کربلانون ماجراسین چون بیلوب قان آغلادی #حضرت_ام_البنین_علیوی

حالات حضرت ام البنین (س)
.
.
عُلیَوی
.
.
کربلانون ماجراسین چون بیلوب قان آغلادی
یادینه دوشدوکجه اول وحشتلی میدان آغلادی
.
گه حسینیم وای دئدی گه وای ابالفضلیم دئدی
بیر حالا دوشدی خانم اول حاله مروان آغلادی
.
سوز چکوب مروانه سن فرض ائتمه معمولی بشر
جبرئیلون حالینه فکر ایله شیطان آغلادی
.
کربلانون محنتی بیر اوتدی دوشموش عالمه
هم مسلمان آغلادی هم نامسلمان آغلادی
.
دورد اوغول وئرموشدی الدن بیر بیرینّن با ادب
غملرین یاده سالوب حضرت کماکان آغلادی
.
گه ائوی خلوت ائدوب ای وای ابالفضلیم دئدی
گه ربابین منزلینده اولدی مهمان آغلادی
.
باش باشا وئردی ایکی مظلوم ننه محزون ننه
اصغره لای لای چالوبلار حور و غلمان آغلادی
.
دائما فکر ایلیوبدور کربلا غوغاسینه
عالم امکانی ائتدی بیت الاحزان آغلادی
.
گه مجسّم ایلدی ذهنینده بیر قولسیز بدن
مرکب اوستونّن گلور تپراقه هرآن آغلادی
.
گه گوروب بیر سوت امر طفلی گیوندیردی رباب
سو خیالیلن ائدوب راهی میدان آغلادی
.
منتظر قالدی گوره اصغر نجه سیراب اولور
حلقینه ناگه دگوب اوچ شعبه پیکان آغلادی
.
گه چوخور یرده گوروب دشمن سالوبدور هلهله
قلبی تشویشه دوشوب اولدی پریشان آغلادی
.
بیر قوجا سید گوروب مقتلده دوشموش اللره
باشینی دالدان کسولّر قوم عدوان آغلادی
.
دقت ائتدی تا گوره کیمدور کشاکشده قالان
گوردی زهرانین عزیز اوغلی دئدی جان آغلادی
.
چخدی یادینن ابالفضلین چتین ساعتلری
کلّ عالم سوئلدی مولایه قربان آغلادی
.
گه مجسم ایلدی زینب مینیبدور ناقیه
کول سپوللر باشینه معبرده نسوان آغلادی
.
گه گوروب نازلی رقیه تپراق اوسته جان وئرور
باشینه ویردی ایک اللی عرش رحمان آغلادی
.
.