کوچ از قتلگاه
.
✍️ زبدة الاشعار ✍️
?: @nohe_torki
.
مرحوم هندی تبریزی
.
چون قتلگاهدن دوزولوب شامه قافله
دوشدی حسین ایاقینه زینب گلوب دیله
.
قویمازلار آغلیوم سنه بیر آن دوروم گیدوم
تا گوز یاشیمله دردیمی بیر آندوروم دوروم گیدوم
.
باش قویماقا ایاقیمه صحرای عشقده
گوزلور یولومی خار مغیلان دوروم گیدوم
.
چون سن طریق عشقیده ترک سر ایتموسن
منده بو یولدا بی سرو سامان دوروم گیدوم
.
بو نحویلن که سیل کیمی گوز یاشیم آخار
قالسام دوتار بو عرصه نی طوفان دوروم گیدوم
.
کربوبلا ده هر نه بلا واردی چکمیشم
قالدی بلای کوفه ویران دوروم گیدوم
.
یوخ بیرزادیم الیمده برادر تالانمیشام
لابد گرک سنی قویوم عریان دوروم گیدوم
.
چوللرده قالدی السیز ایاقسیز اوشاقلارون
ایندی داغیلدی هر بیری بیریان دوروم گیدوم
.
چاره م کسیلدی یتمز الیم بیریره داخی
دفن ایتممیش سنی نجه بوردان دوروم گیدوم
.
چوخ ایستورم دوروب دولانام باشیوه سنون
باشسیز قالوب سکینه نالان دوروم گیدوم
.
از بس چکوبدی شعله یانان وقت خیمه لر
بیر پارچا اود دوتوب بو بیابان دوروم گیدوم
.
قارداش دوشوب یتیم لرون بیر یانار اودا
ممکن دگول او اوددان اوزوم یاندروم گیدوم
.
من بولمورم نه دیللریله اوخشیوم سنی
یا دردیمی ایدوم نجه پنهان دوروم گیدوم
.
قارداش یارالی جسمیوی من بیله بولمدیم
حالیم دولاندی اولدی پریشان دوروم گیدوم
.
من ایمدیکه یارالاریوی خشک ایدنمدیم
قوی باری گوز یاشی توکوب الان دوروم گیدوم
.
ایوای منه وروبلا باشون نیزه باشینه
بوباش دالینجا قوی گله هریان دوروم گیدوم
.
قوّت گلور بو قلبیمه گلدوقجا خوش سسون
باشون ایدور تلاوت قران دوروم گیدوم
.
گوندوز گرک گورم گیجه نون من تدارکین
گلدی زمان شام غریبان دوروم گیدوم
.
چون هر جنازه اوسته حسین یاندورالا شمع
منده چراغ آهیمی گوی یاندروم گیدوم
.
یاخشی دگول که چوخ اوتوروب دردسر ویرم
یاخش بودور کی تز گیده مهمان دوروم گیدوم
.
بلبل کیمی بو گل بدنوندن دونمورم
وار هاردا بیله صحن و گلستان دوروم گیدوم
.
فکریم بودور بو شهرده ، #هندی اوتورمیوم
یا کربلایه یا که خراسان دوروم گیدوم
.
.
#کوچ_کربلا
#چون_قتلگاهدن_دوزولوب_شامه_قافله
#قویمازلار_آغلیوم_سنه_بیر_آن_دوروم_گیدوم
#هندی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید