کربلاده چون اوخوندی شرح طومار بلا #قاسمیه_سعدی_زمان

حالات حضرت قاسم علیه السلام
.
.
مرحوم حسینی سعدی زمان
.
.
کربلاده چون اوخوندی شرح طومار بلا
هر کس اوز برنامه سین اجرایه قویدی بر ملا
.
ایتدی ایفایِ وظیفه یکسر اصحاب حسین
قوچ قوزی قربانی ایتدی کربلا دشتین منا
.
دولدوروبدور ساقیِ محنت بلا پیمانه سین
ویردی عشّاق بلایه، اولدولار مست بلا
.
دورِ ساقیده یِتیشدی نوبت آل هاشمه
ایچدی اوّل اکبر اول ساغردن، ایتدی جان فدا
.
جور و بیداد مخالفدن عراقه دوشدی شور
ایتدی ناله عالم معناده روحِ انبیاء
.
چَکدیلر ناله حجازیلر شکسته قلبیدن
سر به سر دولدی نوائیله دیار نینوا
.
ساقی جانانیدن بیر ساغر سرشار آلوب
باشینه لاجرعه چکدی قاسمِ مستِ وفا
.
گَلدی دربار همایونیدن آلدی اذن جنگ
ایلدی عطفِ عنان میدانه پورِ محتبی
.
مجلسینین قولیدور بو مطلب، عاشورا گونی
یتمه میشدی سنّیده حدّ بلوغه بو بالا
.
بیر رشادت گوستَروب امّا که دوشدی حیرته
ضربِ شصتیندن او صحراده سپاه اشقیا
.
ابن سعدین پرچمین فکر ایتدی ایتسون سرنگون
آشکارادور بو سوز لشکر سینار یاتسا لِوا
.
گوردی سعد اوغلی یاخوندور لشکر اولسون مُنهَزِم
امر ایدوب ایتدی مُنادیلر بو نوعیله ندا
.
دورمیون بو خارجی اوغلین جماعت اُلدورون
گیتسون آز قالدی بو گون سعییم بو صحراده هوا
.
اوخ آتانلار، داش وورانلار، ایتدیلر بیردن هجوم
ووردولار دورت بیر طرفدن یاره اوستوندن یارا
.
بو کمکسیز، تک، سوسوز، یالقوز، اولار قرخ مین نفر
بو خبرده اهل فضل آنلار که وار نه مبتدا
.
پهلوانلار رسمیدور دعوا گونی جوشن گِیَر
اولماسون تا کارگر، اوخ، نیزه هنگاه وَغا
.
قاسمین امّا بو دعواه یوخیدی جوشنی
گَلدی هر اوخ جسمینه دَگدی پر آچدی چون هُما
.
عاقبت شهزادیه بیر یاره ووردی بیر شقی
طاقتین طاق ایلدی، قان آخدی، سست اولدی قوا
.
من دیمم نولدی دلیمده یوخدی طاقت شرحینه
مجتبادن ایلورم شرح ایتماقا شرم و حیا
.
بو قَدَر عین عبارتدور فَشَقَّت بَطنُهُ
قاسمه نیتدی، اوزون فکر ایله اول خونین جِدا
.
مرکب اوستونده دورا شهزاده مقدور اولمادی
بُلمورم امّا نه نحویله یخلدی توپراقا
.
مَه یوزی قانیله اولموشدی اَزَلده مُنخَسَف
قانلی توپراقه یخلدی تازه دن اول مَه لَقا
.
خیمیه یوز دوندروب سَسلندی گَل داده عمو
یخدیلار آتدان منی توپراقلارا اهل جفا
.
گَل عمو، فریاده گَل، جلّاده اَلینده قالموشام
من یتیمم یوخ آتام ای تاجدار اَتقیا
.
خیمه ده قاسم سَسین آلدی عزیز فاطمه
رزمگاهه قویدی یوز فرماندهِ امرِ قضا
.
ذوالفقار اَلده علی اوغلی آجیقلی شیرتک
لشکری یاردی، وورور گویا قلج شیر خدا
.
گَلدی تاپدی قاسمین گُل تک داغلمیش پیکرین
گوردی امّا باشی اوسته بیر لعینِ بی حیا
.
خنجر اَلده قاسمین ایستور آیرسون باشینی
مرتضی اوغلی حواله ایتدی بیر شمشیر اونا
.
دوتدی کِتفیندن، قولی قطع اولدی امّا دوشمَدی
قاچدی قاتل لشکر اشراره قیلدی اِلتجا
.
اوینادی صف لر یِریندن، آلدی شاهین دوره سین
جوش ایدوب دریایِ قهرِ خالقِ ارض و سما
.
قهر اَلین آچدی یدالله اوغلی عزم جنگیله
باشلانوب بیر جنگِ مغلوبه که صبح اولدی مَسا
.
پرده پرده قوزانوب یردن گویه گرد و غبار
چهرِ خورشیده چَکیلدی پرده، تار اولدی هوا
.
آه یَابن العسکری عذر ایستورم بو عرضیمه
هاردا بو دعوا اولوب، منجرّ اولوبدور ایش هارا
.
قاسمین آتلار اَیاقینده قالوب گُل پیکری
شرحینه بیگانه لر آغلار، نه یالقوز آشنا
.
لشکر کوفه داغیلدی کَا الجَرادِ المُنتَشَر
ایتدی بیر سس استماع اول دَم امامِ ماسِوا
.
سس نجه بیر سس، او سس آرام آلور، دل پارچالور
بی نهایت دل خراش و دل نشیندور بو صدا
.
اتّصالاً سسلوری یا عمّ اَدرِکنی، تَعال
جانیم ای جانِ جهان ایستور اولا تندن جدا
.
گَل عمو آتلار اَیاقی آتدا اولدوم پایمال
یا اَمانَ الخَلقِ اَلغَوث، اَلاَمان و اَلوِها
.
سس مگر ویرمزله استمداد ایدنده بیر یتیم؟
من یتیمم، سن بو گون اَیتامه عالمده آتا
.
شاه دریا دلدن آلدی بو صدا آرامِ دل
کهربا آسا سارالدی رنگِ سبطِ مصطفی
.
قولّاری سست اولدی، دعوادن او سرور چَکدی اَل
قویدی شمشیرین غلافه یادگارِ مرتضی
.
قاسمین گَلدی باشی اوسته پریشان حالیله
گوردی گه شهزاده وا اُمّا دیور، گه وا اَبا
.
باخدی بیر حسرت گوزیله اول داغیلمیش پیکره
گوردی ترکیبین پوزوبلار، جسمیدن وار بیر نَما
.
نه سلامتدور باشی نه سینه سی، گُلشن سولوب
بیر طَبَق گُلدور سَپوبلر رزمگاهه گوئیا
.
اَندی مرکبدن باشین آلدی دیزی اوسته امام
گوزلریندن قانی سیلدی دلده داد و آه و وا
.
سسلدی چوخ یأسیله امید عالم قاسمی
گوردی سس گلمور پوزولدی حالت غوث الوَری
.
ائتدی فرمایش چتیندور بو غریب و بی کسه
قارداشیم اوغلی بُلَه من بی پناهی ملتَجا
.
ئوز شکاری اوستونه عزم ایلین شهباز تک
فکر نصرتله گله میدانه بو بی اقربا
.
ائتیمه نصرت و یا کیم ویرمیه نصرت ثمر
چکدیقی زحمت اولا بو چولده منثور و هَبا
.
یادگار مجتبی از گوزلریم نوری اوغول
آچ گوزون ای جانشین اکبر گلگون قبا
.
قلبیمی یاندیرما چوخ اوغلوم ئولوب ویر سس منه
قویما اوج ائتسون گویه نالَم جوان دلربا
.
سن یارالی توپراق اوستی ایستی گون سوز عطش
جای آسایش دگول صد پاره اعضایه هُنا
.
دور گیداق عمَّن ، آنان ، گورسون دویونجا اوخشاسون
آغلاسون اولاد پیغمبر سنه دوتسون عزا
.
آغلادی قلبین بوشاتدی ، گوتدی باسدی باغرینا
قارداشی اوغلون ، او سبط پادشاه اصفیا
.
بیر گلستان گول کیمی صد چاک اولان اعضاسینی
مَخیَمه گَتدی شهنشاه سریر ارتضا
.
نه بدن نه نوعیله حمل ائتدی خرگاهه امام
ای « حسینی » یازما واضح ، قوی بو سوز گیزلین قالا
.
.

#قاسمیه #سعدی_زمان #قاسمیه_شهادت #ترکی
#کربلاده_چون_اوخوندی_شرح_طومار_بلا
#آثارالحسینی1 #زبدةالاشعار