وارد اولدی قتلگاهه ناگهان قطار زینب #کوچ_کربلا_حقیر_خویی

کوچ از کربلا
.
.
مرحوم حقیر خویی
.
.
وارد اولدی قتلگاهه ناگهان قطار زینب
صبر و طاقتی گیدوبدور قالمادی قرار زینب
.
.
گوردی بیر غریبه گلشن رنگ رنگ گللر آچموش
زخم تازه دن شکوفه قامت صنوبر آچموش
بلبلان باغ بطحا قان ایچنده شهپر آچموش
جور خاریله پوزولموش رونق بهار زینب
.
.
سربسرفضای هامون قانیله اولوب گلستان
سرو قدلری یر اوزره هر طرف چو شاخ مرجان
پیکر شه حجازی آختاروردی زار گریان
مصرع شه شهیده تا دوشوب گذار زینب
.
.
گوردی نازنین بدنلرهر طرف چو ماه پاره
بی کفن دوشوبله بیسر چاکچاک پاره پاره
قان ایچینده بیر بدن وار پیکرینده چوخلی یاره
اول جنازیه دوشنده چشم اشکبار زینب
.
.
گوردی پیکر شریفی شمس مشرقینه بنزر
اعتدال قامتیله سرور زمینه بنزر
کثرت جراحتیندن قارداشی حسینه بنزر
حسرتیله درده گلدی قلب داغدار زینب
.
.
چشم زینب حزین تا جسم اول جنابه دوشدی
هوش باشیدن داغیلدی قلبی اضطرابه دوشدی
وا اخا دیوب یخیلدی غش ایدوب ترابه دوشدی
آلدی درد و غم هجومی الدن اختیار زینب
.
.
آچدی گوزلرین دوباره غشیدن چون هوشه گلدی
قانلی نعشینی حسینین گوردی قلبی جوشه گلدی
آرتدی شوری درد دلدن دمبدم خروشه گلدی
ناله همچو نی نوادن ایتدی آشکار زینب
.
.
عرض قیلدی ای برادر کیم سنی بو حاله سالدی
ظلمیله سنی بو چولده زینبین الیندن آلدی
قویدی یاری یاره حسرت حسرتی گوزینده قالدی
حشر تک قالور دالینجا چشم انتظار زینب
.
.
جسمیوی سالوبلا بی سر قان ایچینده پاره پاره
سایبان ایدیم بو زلفی قوی بو جسم زخمداره
سازش ایلمز اگر چه اشکیله بدنده یاره
یاندوروب اورک باشیندا آه پر شرار زینب
.
.
گرچه یاندوروب قویالّار یاره اوسته قاره مرهم
یاره اوستونه قویوبلار اهل کینه یاره مرهم
چوخ یارالیسن ساغالماز قوی سالوم دوباره مرهم
پاره پاره سینن اوسته زلف مشکبار زینب
.
.
یاتما ای عزیز زهرا نازیله بو قوملار اوسته
دور ایاقه گور عیالین شمر الینده دست بسته
باغلانوب قطاره گیتسون شامه زار و دل شکسته
شمر و خولی و سنانه گور اولوب دچار زینب
.
.
من بو سرزمینه گلدیم چوخ جلال و شوکتیله
تخت زرنگار ایچینده طمطراق و حشمتیله
ایمدی بیر سنیق کجاوه شمر دون عداوتیله
ساخلیوب نظرده اولسون محمله سوار زینب
.
.
گلدی تا جهانه زینب باتدی محنت و ملاله
حد صبریده «حقیرا» یتدی رتبۀ کماله
صبر عشق ابتلاسی گلمز عقله یا خیاله
ثبت و ضبطیله قوتولماز درد بی شمار زینب
.
.
#کوچ_کربلا_حقیر_خویی #ترکی #زبدةالاشعار