اربعین
.
.
مرحوم کهنموئی تبریزی
.
.
دور حسین ایتدیقیم سوداده چوخ سود ایلدیم
شامیده صد حیف اولا بیر درّی مفقود ایلدیم
.
.
گرچه ظاهرده پوزولدی دودمانیم شوکتیم
عالم باطنده هر لحظه اوجالدی رتبتیم
آرتدی اهل حق یانیندا اعتباریم عزتیم
باطل اهلین حق سوزیله محو و نابود ایلدیم
.
.
اوندا کی سن بو تجارتده شریک ایتدون منی
منده امضاء ایلدیم شوقیله شرکت نامه نی
جان و دلدن هر زمان آلدیم جفای دشمنی
آسمان صبری دل آهیله پر درد ایلدیم
.
.
اوندا کی پایانه یتدی کربلا هنگامه سی
زینبه خیاط غم بیچدی اسارت جامه سی
سعی ایدردیم باشه یتسون امتحان برنامه سی
ایستدیم توفیق حقدن شکر معبود ایلدیم
.
.
شکر لله یاخشی یتدیم دلده کی مقصودیمه
ویردیلر کافی متاع سرمایۀ محدودیمه
گورمدیم هرگز ضرر اولدی بو سودا سودیمه
عشق بازارین دولاندیم نقد موجود ایلدیم
.
.
قوی سنه قارداش ویریم بیلان شرکتدن خبر
شرکتین کیفیتین ذی سهم اولان بیلمز مگر
قولاریمدا تازیانه یرلریندن وار اثر
رشتۀ زنجیری قولدا دُرّ منضود ایلدیم
.
.
شامده ویرانه ده اکدیم نهال بارور
ایلسون دین سیز یزیدون قصرینی زیر وزبر
کربلا کیفیّتین عالملره ویرسون خبر
قبری اوسته آغلادیم قبرین گل آلود ایلدیم
.
.
شایقم دیداریوه بو سوز یقینون دورسنون
شامده دفن ایتدیقیم دُرّ ثمینون دورسنون
اربعین زوّاریوخ بیز اربعینون دورسنون
قبریوه گلدیم وفای عهد معهود ایلدیم
.
.
مجلسنده ایلدیم رسوا یزیدی شامده
گورمه موشدی بیله خفّت گردش ایّامده
مفتضح ایتدیم اونی انظار خاص و عامده
قلب لردن حُبّ بوسفیانی مطرود ایلدیم
.
.
وار دیردی لطف حق غالب اولان سلطانیده
بو سوزه شاهد گتوردی آیه ای قرآنیده
قویمادیم عزّ و شرافت آل بوسفیانیده
هر نه استدلال ایدوبدور منده مردود ایلدیم
.
.
( کهنموئی) اولما خالق رحمتیندن نا امید
ایله توبه تا قبول ایتسون خداوند مجید
بولموسن آیا ندن دنیاده اولدون رو سفید
نفسینه راه هوای نفسی مسدود ایلدیم
.
..
#اربعین #کهنمویی #ترکی #زبدةالاشعار
نظر دهید