتدا گئدوب بو میداندا
.
دئیوردی بیر ملخ ئوز لحجه سیله بیر موره
یاخوندی عاجز اولا مور تک سلیماندا
.
چوخی امیریدی آخشام سحر اسیر اولدی
چوخی ایاقیدی بیردن باش اولدی هر یاندا
.
اماندی سن نه ایاق اول بو هایهویده نه باش
سرای دلده یاشا کوی سر جاناندا
.
نه وار او باشدا فضیلت نه اول ایاقیده عیب
که بیر دی هر ایکی سی دیدگاه عرفاندا
.
او کسدی صاحب عزت که نفسه اگمیه باش
باشین اوجالدا بئله پیشگاه جاناندا
.
نه این که دم ورا دائم بشر حقوقیندن
بشر قانین توکه اما بسیط کیهاندا
.
بهار ناز و نعمده بو قدری مست اولما
که یوخ ثبات و صداقت بو کون امکاندا
.
هزار دفعه گوروب باغ و بوستان اهلی
که بیر یل اسدی فنا اولدی باغدا بستاندا
.
دوام ائدن فقط اعمال خیر دور لا غیر
که خیر صاحبی داخلدی صبح سبحاندا
.
سن امر خیر ائله آت رود نیله ای #شاهی
که قیترر اونی ایزد سنه بیاباندا
.
او گون که اللی مین ایلدور مقام حشر و حساب
او گون که مغزده قینر سو اود دوشر جاندا
.
او گون که ئوز بالاسیندان فرار ائدر آنالار
او گون که لرزه دوشر تار و پود انساندا
.
او گون که فایده وئرمز سپاه زور و سلاح
او گون که چنگده گلمز هرایه دنداندا
.
دسیسه لر پوزولار دست لر اولار رسوا
فلان خلیفه ده تنها قالار فلان خاندا
.
مهابت لمن الملکدن اسر شاهلار
بویون ورانلار ایر بوینونی او بحراندا
.
او گون اولار سنه یاور سلیم اولان قلبون
فقط او قلبدی امدادگر او طغیاندا
.
او قلب سیز نه ثنای مه و عبادت سال
او قلب سیز رمضاندا تهیدی شعباندا
.
.
#گریز #حسینیه_شهادت
.
حسینی مالک روز جزا او قلب ائتدی
او قلبه سویلدی احسن ملک ده یزداندا
.
او قلب پاکدن ابراز اولاندا احساسات
یخلدی سجدیه دوشدی تیکاندا ریحاندا
.
او قلبدن نگرانیدی چون خانم زهرا
ئوزی عراقه گلوب تختی قالدی رضواندا
.
بلالی دشتیده قانلی مناده تاپدی حضور
نظاره قیلدی او جنگ و جدال و جولاندا
.
اودم گونورتا چاقیدی زمان گرم نبرد
کئچردی بیر بیرین اوخلار فضای سوزاندا
.
آچاردی پنجه ششپر زره لرین دوگونین
حدیث رعبی قلجلار یازاردی قلخاندا
.
تیکردی نیزه گهی آتلاری بویون بویونا
گهی وراردی دوگون تیرلر گریباندا
.
اوتوز مین اهل جنایت ائدردی بیردن داد
باخاردی اوغلی ئولن بیر امام عطشاندا
.
نه قارداشی ساغیدی گورسنه کنارینده
نه لشگری واریدی سسلنه او طوفاندا
.
او قدری گوردی جسارت عربدن اول مولا
او قدری اینجیدی حضرت او تیر باراندا
.
او قدری حربه لر اندی او محترم جسمه
او قدری نظم داغیلدی وجود سلطاندا
.
که چاتدی قصدینه آخر نظام سیز لشکر
بویاندی باشدان ایاقه او نازنین قاندا
.
یتیشدی بیر دم حساس و وقت هول انگیز
نه اولدی بیلمورم عارض جبین جاناندا
.
یاپیشدی دامن پیراهنین اوجالتدی او شاه
که پاک ائده قانی پیشانی درخشاندا
.
آچیلدی سینه عیان اولدی مخزن الاسرار
گوروندی قلبی نشانگاه تیر عدواندا
.
او قلبه فاطمه باخدی بویوردی جان اوغلوم
عطش نه محشر ائدوب گور بو قلب بریاندا
.
بویوردی حضرت خاتم او قلبه من قربان
خدیجه سسلدی منده نفوس و اعیاندا
.
فرشته لر دئدی بیر بیر او قلبه بیزده فدا
بویوردی پرده لی بیر سوز خدای رحماندا
.
او پرده لی سوزی من ائتمرم بیان شاهی
که قورخورام دوشه لغزش عقول و اذهاندا
.
بوتون فلک لر او ساعت او قلبه قیلدی نماز
او قلبه ذکر دئدی آیدا ، گونده ، کیواندا
.
منا و مکه و مشعر او قلبی ائتدی طواف
او قلبی وحشی عرب سوکدی نوک پیکاندا
.
.
دینده اوخ او اورکدن اوجالدی ذکر جلی
چیخاندا اوخ او اورکدن اثر یوخیدی ولی
.
.
او قلبین امری خلاصه یتیشدی پایانه
وداع ائدوب اونی پیکر یخیلدی میدانه
.
آت اوسته رذل رعیت قوم اوسته یاره لی شاه
آت اوسته حکمت بالغ آت اوسته دیوانه
.
آت اوسته فوق جهنم قوم اوسته فوق جنان
آت اوسته خار مغیلان قوم اوسته ریحانه
.
آت اوسته بغض و عداوت قوم اوسته عشق و صفا
قوم اوسته محرم سبحان آت اوسته بیگانه
.
آت اوسته ظلم مجسم قوم اوسته عدل علی
آت اوستی کفره یتیشمیش قوم اوستی ایمانه
.
قوم اوسته فاطمه نون روحی زینبون جانی
آت اوسته نیزه وران روحه اوخ ورار جانه
.
آت اوسته بیر ستم ائتدی پلید و پست امت
قوم اوسته بیر حالا قالدی امام فرزانه
.
که قوپدی خیمه ده غوغا رقیه غش ائتدی
یخیلدی عمه سیده معجر الده میدانه
.
گویون ملک لری زهرایه تسلیت دئدیلر
اوجالدی کعبه دن افغان یاییلدی کیهانه
.
فرات وردی ئوزین داشلارا خجالتدن
دئدی نه ظلم ائلدیم گور امام عطشانه
.
بو موجلر که منیم وار تفو بو موجلره
امامی تشنه قویوب آخدیلار بیابانه
.
داشا باخاندا حسین داش سو اولدی اما سو
باخوب اوتانمادی اول تشنه لب سلیمانه
.
هزار لعنت اولا تاج و تخت و سلطنته
که سالدیلار ملک یوم دینی طوفانه
.
هزار مرتبه نفرین قلینجا لعنت اوخا
بیر ایش گوروبله باتوب لاشریک له قانه
.
نه وار قلیجدا جسارت نه اوخدا وار تقصیر
هزار مرتبه لعنت دو چهره انسانه
.
گئجه نمازی قیلانلار نمازی ائتدی شهید
گونوز حدیث اوخویانلار اوخ آتدی قرآنه
.
ساتیلدی درهم و دیناره دین و ایمانلار
ریاست ائتدی مقدم یزیدی یزدانه
.
تفو او مردمه که اللهین رضایتینی
هدیه ائتدی رضای ملوک دورانه
.
او تاج که قویولوب ظلمیلن نه ارزشی وار
آتین ایاقینه دوشسون او تاج شاهانه
.
بشرده ظالمه باش اندیرر طلایه گوره
طلا اگر بودی داشدی دانیشما افسانه
.
بشرده فاطمه اوغلین قوم اوسته تشنه یخار
باجی یانیندا بویار قارداشی قیزیل قانه
.
او قیز که سوره توحید مثلی خورداجادی
اونی یتیم قویانلار بشردی آیا؟نه
.
خلاصه الده آغیر حربه دلده یا الله
چوخور مکانه هجوم ائتدیلر عجولانه
.
نه قالدی زینبه فرصت نه تاپدی فاطمه وقت
گوزین یوموب ایکی بانو دایاندی هم شانه
.
اولار اوجالتدی سلاحین گویه بولار آهین
اولار ورا ورا دوردی بولار یانا یانه
.
اولار قوتاردی ایشین ترک قیلدی گودالی
آچیلدی یول بو ایکی ناامید و نالانه
.
چوخور مکانه طرف قاچدیلار او نحویله کی
چخوب قفسدن ایکی قوش قاچار گلستانه
.
خلاصه محضر مطلوبه یتدی طالب لر
سلام ائدوب ایکی جان بیر صفالی جانانه
.
قورولدی انجمن اما اول بو منظره نی
گتور خیاله صورا آغلا آل سبحانه
.
حریر بیر ساپا مرجان و دری نظمیله دوز
صورا اود آغزینا دوت باخ او در و مرجانه
.
نئجه او رشته یانار دفعتا اولار نابود
او درلر سپیلر دانه دانه هر یانه
.
اولاردا قلب لرین یاندیروب او رشته کیمین
اولاردا اشک لرین سپدی مثل دردانه
.
ایکی جهان سنه قربان ای اوچ گونین سوسوزی
او هانسی دیندی که وئرمز سو تشنه قربانه؟
.
بو نه بوغاز بو نه سینه بو نه کورکدی اوغول
هایاندا خدمت ائدوبلر بو نوع مهمانه؟
.
گل ایستیوب اپه حلقون اجازه وئرمه میشم
قلنج اپوب دئمیوب هیچ اجازه وار یا نه
.
بو ظلمه باعث اولان اقتداره عار اولسون
بو جاهل امته بو روزگاره عار اولسون
.
#حسینیه_شهادت
#هزار_تجربه_یاتمیش_مرور_دوراندا
#شاهی_اردبیلی
#ترکی #پندیات_شاهی_اردبیلی
#زبدةالاشعار
نظر دهید