ورود ماه محرم
: @nohe_torki
.
#سبک_یارالی_جان_یارالی … 4 سبک
.
مرحوم تقایی اردبیلی
.
چون شب آخر ذیحجه صباح اولدی بیزه
قره مکروهیده اولسیدی مباح اولدی بیزه
.
.
اول ماه محرم چکیلوب عرشه قرا
ماسواده قورولوب شاه شهیدانه عزا
گیمیشوک قاره عزا صاحبی دور ذات خدا
بو عزا باعث غفران و فلاح اولدی بیزه
.
.
حجتی خصم بد اندیشه تمام ایلمگه
شوقیله پیروی راه امام ایلمگه
بر علیه ستم و ظلم قیام ایلمگه
آهیمیز گوزیاشیمیز سرد صلاح اولدی بیزه
.
.
اولدی دیوانه جماعت دئمه بازاره روان
گینوب قاره اولوبلار گنه ده اشک فشان
مدّعی محفل غمدن اوجالور عطر جنان
بزم ماتم بلی روضات ریاح اولدی بیزه
.
.
بیزی دشت عطشون دردی ائدوب پوزقون اساس
قورموشوق بیکفن اربابمیزه مجلس یاس
ضمن اینکه ائدروک درگه یزدانه سپاس
دیلده لبیک حسین ذکر رواح اولدی بیزه
.
.
بیز حسین درگهینی باب کرامت تانیرق
سانمیون محنت عاشورینی آسان سانیروق
شمع باشدان یانار اما بیز اورکدن یانیروق
شعله سیز عشق اودونا یانما صلاح اولدی بیزه
.
.
سونمیوب حشره کیمین سونمیه جک دل کوزوموز
دلبرون پاک آدی هر بزمیده اولموش سوزوموز
عالی سرمایه اولوب محشره آغلار گوزوموز
توکدی گوزیاشی یوزه چشم نجاح اولدی بیزه
.
.
او شهون بزم غمی اولدی بیزه دارالامان
گزوروک مجلس ماتمده اودور ناله کنان
بال و پرسیز قوشودوخ ایلروک ایندی طیران
یعنی فطرس کیمی شه لطفی جناح اولدی بیزه
.
.
آغلاروق زینبه که کوفه ده یاردی باشینی
نیزه باشینده مخاطب ایلدی قارداشینی
دئدی گور عترتوون قانه دونن گوزیاشینی
دشمنون دل یاراسی زخم رماح اولدی بیزه
.
.
سن که گتدون گجه نی خولی نامرده قوناق
اولدی غمدن حرم طاهره نون طاقتی طاق
یاندیروب قلبیمیزی آتش جانسوز فراق
شب هجران نه مصیبتله صباح اولدی بیزه
.
.
قد اهل حرمی محنت و غم ایلدی خم
قول قولا باغلادیلار قیزلارویی قوم ظُلَم
آیریلان وقتیده گودالیدن ای میر امم
روبرو پیکر صد چاک و شراح اولدی بیزه
.
.
اللی ایل ایلمیشم گوشه محنتده نوا
بو امیدیله توجه ائده لطفیله آقا
شاعریمدور بو “تقایی” دیه شاه شهدا
ایشی بیر عمر بونون صدقیله ناح اولدی بیزه
.
.
#ورود_محرم #تقایی_اردبیلی
#چون_شب_آخر_ذیحجه_صباح_اولدی_بیزه
#ترکی
.
#زبدةالاشعار
: @nohe_torki
نظر دهید