کوچ از کربلا
زبانحال حضرت زینب (س) با حضرت ابوالفضل (ع)
.
.
مرحوم میرزا محمدتقی ولادی (وافی تبریزی)
.
.
قافلم شامه گیدور قافله سالاریم اویان
زینبین دور یولا سال یاتما علمداریم اویان
.
.
گوره بلمزدین اولا زینبی بیر لحظه ملول
یا دل آزرده اولا لحظه ای اولاد رسول
ایمدی باغلوب نجه گور قول قولا بو قوم ظلول
رشتۀ ظلمه گیچوب ظلمیله قولّاریم اویان
.
.
باش گوتور بیرجه باجین زینبین احوالینی گور
شرر ظلمه یانان قارداشین اطفالینی گور
بوینی چگنینده قالان عابدیمین حالینی گور
گور نه احواله قالوب عابد بیماریم اویان
.
.
اولا مشگلدی بو غم گور نجه بی غسل و کفن
قوملار اوسته قالا بو یتمیش ایکی پاره بدن
اولمیا بونلارا بیر غسل ویروب دفن ایلین
خاک و خون ایچره قالوب پیکر انصاریم اویان
.
.
بیر طرفدن باخارام ضعف دل آرامین آلوب
بیر طرف حیرته بوینوندا کی زنجیری سالوب
باخ یالین ناقه ده گور اونی نه حاله قالوب
اونا باخدوخجا دوتوب اود بو دل زاریم اویان
.
.
نه یاتوبسان دور ایدور فوج الم قصد زوال
یولّانور قافلۀ غم اله دور بیرقین آل
بو سفر قورخولودور زینبیوی دور یولا سال
قویما دشمنلر اولا یار و نگهداریم اویان
.
.
سن منیم زحمتیمی چکماقا چوخ راغبیدین
هامی بیر یرده عزیز اولماقیما طالبیدون
بو اوزون یولّاری هر دمده منه راقبیدین
ایمدی یوخ بیر کس اولا مونس و غمخواریم اویان
.
.
گیدورم شامه ولی اوزگه بیر احوالیله من
درد و غمدن سارالان رنگ رخ و آلیله من
قرخا دین عورتیله بی پناه اطفالیله من
آه شبگیریم اولور زاد ره و یاریم اویان
.
.
بو اوزون یولّاری سن بیر سوزه لا سویلمدون
هامی بیر زحمتیمه صبر ایلیوب یوخ دیمدون
قونا بو صورته غم گردی قبول ایلمدون
ایمدی سنسیز سارالوب گور نجه رخساریم اویان
.
.
طاقت و صبریمی بیر یان بو قدرغملر آلوب
کسیلوب صبر و ثباتیم غم دردیم چوخالوب
نجه گور حسرت الیم ظلمیله قوینومدا قالوب
آتش آفاقه سالوب آه شرر باریم اویان
.
.
«وافیا» گوهر اشکیله گوزل سیر ایلدون
دل ویرانه وی بو اشکیله تعمیر ایلدون
یاخشی بو مطلعی سر دفتره تحریر ایلدون
قافلم شامه گیدور قافله سالاریم اویان
.
.
#کوچ_کربلا #وافی_تبریزی #ترکی #زبدةالاشعار
نظر دهید