چک ابر زلفی نیز ده یوزدن کنار علی #راه_شام_بهار_تبریزی

زبانحال حضرت سکینه (س) در راه شام به سر برادرش
.
.
مرحوم تقوی (بهار تبریزی)
.
.
چک ابر زلفی نیز ده یوزدن کنار علی
ماه چهارده شبی قیل آشکار على
.
خم خم دوشوبدی زلف سیاهون عذاریوه
گویا دوتوبدی گون یوزون ابر بهار علی
.
آق یوز قرا تلون علی بو قرمزی قانون
نوک جدا اولوبدی عجب لاله زار علی
.
زلفون ایدوبدی گوگلیمی تار تلیندہ بند
هر یانه چکسه منده سورونّم اوتار علی
.
بوندان زیاده سندن اوتور درد و غم چکم
جانبله ایلرم نه قدر افتخار علی
.
ای یوسف زمانه زلیخا کیمی دوشوب
آردینجا شوریله ایدرم آه و زار علی
.
بلسم زمانه ده نقدر من بلاکشم
بو درد و غمده یوخ منه بیر غمگسار علی
.
هیچ کیم دچار اولمادی من تک مصیبته
سنّ صغیریده که من اولدوم دچار علی
.
صبحیم، گیجم، گونوم، گونوزوم، وقت و ساعتیم
سنسیز اولوب منه هاموسی تیره تار علی
.
ظلمیله باغلانوبدی طنابیله قولّاریم
چون دستگیر روم و فرنگ و تتار علی
.
یوللار اوزاق گون ایسی پیاده ایاق یالین
گلّم زبس ایاقیم اولوبدی قبار علی
.
بسدور بوحال زاریمه باخ رحم قیل منه
لطفیله بیرده بیرمنی دیندیر قوتار علی
.
یالوارّام ایسترم که آلام باشوی اؤپم
ویرمز منه عنادیله بو نیزه دار علی
.
بو گونلری گورونجه ئولیدیم ازلدہ کاش
یاخشی گونه سالوبدی منی روزگار علی
.
سنسیز دولانسون اولسون على تیز گوروم داخی
بو چرخ کجمدار و فلک تارمار علی
.
بحر گناهه غرقیدی «تَقوی» نجات ویر
شرح غم و مصیبتوی چوخ یازار علی
.
.
#راه_شام #بهار_تبریزی #ترکی #زبدةالاشعار #اکبریه_شهادت