وئردی نتیجه آل علینین درایتی #اربعین_محمد_هوشمند

#کوچ_شام – #اربعین
.
زبدة الاشعار
.
?: @nohe_torki
.
محمد هوشمند (مدهوش تبریزی)
.
وئردی نتیجه آل علینین درایتی
احیا ائدیب دی دینی حسینین شهادتی
.
گرچی اولوبلا بیر نئچه گون دشمنه اسیر
هر تک تکی اولوب شهدا قانیینه سفیر
.
صبر ائیلییب مصائبه آماله چاتدیلار
هر بیر مکاندا پرچم حقی اوجاتدیلار
.
مسکن ائدیب خرابه نی تا آل مصطفی
تاثیر ائدیب دی عالم امکانه ماجرا
.
شام اهلینه موثر اولوب وای حسین سسی
خلقی آییتدی زین العبادین خطابه سی
.
شام اهلی آز زاماندا اولوب مطلبه خبیر
آل پیمبری ائلییوبدور یزید اسیر
.
آل امیه نین اوزه چیخدی قساوتی
خلقه یئتیشدی کرب وبلانین حکایتی
.
اونلار کی فکر ائدیردیله باتدی حسین قانی
انسانلاری گوروبله اویاتدی حسین قانی
.
شامین فضاسین ائیله دی بر هم فغان سسی
لرزه سالیب دی کاخ یزیده اذان سسی
.
وئردی رقیه گوشه ویرانسراده جان
رسوا ائدیب یزیدی او مظلومۀ زمان
.
نفرین یزید و آل یزیده اولوب مزید
بحرانیدن قوتارماقا یول آختاروب یزید
.
گوردی بویوک خطرده اساس حکومتی
ناچار اولوبدی باشلادی آیری سیاستی
.
ابن زیاده لعنت ائدوبدی او بی حیا
ما لی و للحسین دئیوب ائتدی آه و وا
.
چوخ ساده فرض ائدیر دی او ملعون قضیه نی
بیلمیردی کی بو قان ییخار آل امیه نی
.
دیل آچدیلار مذمت اوچون تا که عام و خاص
تصمیم دوتدی تا اسرانی ائده خلاص
.
تا آل حیدرین گتیره قلبینی اله
قتل حسین ده گتیروب عذرینی دیله
.
دعوت ائدیب دی حضرت سجادی محضره
تا کربلا شهیدلرینه خونبها وئره
.
بو سوزله بیرده قلب لرین داغلیوب غرض
دنیاده وار مگر شهدا قانینه عوض
.
باخ بیر یزیده گور نه قدر ائیله دی ستم
قیمت بیلیر حسین قانینا درهم و درم
.
بیر قان که ذات حق اوقانا خونبها اولا
ایا روادی سیم و زر اولسون اونا بها
.
بیرده علی اکبره همتا گلر مگر
اوغلی اولن آنا غمینی کیم بولر مگر
.
داغلار آغریلیقی وئره له سکه طلا
هاردا رباب و لیلی بو امره اولار رضا
.
دعوت ائدیب امامی حضوره او بد مرام
چوخ اعتذار ائدیب ائله دی چوخلی احترام
.
ایستیردی ظاهرا یئتیره حُسن نیتین
وعده وئریب امامه روا ائتسین حاجتین
.
بو حالیده امام یانیب توکدی گوزیاشین
اول ده ایسته دی شه دینین کسیک باشین
.
کرب و بلانی یاده سالیب قلبی اولدی قان
اول دم ایکنجی حاجتنی ائیلدی بیان
.
تشریح ائدیب دی لشگر ائده ن ظلم و محنتی
تا قئیته ره اوز اهلینه اموال غارتی
.
بیئرده بویوردی وار نظرین قتلیمه اگر
مامور ائله بو قافلیه بیر امین نفر
.
چوخ اینجیدیب گلنده بیزی شام و کوفیان
عزتّله تا مدینیه گئتسین بو کاروان
.
چوخ سوزلر اولدی رد و بدل حاصل کلام
آلدی اثاث غارتی اشراریدن امام
.
منظور اولوبدی زینب صدیقه ایسته گی
جان تک باسیب اورک باشینا قانلی کوینگی
.
اولدی اگرچی قلبلری غصه دن کباب
ودردی نتیجه مقصدینه چاتدی انقلاب
.
پر بسته قوشلاری قوتاریب رنج دامیدن
سرعتله عشق قافله سی چیخدی شامیدن
.
کوی وفاده خوشلادیلار آشنا یولون
شوقیله آختاریردی هامی کربلا یولون
.
بیر یول کی تا قیامته جک وار مسافری
بیر قبر کی زیارت ائدیر عرشی زاییری
.
بیر کاروان او قبره طرف شوقیلن گئدیر
بیر عده کی نفسلری آفاقه حکم ائدیر
.
بیر قافله کی حق دی ، هم حقه رهنما
قرخ گوندی گوز تیکیب یولونا خاک کربلا
.
نه کربلا کی مهر ولانین باتان یئری
یئتمیش ایکی یارالی لب عطشان یاتان یئری
.
بیر کربلا کی کعبه دن آرتیق صفاسی وار
عشق اهلینین او یئرده بیوک مقتداسی وار
.
بیر گلستاندی زینب اونون باغبانیدی
قرخ گون اولار کی قارداشینین نوحه خوانیدی
.
قرخ گوندی چوللری دولانیب زار و خسته دی
قرخ گوندی که عزالیدی قلبی شکسته دی
.
قرخ گوندی انتظار چکیر وصل یارینه
شرح ائیلسین اورک غمینی اوز نگارینه
.
یاد ائیلییور آنا بالاسین باجی قارداشین
هر کس انیس ائدیب اوزونه آه و گوزیاشین
.
گورسندی ناگهان گوزه صحرای نینوا
بی تاب ائدیب اورکلرینی شوق كربلا
.
هر کس کتاب محنتی بیرده وراقلادی
کئچمیش لری خیاله سالیب یاندی آغلادی
.
یاده دوشوب خیامه عدو ال آچان گونی
خردا اوشاقلارین تیکان اوسته قاچان گونی
.
یاده دوشوب سو اوسته سوسوز دوغرانان بدن
یوز دوتدولار فراته هامی دل دولی محن
.
آخ ای فرات، آخ ،نیه قانیله دولمادون
پیغمبرین بالالارینا قسمت اولمادین
.
آخدون فرات چوللره اود دوشدی دیللره
اوخ قسمت اولدی سو یئرینه تشنه اصغره
.
سقانی درد و محنته آکنده ائیلدون
سو قولی وئردی قیزلارا، شرمنده ائیلدون
.
گر چی سو صحبتی هامی دان سلب ائدوب توان
اما ربابین ائیله دی قلبین دوباره قان
.

گلدوقجا موجه سو، بالام ایوای دئیوب رباب
سالدی خیاله اصغری لایلای دئیوب رباب
.
اطرافه باخدی حسرتیله دیلده آه و وا
سسلندی هارداسان گل علی گلمیشم بالا
.
آختاردی تاپدی هر کس او ماواده دلبرین
ابر بهار تک هامی دولدوردی گوزلرین
.
هجران غمی یئتیشدی باشا وصله چاتدیلار
اندوه ودرد و محنتی یاتدان چیخارتدیلار
.
گرد ملال و محنته بیئرده بوروندولر
شاه شهید قبرینه ساری سوورندولر
.
بیر یولدا عشق روح و روان وئردی زینبه
کرب و بلا هواسی توان وئردی زینبه
.
چکمیشدی قارداش حسرتینی قرخ گونی مدام
ششگوشه قبره داغلی اورکدن وئریب سلام
.
آرامین آلدی قارداشینین تشنه اولمگی
قبر اوسته سالدی دیلده فغان قانلی كوینگی
.
شوق وصال آلدی اوركلردن اختیار
گویا بهار فصلی ائدیر بلبل آه و زار
.
ابر بهار تک هاموسی دولدوروب گوزون
گتدی دیله اورکده اولان آیریلیق سوزون
.
دولدوردی گوزلرین خانیم اشک ملالیله
قارداشه بیر سلام ائلییوب خسته حالیله
.
بو آلتی گوشه قبریوه یوروقون جانیم فدا
دور بیرایاقه زینبی پیشواز ائله اخا
.
دور قبرین اوسته بیر سوری آهو گتیرمیشم
یاتما فراتیدن سنه من سو گتیرموشم
.
گتدیم مزارون اوستنه یورقون بالالارین
قارداش بویور نه حال دادی الان یارالارین
.
من قتلگاه عشقیده سندن دویانمادیم
عفو ائت منی كی یاروه مرحم قویانمادیم
.
سندن صورا حسین دئمیرم چكمیشم نه لر
باخ گور نئجه قوجاتدی منی درد و غصه لر
.
شامین بلاسی چوخدی اخا شرح اولان دگیل
مین لر کتابه گر یازیلا قورتولان دگیل
.
غم گئچدی حدّیدن بالالار تاب ائدنمدی
قالدی رقیه شامیده قارداش گلنمدی
.
ئولدی بالام جنازه سینه تاپمادیم كفن
اوز گوینگیله دفن ائیله دیم محنتیله من
.
قولباغلی گئتمیشم ولی آزاده گلمیشم
اما رقیه دن ساری شرمنده گلمیشم
.
شامل ائدیب دی لطفینی حق بو سفر منه
باش اگمدیم سنین کیمی هیچ یئرده دوشمنه
.
الله عنائت ائتدی منه بو سعادتی
بو من، بو اربعین ، بو مزارین زیارتی
.
قورتولمیاندی گرچی منیم درد و محنتیم
ایكاش بو مزارین اولا بیرده قسمتیم
.
باخدوقجا دیلده چشمه غم جوش ائدیر حسین
قبرین صفاسی عالمی #مدهوش ائدیر حسین
.
#ویردی_نتیجه_آل_علینین_درایتی
#محمد_هوشمند #مدهوش_تبریزی
#ترکی
.
#زبدةالاشعار
.
?: @nohe_torki