حالات وداع (سوال و جواب)
زبانحال سیدالشهدا به زینب کبری و جواب آن علیا مخدره
..
..
مرحوم انور اردبیلی
..
..
آغلاما سنده زینبیم فاطمه اقتداری وار
گئتملیدور حسینوون کوفه ده انتظاری وار
..
..
قالوا بلا گونونده سن منله وئروبسن إل اله
عاقبتی بو نهضتون خیریدی ای مجلله
شمر و سنان و حرمله مستیدی بیلمیور هله
محکمۀ عدالتون قاضی هوشیاری وار
..
..
سنماسون اوج غصّه دن قوش کیمی شهپرون سنون
پرچم دینی ساخلیار باغلانان اللرون سنون
خنجر و تیر و نیزه دن گوجلیدی معجرون سنون
منطقوون آتام کیمی جنبۀ شاهکاری وار
..
..
سال باشووا قرا لچک چک یوزه غم نقابینی
باشه یتور حسینوون بی مثل انقلابینی
ابن زیاد ظالمون کوفه ده وئر جوابینی
باخما باشیندا بیر نچه حاجب جیره خواری وار
..
..
فصل بهار صحنه دور خلقتون امتیازینه
مانع اولور خزان یلی گلشنون عزّ و نازینه
آند اولا شیرخواره مون پارچالانان بوغازینه
عشقمیزون خزانی یوخ دائمی نوبهاری وار
..
..
غم یمه گرد غم قونوب دامن خیمه گاهیمه
صاحب پرچمیم گیدوب رخنه یتوب سپاهیمه
فاطمه بسلیوب سنی ایلمه ذره واهمه
ساقدی حسینوون هله پنجه ده ذوالفقاری وار
..
..
اولما رضا حرملرى خیمه ده گورمیوم گیدوم
یغ باشووا قالانلاری سوزلریمی دیوم گیدوم
فاطمه یادگارینی فوری گتور گیوم گیدوم
گورسون هامی او بیکسون گورملی یادگاری وار
..
..
یوسف ختم مرسلم یوخدی سوزوم مشیته
قانیم آخوب او کوینگی میندیره جکدی قیمته
فاطمیه وسیله دور روز جزا شفاعته
گور نقدر او کوینگون حشریده اعتباری وار
..
..
اهل مجاز رسمیدور زرین اساسی خوش دوتار
اولسا نقدری خیمه و قصر و طلاسی خوش دوتار
عاشق صادق اولسا کیم کهنه لباسی خوش دوتار
عشقیله کهنه پیرهن گیمگون افتخاری وار
..
..
تازه گین اوشاقلارون ایله عوض لباسینی
اوخشات اسیره ایندیدن خیمه ده آل یاسینی
سن دیله دوت رقیمی من چخادوم طلاسینی
زجریله خولی ئولدورر گورسله گوشواری وار
..
..
جواب حضرت زینب (س)
..
..
وئردی جواب حسینینه زینب مرتضی سیر
مقتدرم اسارته رمز بلایه باخبر
فکر ائلمه باجون سنه وئردیگی قولی ترک ائدر
من بیلورم اسارتون زحمتی وار فشاری وار
..
..
هیچ دئمورم بو زینب دیده پر آبیلن دانش
قزلاروی دوزوم صفه رأى صوابیلن دانش
لیلینی رام ائله صورا دیل دی ربابیلن دانش
ساخلا قدم تلسمه چوخ آیریلیقون قراری وار
..
..
آل عبایه قوی وئروم آیریلیقون اشاره سین
برج اسارتون یخوم دوروه من ستاره سین
ایله شماره سنده بیل لشکریمون شماره سین
زینب زار و بیکسون گور نجه همقطاری وار
..
..
قرمزی گللرون سولوب رنگی اولوب بنفشه تک
غصّه لی گلستانوی یوخلیاسان حسین گرک
نامزدی ئولن قزی گور نه حالا سالوب فلک
طوی گونیدور قرا گیوب تللرینون غباری وار
..
..
گوردی حسین دایانمیور آیریلوری شتابیلن
دوتدی یوزون مدینه نون سمتینه اضطرابیلن
سسلدی ئوز آناسینی دادینه بو خطابیلن
گل آنا گور بو زینبون گورملی روزگاری وار
..
..
روحیمی آیریلیق سالوب زجر و فشاره نیلیوم
ایستدیگون حسین گیدور بزم نگاره نیلیوم
چاره سیزم آدامسیزام من گونی قاره نیلیوم
لحظه به لحظه عمریمون محنت مرگباری وار
..
..
زینبون آز قالور آنا خیمه ده غصه مرگ اولا
گوزلریم آختارور سنی ھی باخورام صاقا صولا
ممکنون اولسا سو گتور سپ بو حسین گیدن یولا
کرب و بلاده یوخدی سو آتش پر شراری وار
..
..
#وداع #انور_اردبیلی #حسینیه_وداع #ترکی #زبدةالاشعار
نظر دهید