کوچ از کربلا
زبانحال حضرت زینب سلام الله علیها
.
.
عندلیب تبریزی
.
.
دور ای شهید دیار بلا حسین قارداش
دولوب نوائیله بو نینوا حسین قارداش
.
.
نه تئز خزانه دونوبدور بهاریمیز یارالی
گیدوری کوفه و شامه قطاریمیز یارالی
.
.
بیله خیال ایلمه وصلیوه دویوب گیدیرم
بو چولده رخت وفانی حسین سویوب گیدیرم
باجوندان اینجیمه که تک سنی قویوب گیدیرم
دیار شامه منی جور شامیان آپارور
ایدیب اسیر منی شمریله سنان آپارور
.
.
بو کربلایه گلن گون جلالتیم واریدی
حضور اقدسیوه عرض حاجتیم واریدی
آغارمامشدی باشیم قد و قامتیم واریدی
بو چولدن ایندی ولی شامه باغریقان گیدیرم
باشیم آغاردی اولوب قامتیم کمان گیدیرم
.
.
سن ای شقایق سرخ شهادت ازلی
سن ای مجاهد جان بر کف حریم علی
کسیلدی ورمدون اما یزیده بیعت الی
سنون مرامیوه ای سر به دار کشور جان
مورخان تواریخ قالدیلار حیران
.
.
بو محنتون یارالی درد اولار ئولونجه منه
اورکده ساخلامیشام قبریده دییم ننمه
ساغالمیان یارالار وردولار بو چولده سنه
سنین کیمی آتیا نوجوان داغی بسیدور
بو کوفه اهلی عجب بی حیا و ناکسیدور
.
.
دونن گلنده سنون یانیوا یاران چوخودی
سنی حصاره سالان نیزه و خدنگ اوخودی
باجون ئوله بو قدر قتلگهده داش یوخودی
بو داشلاری بو بیابانه هانسی ال یتیریب
یقین بو داشلاری شام اهلی شامیدن گتیروب
.
.
دونن وداع ائلییوب آیریلاندا سن مندن
گوزومله روحیمی گوردوم که آیرولور تندن
سنی سوسوز یولا سالدیم خجالتم سندن
ایاقه دور سنی ایندی مرامیوه یتیریم
سو میلون اولسا گیدیم نهر علقمه گتیریم
.
.
عجب بلالره دوشدون بلالی قارداشیم
آدی ازلدن اولان کربلالی قارداشیم
گجه گونوز دییرم وای یارالی قارداشیم
ئوزومی غرق ایلرم محنتینده گوز یاشیما
نقدری عمروم اولا قویمارام حنا باشیما
.
.
دونن بو چولده اروج دوتدون ای شه عطشان
یارالی جانیم اولا خسته جانیوه قربان
گونون باتان چاقی خیمه سراده وقت اذان
ایله داریخدیم عزیزیم توکوب ئوزه قانیاش
یولووی گوزلدیم افطاره گلمدون قارداش
.
دونن گونوز وروب اوت خیمه گاهه لشکر شام
همان او اوتدا باجون ئولسون ایندیده یانورام
حرملرین هامی غارتده قورخوشوبلا تمام
آلوبلار دورمی مقتلده جمله دیده سی تر
دگوله عمه گیداق ایندی ساربان یتیشر
.
.
گچن گجه أو چوخور یرده غریقیدون قانیوا
خیمده فکریوی ایلیردیم آند اولا جانیوا
منی اوزاخدا گوروب ساربان گلوب یانیوا
باجوی عف ایله غم صرصری اسیلمیشدی
گلونجه مقتله من اللرون کسیلمیشدی
.
.
بو #عندلیبی گینه تلخکام ایدیب هجران
ئولوب ملالیله غربتده #حافظ_قرآن
دیوله فکر ایلمه ئولدی چوخدی نوحه یازان
ولی تانور زری هر کیم حذیق زرگر اولا
محال #حافظی تک شعریده سخنور اولا
.
.
#کوچ_کربلا
#دور_ای_شهید_دیار_بلا_حسین_قارداش
#عندلیب_تبریزی
#ترکی
#زبدةالاشعار
نظر دهید