جریان امان نامه
.
زبدة الاشعار
?: @nohe_torki
.
سید تقی سیفی اردبیلی
.
وئردی عفریتِ فلک فرصَتی اشرار الینه
سالدی قدّاره‌نی قان توکمیه غدّار الینه
.
نفسی سست عنصر اولانلار اولوب ابلیسه مُرید
سالدیلار دینِ رسولی خَطره قومِ پلید
حیدرین تختینی غصب ائیله‌دی ظلمیله یزید
دوشدو دیوانِ عدالت او زناکار الینه
.
ملّت مُسلم اوچون رهبر اولوب مردِ شراب
دوردو محرابِ عبادتده ولی مست و خراب
جَبریلن هیکلِ عصمتدن ائدیب کشف حجاب
دینی بازیچه دوتوب مردکِ میخوار الینه
.
پوزوب آئینِ رسول‌الهی اول کینه مُراد
گسترش تاپدی قوانینِ کذائیله فساد
ورطه‌یِ فقریده غرق اولدو برازنده عِباد
اولدو بیر عدّه ده مُزدور او تبهکار الینه
.
نخلِ اسلامه ووروب تیشه بداندیشِ زمان
غرقِ عیّاشی و میخواری اولوب نسلِ جوان
دوشدو محدوده‌یِ جبر و ستمه حقّ دانیشان
چکیلیب رشته‌ی‌ِ توقیف قلمدار الینه
.
شحنه‌یِ ملّت اگر اولسا اوزو باده‌پرست
امر واضحدی یتر پایه و بُنیانه شکست
ثروتِ مملکَتی غارت ائد‌ر رهزن‌ِ پست
آج قویار ملّتینی تا سالا دینار الینه
.
ساتدی حیثیتینی باده‌گُسار اولدو یزید
گون به گون پنجه‌ِ شیطانه دچار اولدو یزید
اوف اولا غیرتینه ملّته عار اولدو یزید
آبروسین شرفین سالدی لجنزار الینه
.
ائتمه‌دی شرم و حیا آتمادی باشدان هَوَسین
آرتیریب غرقِ فساد اولدوقوجان عربَدَ‌سین
ایسته‌دی بیعته آخرده پیمبر نَوَسین
بیلمه‌دی دوشمز حسینین الی مُردار الینه
.
دلِ دنیایه سالیب نعرهیِ مستانه‌سینی
وطنینده‌ن چیخادیب فاطمه دُردانه‌سینی
سالدی چولدن چوله عصمتلی حَرم‌خانه‌سینی
دستگیر ائیله‌دی آلُ‌الّهی کُفّار الینه
.
شبِ پُر وحشت و خوفِ نُهمِ ماه حرام
صف چکیب کرب و بلا دشتینه افرادِ ظلام
دوشدو دامِ خَطره دستِ جنایتده امام
اولمادی یاور اولان سیّدِ احرار الینه
.
آه او ساعت کی سراسیمه اولوب آلِ عبا
گوش افلاکی یاریب عربده‌یِ شمرِ دغا
هانی عبّاس دییردی اوزو چیخسین قاباغا
آلمیشام گلسین امان نامه او سردار الینه
.
نعرهیِ شمری ائشیتدی شهِ بی‌مثل و بدیل
چاغیریب سویله‌دی عبّاسه او سلطانِ جلیل
قیل ملاقات او دنی فطرتی گور وار نه دلیل
بو جسارتله سالیب فرصتِ گفتار الینه
.
ائتدی عبّاسی مکلّف او زمان امرِ امام
الی قوینوندا دل افسرده ائدیب ترک خیام
گلدی تلّ اوستونه سرعتله او وارسته مقام
شمرِ دون گوردو آلیب شوقیله تومار الینه
.
قیلدی فرمایش اَیا کینه روش هرزه روان
ندیر علّت کی اولوبسان بو سیاق نعره زنان
سسون ائتدی منی شرمنده سنی لال اولاسان
ندیر آیا هدفون وئر سوزو اقرار الینه
.
دئدی ای طایفه‌یِ هاشمیانین قَمری
شیرزن بیر آنانین شیرِ دلاور ثمری
چوخدو باشدا بو حسین ابن علی‌نین خَطری
یاخاسی دوشمه لیدیر لشگرِ غدّار الینه
.
سالما گردابِ بلایه بو سهی قامتیوی
صحنه‌یِ رزمیده سیندیرما گوزل قیمتیوی
گئت حسینیله بو گون خاتمه وئر اُلفَتیوی
ارزشی یوخدو داخی اولما طرفدار الینه
.
یوخ حُسینده وئره بیر منصبِ زیبنده سنه
بیزده واردور ولی عنوان برازنده سنه
صدقیله‌ن خدمتِ شایان ائدرم منده سنه
نفسیوون شامل اولار نعمتِ سرشار الینه
.
گوردو عبّاس ائدیر شمرِ دغا هرزه مقال
ائتدی فرمایش اونا ائیلمه بیهوده خیال
زرخرید اولماز علی اوغلو عمر سعده محال
وئرمز هئچ دوز سود امن دینینی دینار الینه
.
بئله فیکر ائیلمه من سیم و زره مُشترییم
آقامون سفرۀ جودینده نمک‌پرورییم
شاهِ عالَمدی حسین منده اونون نوکرییم
اولسا مین جانیم اگر ائیلر‌م ایثار الینه
.
شمری سالدی یولا عبّاسین او کوبَنده سوزو
الی قوینوندا حسین خیمه‌سینه گلدی اوزو
باخدی مولاسی حُسینین یوزونه دولدو گوزو
وئردی چوخ شرمیله جریانید‌ن آمار الینه
.
یوز دوتوب سویلدی عبّاسه رئیسِ شُهدا
بیلیر‌م نامه گتیرمیشدی سنه شمرِ دغا
ایسته قارداشلارووی گئتمه لیسن تئز گئت اخا
سالمارام من سنین افکاریوی اجبار الینه
.
ای چمنزارِ مواساتیده زیبا گلِ یاس
عبدِ صالح لقبون طالبِ حق، اشجعِ ناس
قالما تردیدیده گئتسون یول آچیقدیر عبّاس
ال دوتار قارداشیوون خالقِ دادار الینه
.
من بو صحراده گرَک نیّت و مقصوده چاتام
دینیمه خدمت ائدیب عزّتیمی باشدان آتام
ساخلایام حُرمتِ قرآنیمی آلقانه باتام
قالما گئت سالما سن اوز جانیوی اشرار الینه
.
رغبتون یوخدو اگر اولما گرفتارِ بلا
منه حامیدی بو نهضتده اوزو ذاتِ خدا
گره‌ک اولسون بو حسین دینه گوره تشنه فدا
یار اولا حق دیه نین قادرِ قهّار الینه
.
وئریب امضا بو حسین یومِ ازل ذوالمننه
گَرَ‌ک آخسین قانی دین اوسته یو دشت و دمنه
کمگیم اولماسادا سود امریم بسدی منه
وئرَّ‌م اوز غنچه می قرآنه گوره خار الینه
.
ائتدی عبّاسی بو تکلیفی امامین نگران
ال آتیب دوتدو حسینون اتگین ناله‌کُنان
دئدی سن بیل کَرمون قووما منی بو قاپودان
دستِ رد وورما آقا نوکرِ دربار الینه
.
اوگی‌ام گرچه سنه دوتموشام احسان اتگین
وئرمر‌م عالمه من فاطمه‌نین دوز چور‌گین
سن بیل اکبر جانی سیندیرما ابالفضل اور‌گین
آقالیق ایله کَرم قیل بو علمدار الینه
.
دئمیر‌م سن کیمی من فاطمه دُردانه‌سییم
باده‌یِ وحدتِ حقّین ولی مستانه‌سییم
شمعِ حُسنون یانا هر بزمیده پروانه‌سییم
قوی یانیم تا گله عشقیم اوزو معیار الینه
.
لطفیوی کسمه مُصیبت شَررین سالما دیله
بادِ مُحنت، چمنِ عشقیمه قویما اسیله
گرک عبّاس بو چولده سنه قربان کسیله
هر گورن سویلیه اَحسن بو فداکار الینه
.
خدمتونده او زماندان کی واریم شورِ خطر
عاصی‌ام خالقه، بو خدمتی ترک ائتسم اگر
ساتمارام من سنی دنیا دولو گوهر وئره لر
بو خیانتدی آتام حیدر‌ِ کرّار الینه
.
اذن وئر منده قاباقوندا مواسات ائله‌ییم
صبحِ وصله یئتیشیم، حقّه مناجات ائله‌ییم
ایکی قول بیر گوزولن عهدیمی اثبات ائله‌ییم
گرک عشق اهلی فداکار اولا دلدار الینه
.
شورِ عبّاسی گوروب شوره گلیب میرِ حجاز
شاکرِ خالق اولوب باشلادی تئز راز و نیاز
او کَرم اللرینی قبلیه قالخیزدی بیرآز
دئدی عبّاسیمین الله اوزون اول یار الینه
.
غالب اولموشدو او وحشتلی چوله ظلمتِ شب
بئله فکر ائتدی حَرملر کی گئدیر ماهِ عرب
اُسَرادن اوجالیب ناله‌یِ زینب زینب
آلدی یورقون بالالار زلفِ سمن وار الینه
.
بیری سویلردی اگر ترک ائلسه بو حَرمی
بابامون قلبیده افزون اولاجاق درد و غمی
دوشه‌جک الد‌ن اله نصرُ مِن الله عَلمی
قالماز امداد ائلیین سَروَرِ ابرار الینه
.
بیری سویلَردی کی گئتمز سوزومه واردی یقین
سود وئریب عشق حسینیله اونا امّ‌بنین
اللرین وئرسه‌ده وئرمز قوشونا بیعت الین
سالماز اوز عصمتینی لشگرِ جبّار الینه
.
بیری سویلردی گئدیب صدقیله دوتسام اتگین
آغلیوب آغلادارام رحمه گتیرَّ‌م اور‌گین
آتارام مقدمینه تازه عروسین لچگین
سوزومو سالماز او غیرتلیدی انکار الینه
.
هر قیزین آهِ دلیند‌ن گویه قالخاردی شَرر
تشنه‌لر چاره یولون ائیلدیلر زیر و زبر
هره اوز بیلدیگی قدری ائدیب اظهارِ نظر
ایش قالیب سویلدیلر خالقِ ستّار الینه
.
دئدیلر تئز یغیشین عازم اولاق محضرینه
آچاغین زلفیمیزی مانع اولاق معبرینه
اتگیند‌ن یاپیشیب بوسه ووراق اللرینه
بلکه رحم ایلیه بو خورداجا قیزلار الینه
.
تشنه‌لر گلدی غَرض خیمه‌‌یِ سقّایه طرف
چیخدی فوراً قاباقا زادۀ سالارِ نجف
گوردو اطفال اور‌گیند‌ن اوجالیر آه و اَسف
شرمید‌ن جاری ائدیب گوزیاشی بسیار الینه
.
دیندیریب فوجِ اسیران غمین بیلدی سوزون
یاندی قلبی یانان اولدوزلارینین اوپدو یوزون
کسیلن اللریلن آغلیانین سیلدی گوزون
دئدی سالماز سیزی بو نوکروز اغیار الینه
.
آند اولا امّ بنینین سودینه زحمتینه
گوزو یوللاردا پریشان بالامون حُرمتینه
عالم ایستکلی باجیم زینبین حیثیتینه
وئرمر‌م بیر توکوزو مین بئله جرّار الینه
.
گرچه وار بذلِ حیات ائتمگه منده عجله
تلسیر ساقیِ نفسیم می‌نابِ اجله
ئولمیوب هر نه قدر زنده دی عبّاس هله
سیزی قویماز دوشه‌سیز ملّتِ خونخوار الینه
.
منه چوخ فخریدی کی خادم و دربانوز اولام
دولانام باشوزا هر ثانیه قربانوز اولام
گئجه‌نی گوندوزو مَخیَمده نگهبانوز اولام
سیزلرین قویمیام اعدا وئره آزار الینه
.
عمروم اولسا سیزیلن باشه یئتیرَّ‌م سوزومو
تشنه‌سیز سیزلره سقّا ائدرم من اوزومو
گئدیب آللام سو اگر وئرمه لی اولسا گوزومو
نهری جاری ائدرم طفلِ لبن‌خوار الینه
.
ائیلر‌م سینمی هر قدر بلا گلسه سپر
مشکی دولدوررام اوزون قوللاریمی وئرسم اگر
ایچمر‌م من سو اگر ایچمسه اوّل سودامر
آبِ حیوان یئتیشر غنچه‌یِ گلزار الینه
.
#امان_نامه
#وئردی_عفریت_فلک_فرصتی_اشرار_الینه
#سیفی_اردبیلی
#ترکی
.
#زبدةالاشعار
?: @nohe_torki
: @nohe_torki . بحری . باجی دور قاره گئیین قافله سالاریم ئولوب بوکولوبدور بئلیم عباس علمداریم ئولوب . . ایستدیم تا گتورم خیمه لره پیکرینی یادینه سالدی سکینه عطش و غملرینیبیشتر
نظر دهید