زبانحال سیدالشهدا (ع) در وداع آخر
.
.
ستار رزاقی تبریزی
.
.
گل ای وفالی باجیم ایلمه فغان گئدیرم
فراقه صبر ایله چوخ اولما باغریقان گئدیرم
.
گل ایلیوم سنه اظهار دلده کی سوزومی
یوخومدی فرصتیم ای حالیمه یانان گئدیرم
.
بو یولدا قیل ئوزوی هر بلایه آماده
توکّل ایله حقه اولما ناگران گئدیرم
.
بو سن بو کربوبلا غملری بو اهل حرم
بو قدر محنته مندن صورا دایان گئدیرم
.
وصال حضرت جانانه دل زبس تلسیر
اودور کی محضرینه الده نقد جان گئدیرم
.
بو گونده باغلادیقیم عهده ایتمیشم ایفا
منای عشقه اودور بیله شادمان گئدیرم
.
بیز اهل حقّیله دورموش برابر اهل مجاز
حقیقتی اولارا ویرماقا نشان گئدیرم
.
بابام رسول خدا دینون ایتماقا احیا
بو غربت ایچره ایدوب ترک خانمان گئدیرم
.
کمکلریم بو بیاباندا قانینه بویانوب
اولوبلا دینه فدا پیریله جوان گئدیرم
.
ایدوبله اوغلومی قارداشیمی بو چولده شهید
بو درد و محنت ایدوب قدّیمی کمان گئدیرم
.
بو بس دگول هله، از بس ووروبلا دل یاراسی
کی اشک چشمیم اولوبدور گوزومده قان گئدیرم
.
اسوبدی باد مخالف بو چولده گلشنیمه
صفاسینی آپاروب ایلیوب خزان گئدیرم
.
دریبله گللریمی اهل کین شقاوتیله
اولام او گللره جنّتده باغبان گئدیرم
.
سو یولارین بیزه سدّ ایلیوبدی اهل جفا
سمایه اوج ایدوری ناله و فغان گئدیرم
.
سوسوزدی اوچ گیجه گوندوزدی آل پیغمر
بو غصّه مندن آلوب طاقت و توان گئدیرم
.
ایدوب معاویه نون اوغلی ظلمده طغیان
اونون هویّتینی ایتماقا عیان گئدیرم
.
خدایه آند اولا هرگز باش اگمرم ظلمه
بونی گرکدی بوله قوم بد گمان گئدیرم
.
یزیده ،فاطمه نون اوغلی ایلمز بیعت
بو مطلبی دیورم تا بوله جهان گئدیرم
.
باش اگمز ائوزگیه هرگز جهاندا عبدالله
ولیک ویرماقا حقّ اوسته باش و جان گئدیرم
.
چاغیر بالالاریمی بیر به بیر وداع ایلیوم
او دلشکسته لره تا ایدوم بیان گئدیرم
.
کناره قویما گوزوندن بو اوچ یاشیندا قیزی
مباد اشگی گوزوندن اولا روان گئدیرم
.
سنی وکیل ایدورم اهلبیت اطهاره
بو نازنینلره اول یار مهربان گئدیرم
.
چکنده شامه سیزی ،اهل کین جفائیله
اول اهلبیتیمه چوللرده پاسبان گئدیرم
.
گتور آنام توخیان کوینگی گیوم زینب
او پیرهندی آنامدان منه نشان گئدیرم
.
بو شعره بانی محمّد حسین جاوید اولوب
کی ذکر ایدوب ، ایده عشّاقی باغریقان گئدیرم
.
بو غملی نوحه نی آغلار گوزیله رزّاقی
یازوب کی دلده سوزی قالمیه نهان گئدیرم
.
یازاندا نیّت ایدوبدور دوباره زائر اولوب
گورم کی محضر مولایه نوحه خوان گئدیرم
.
.
#وداع_حسینیه #حسینیه_وداع #حسینیه_ستار_رزاقی #ستار_رزاقی #ترکی #زبدةالاشعار
نظر دهید