کربلاده شیعه لرکه شاه دین مهمانیدی #حسینیه_راجی_تبریزی

مصائب کربلا
گریز به شهادت امام حسین (ع)
.
✍️ #زبدةالاشعار ✍️
.
🆔: @nohe_torki
.
مرحوم راجی تبریزی
.
کربلاده شیعه لرکه شاه دین مهمانیدی
بس نچون هم اهلبیتی هم اوزی عطشانیدی
.
.
فاطمه مَهریدی اول نهر عالمه معلومدور
بس ندن اولادی ارث مَهریدن محروم دور
تولیت وارثده اولماق لازم و ملزومدور
نه یولیلن بس تصاحب ایلین عدوانیدی
.
.
شرع پیغمبر ده ویرمزلر مگر مهمانه سو
یا دَگل واجب گرک ویرسونله هر قربانه سو
اهل کوفه ویرمیوب امّا شه عطشانه سو
او همی مهمان همی قربان همی عطشانیدی
.
.
ایلمیشدی شرع انورده نبیّ  ذوالکرام
امّته ماه محرّم جنگ و دعوانی حرام
بس دَگلدی امّت پیغمبر اول اهل ظلام
یاحسین مستوجب بو ظلم بی پایانیدی
.
.
اهل کوفه ترک عار و غیرت و ننگ ایدیلر
آخر ارضُ اللهی آل الُلهَه تنگ ایدیلر
اتّفاق ایلوب حسینیله او گون جنگ ایدیلر
شیعه لر آیا بو  شرط حرمت مهمانیدی
.
.
کربلایه گتدیله مین عهدله مهمان اونی
باغلیوب میثاق ایتسون پیشوا عدوان اونی
سندیروب پیمانی قانه ایدیلر غلطان اونی
بو نجه عهد و نجه میثاق و نه پیمانیدی
.
.
عرصۀ کرب و بلاده قالدی تنها شاه دین
آلدیلار اطرافین اهل کوفه مانند نگین
رحم و انصاف ایتمیوب هردم ویراردی اهل کین
هر طرفدن تیریدی شمشیریدی پیکانیدی
.
.
نقل ایدر راوی حسینی ایدیلر چونکه شهید
غارته یوز قویدولار قرخ مین نفر قوم یزید
خیمه و خرگاهه اود ویردی عُمَرسَعد پلید
اهلبیت ایچره صدای شیون و افغانیدی
.
.
کربلا دشتینده ظاهر اولدی بیر شور عظیم
گتدی یغمایه لباس و زینت اهل حریم
خیمه گهدن اوندا گوردوم چیخدی بیر طفل یتیم
یوز قویوب آهو کیمی صحرایه سرگردانیدی
.
.
راوی سویلر خیمه گاهه ایلدیم بیرده نگاه
آتش ظلمیله گوردوم اود دوتوب دور خیمه گاه
بیر اوزون بویلی نجیبه  قدّی مثل مدّ آه
دمبدم پروانه تک اول آتشه سوزانیدی
.
.
گوردوم اول مظلومه نی مبهوت قالدیم حالنه
اوز اوزیمه سویلدیم باخدوقجا من احوالنه
گور بو عورت بیرنه چوخ طالبدی دنیا مالنه
بو کشاکشده خرد واله گوگل حیرانیدی
.
.
بیرده گوردوم من همان عورت دل رنجورلن
آتشه گیردی سمندر وار بیر منظورلن
بیر جه بیماری باسوب آغوشه گوردوم شوریلن
خیمه دن چخدی گهی اُفتان گهی خیزانیدی
.
.
بار اِلها ایله حضّاره عطا اجر جزیل
بو حسین عاشقلرین محشرگونی قویما ذلیل
سالماسیدی بو کمنده گر اوزون «راجی» دخیل
 بو قدر جرم و گنهله دردی بیدرمانیدی
.
.
.
.
.
#حسینیه_راجی_تبریزی
#خسینیه_شهادت  
#کربلاده_شیعه_لر_که_شاه_دین_مهمانیدی   
#ترکی
.
✍️ #زبدةالاشعار ✍️
.
🆔: @nohe_torki