ویرن بالا غمینه قلبده مکان ننه دی #فاطمیه_غفاری_زنجانی

راجع به مادر و گریز به حالات حضرت زهرا سلام الله علیها
..
..
..
..
غفاری زنجانی
..
..
..
..
ویرن بالا غمینه قلبده مکان ننه دی
بالا مشقّتینی جانینه آلان ننه دی
..
هامیا واضح و روشندی زحمتی طفلون
چکن او زحمت جانکاهی جان فشان ننه دی
..
هزار رأفتیله صود ویروب یوزوندن اُپن
محبّتیله اونا لای لای چالان ننه دی
..
حرام ایدن گیجه نون خواب نازینی ئوزونه
گیجه بالاسینه خاطر اویاق قالان ننه دی
..
دوتوب الین اونا یول گیتمگی ایدن تعلیم
بالا آتاندا قدم شاد اولوب باخان ننه دی
..
اگر یخلسا اونی قوزیوب نوازش ایدن
یوزون اُپوب چکن آغوشه مثل جان ننه دی
..
دیل اورگدن بالایا دیل آچان زمانینده
دانشدیروب دییَن هر کلمه سنده جان ننه دی
..
بویون فداسی اولوم سسلنن تهِ دلدن
بو صادقانه سوزی ایلین بیان ننه دی
..
مقام و مرتبه سین گل ایشیت پیمبردن
صداقتیله فصاحتله مدح اولان ننه دی
..
ایاقی آلتدادی جنّت آنالارین بویوروب
بو افتخاره چاتان جنّت آشیان ننه دی
..
« فَلا تَقُلْ لَهُما أُفٍّ » امر ایدوب قرآن (1)
بیری ضمیر هُمادن او مهربان ننه دی
..
قلم الیمده ویرور شرح بیر خانم ننه دن
ننه لرون گوزودور مفخر زنان ننه دی
..
جناب فاطمه دور من دییَن او محترمه
ستارگان درخشانه آسمان ننه دی
..
نجه ننه اونا قربان اولا هامی ننه لر
جهاندا دورت گل زیبایه باغبان ننه دی
..
نجه ننه حسنینیله زینبینه ننه
نجه ننه غمی دنیانی یاندوران ننه دی
..
شهادتینه نچه گون قالاندا زحمتیله
بالالارین داریان زلفنی یووان ننه دی
..
کنیزیله ایونون ایشلرین ایدن قسمت
کنیزیله ئوزونه فرق قویمیان ننه دی
..
نجه ننه آز اولوب عمری دهریده غمی چوخ
اورک دولی غمیله غصه مرگ اولان ننه دی
..
پیمبرین کفنی سولماموش مزارینده
جفای امتیله درگهی یانان ننه دی
..
قاپو دالیندا دفاع ولایت اوستونده
ستمله ظلمیله پهلولری سنان ننه دی
..
اسن سموم خزان عمرینون بهارینه
صفالی گل کیمی گلشنده تز سولان ننه دی
..
اولان بنفشه کیمی قمچی ضربه سیله قولی
جفای قنفذه بازولری نشان ننه دی
..
قبالۀ فدکی ظلم الیله پاره لنن
یوزونه ظلمله سیلی نشان سالان ننه دی
..
حقوقی غصب اولونان اولمیان هواداری
دوشن مشقّته دنیاده باغری قان ننه دی
..
بالالارین گوزی یاشلی قویان فراقینده
گجیله دفن اولونان قبره ناگران ننه دی
..
جهاندا قدری کیمی قبریده اولان مجهول
جوان گیدن آرادان، قبریده نهان ننه دی
..
فراقی دهریده «غفارینی» ایدن گریان
خیالی همدم اولان قلبه هر زمان ننه دی
..
..
..
..
(1) وَ قَضى رَبُّكَ أَلّا تَعْبُدُوا إِلّا إِيّاهُ وَ بِالْوالِدَيْنِ إِحْساناً إِمّا يَبْلُغَنَّ عِنْدَكَ الْكِبَرَ أَحَدُهُما أَوْ كِلاهُما فَلا تَقُلْ لَهُما أُفٍّ وَ لاتَنْهَرْهُما وَ قُلْ لَهُما قَوْلاً كَرِيماً – اسرا 23
..
..
..
..
#فاطمیه #غفاری_زنجانی #مادر #ختم_خوانی #ترکی #فاطمیه_شهادت #زبدةالاشعار