کوچ از کربلا
.
✍️ زبدة الاشعار ✍️
?: @nohe_torki
.
مرحوم صافی تبریزی
.
کاروان کوفیه یولاندی امان قارداش اویان
زینبون قولاری باغلاندی امان قارداش اویان
.
قافلم گورنه دوشوب نظم و نظامه گیدیرم
باشمون محنتی یتموبدی تمامه گیدیرم
گورموشم کرب و بلا ظلمنی شامه گیدیرم
گیدیسن دور گیداق ای شاه جهان قارداش اویان
.
ایله سندن صورا یالقوزلادی غم زینبوی
تانیماز بیرده گورن قامتی خم زینبوی
دوتدی صیاد قضا صید حرم زینبوی
دام اوستونده ایدوب باغریمی قان قارداش اویان
.
بیر دویونجه سنه من آغلاماقا قویمادیلار
نعشین اوستونده جگر داغلاماقا قویمادیلار
جان ویرنده گوزیوی باغلاماقا قویمادیلار
نجه بی رحمیدی گور شمر و سنان قارداش اویان
.
قان اولوب گوزدن آخار سیل سرشکیم یوزیمه
بو نه حالتدی سالوبلار سنی، تپراق گوزیمه
اوزی شاهددی خداوند منیم بو سوزیمه
که ئولوم خوشدی بو وقتیمده اینان قارداش اویان
.
چوخالوب درد و غم و محنت و اندوه و ملال
یوخدی فرصت که آچا طوطی نطقیم پر و بال
شامه عازمدیله بو بی کس عیالون، یولا سال
دور مسافر دالسینجه ویر اذان قارداش اویان
.
جانیمی لرزه دوتوب بس که آغردور بو سفر
هم اوزون گل همی ویر قارداشیم عباسه خبر
علمین آلسون اله باجیلاری شامه گیدر
ایلسون شیر خدا سهمین عیان قارداش اویان
.
سنه باخدوقجه دگر اود بو دل و جانه یانار
نجه که شمع اودینا شوقیله پروانه یانار
ایتمیسن لیلنی مجنون کیمی دیوانه یانار
هم سکینون یتیرور عرشه فغان قارداش اویان
.
گورورم گونلر او گوندز قالوب عریان بدنون
نه سنون دفن ایدنون وار نه برادر کفنون
نولدی بس کل باشیمه مندن آلان پیرهنون
بو سویولماقیوه گلمزدی گمان قارداش اویان
.
او قدر عشقیده سن طی مراحل ایلدون
که دالونجه گلن عاشقلری کامل ایلدون
اوز مبارک آدیوی زیب محافل ایلدون
بیر حسین ذکریدی، بیر کون و مکان قارداش اویان
.
زینبم منده آنام اوغلی کشیده قدیمی
اگمیشم بار غم آتدا بیر امیده قدیمی
آپارام یثربه بسدور بو خمیده قدیمی
شامدن تربت زهرایه نشان قارداش اویان
.
#صافیا شرح ایله یاز هر نه مقرردی سنه
عالم بدویده بو رشته مقدردی سنه
شاه بیتون اوزی بیر ذکر مکرردی سنه
کاروان کوفیه یولاندی امان قارداش اویان
.
#کوچ_کربلا
#کاروان_کوفیه_یولاندی_امان_قارداش_اویان
#صافی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید