یا زهرا …
.
.
مهدی فعال
.
.
کلاس معرفتون اوج اقتدارینده
پاریلدار آی کیمی ظلمین او لیل تارینده
.
هله جهاندا او صراف لر که خبره دیلر
قالوبلا فضل و کمالاتیوین عیارینده
.
ز بس محبتیوی کوچه لرده پایلاموسان
که سهمی وار کرموندن شرابخوارینده
.
شرابخواری ولایت می ایله مست ائلدون
که اصل باده سنون دیده ی خمارینده
.
قاپوزدا ریزه خور اولماقه یالوارار حاتم
که شأنی واردی بو درگهده ریزه خوارینده
.
نیه دؤزنمدی منصور زنده قالماقیوا
قالا جهنمین ایکاش بئس دارینده
.
قاپیوی هانسی گناه اوسته یاندیریر ظالم
فلک حیا ائلمور گردش مدارینده
.
مدینه ده قاپی جریانی بیرده واقع اولور
دوباره اود گویه قالخور نبی دیارینده
.
دوباره توستی دولوب مرتضی علی ائوینه
فضای غم وار ائوین گوشه و کنارینده
.
بو گیر و داریده ایوای بالالارین حالینا
او غنچه لر که قالوبلار خزان غبارینده
.
گلور قولاقیمه یا فضه خذینی سسی
اود ایچره تر دوزولوب فاطمه عذارینده
.
دوشوبدی حوریه ی مصطفی قاپی دالینا
تکان یینموری دیوار و در فشارینده
.
فشار بیر یانا مسمار داغ بیر طرفه
وبیر طرفده یانور چادر اود شرارینده
.
ائله اوتی دی که مردم مدینه ده بیر آی
او آتش هیزمین ایشلتدی کار و بارینده
.
علی اوچ آی صورا درک ائتدی عمق فاجعه نی
واریدی بسکه حیا یاره لی نگارینده
.
اوچ آیدا دردینی مولایه ائتمدی اظهار
مباد غصه قالا قلب داغدارینده
.
وئرنده غسلینی اسرار آشکار اولدی
همینکه ظلم اثرین گوردی جسم یارینده …
.
ئوزون کیمی دئدی زهرا اجل معطلی ام
که صبر قالمادی دای صبر شهریارینده
.
باخورام اود دوتورام گل یوزون سولوب سارالوب
خزان نشانه سی وار عشقیمون بهارینده
.
سنی نه نوعیله پیغمبره وئروم تحویل
که خار ردی دوشوبدور گلین عذارینده
.
بو اولین گجه عهد ایلورم نقدری وارام
گلم قالام گجه لر قبریوین جوارینده
.
#فاطمیه_شهادت #فاطمیه
#کلاس_معرفتون_اوج_اقتدارینده
#مهدی_فعال
#ترکی #زبدةالاشعار
.
نظر دهید