حالات حضرت علی(ع) روز نوزدهم رمضان
..
..
مرحوم رجایی تبریزی
..
..
کوفه شهرینده دیولّر بیر قیامت دور بو گون
زینب کبرایه محشردن علامت دور بو گون
..
..
بیر مصیبت یوز ویروب جنّ و ملک قان آغلوری
عرش و فرش و مهر و خورشید و فلک قان آغلوری
انبیا و اوصیالر تک به تک قان آغلوری
چون ستمله منهدم رکن هدایت دور بو گون
..
..
عالم معناده جِبریل امین ایلور ندا
آند اولا اللّهه اولدی منهدم رکن هُدا
شیعه لر هر سمتده آغلور دیور وامرتضی
شورله آغلار قالان آل رسالت دور بو گون
..
..
دین یولوندا باش ویروب باشدان گیچوب سلطان دین
آنلاسونلار امّت مرحومه دینین قیمتین
جاننی اوز دیننه ایلر فدا اهل یقین
دین یولوندا قانه باتماخ چوخ سعادت دور بو گون
..
..
گرچه بیر عدّه بو دینی ایلیوب دور ملعبه
هر طریقیله وورور صدمه بو دین و مذهبه
سوق ایدن دین دور ولی انسانی عالی منصبه
امّت پیغمبره دین بیر شرافت دور بو گون
..
..
ویردی باطل دینلره پیغمبرِ حق اختتام
یِر یوزیونده دین بو گون اسلام دور بس والسّلام
مقصد و مقصودیمی آنلار منیم اهل کلام
حیف اولا بو دین بیزه از روی عادت دور بو گون
..
..
هر کیم اولسا اوزگه دینون پیروی گمراه دور
دین حق اسلام دور مصداقی لا اکراه دور
مدرکیم قرآندا إِنَّ الدّینَ عِندالله دور
دین فقط دین محمّددن عبارت دور بو گون
..
..
حیف اولا یوخدور بو دینون قیمت و قدرین بولن
پیکر دینه وورور بیر زخم کاری هر گلن
هارداسان منسوخ اولوب احکام دین یابن الحسن
دین کمک سیز دور بولورسن یوم نصرت دور بو گون
..
..
حجت الله پردۀ غیبتده آز ایله مُقام
اذن آلوب چک ذوالفقارون آغلاما هر صبح و شام
دینی بو حاله سالانلاردان اوزون آل انتقام
پیروان دینده باخ گور نه جسارت دور بو گون
..
..
دینینه تابع اولان ایلر عمل فرماننه
ایتمین مشمول دور «بل هُم اَضل» عنواننه
مرتضی دوتدی مقّدم دیننی اوز جاننه
دین دیماخ یالقوز دگول مصداقی طاعت دور بو گون
..
..
مسجده گلدی طلوع صبحده میر حجاز
باشلادی معبودله محرابده راز و نیاز
ابن ملجم قویمادی قیلسون ایکی رکعت نماز
بیر شقاوت گوستروب ذکر حکایت دور بو گون
..
..
ایستدی باشین گوتورسون سجده دن حبل المتین
شدّتیله اَندوروب ابن مرادی ضربتین
باش سنوب قانی آخوبدی چولقادی مَه صورتین
آی باتوب معناده عالم غرق ظلمت دور بو گون
..
..
ایلدی روح الامین دنیاده اعلان خطر
کوفه ده الله ایوینده اولدی بیر شقّ القمر
خاندان عصمت ایچره نشر اولوب دور بو خبر
اضطرابه دوشدولر بو نه روایت دور بو گون
..
..
منتظر دورموشدی زینب مضطرب احوالیله
گَتدیلر گوردی باباسین بیر پریشان حالیله
سسلنور امّا حسین قارداشی بو مِنوالیله
آغلاما زینب بابام صاق و سلامت دور بو گون
..
..
بیرده زینب بو حسینون گوردی غم باغرین دَلور
حسرتیله گوز یاشین غربال چشمندن اَلور
سسلنور پیشواز ایدون اوغلوم علی اکبر گلور
دین یولوندا باش ویروب چوخ با شهامت دور بو گون
..
..
نعشنی گَتدیم باجی میداندا یالقوز قالموسون
ویر خبر اهل حرم گَلسون دویونجا آغلاسون
لیلی باشدان معجرین آچسون یاراسین باغلاسون
چکمه سون غم باشداکی تاج شرافت دور بو گون
..
..
ای «رجائی» توک سرشکون آغلا هر صبح و مسا
قیل علینی واسطه عجزیله عرض ایت ای خدا
سن بویوک سن من کیچیک مندن خطا سندن عطا
چوخ گناهیم وار امیدیم باب رحمت دور بو گون
..
..
#حیدریه #حیدریه_شهادت #ترکی #زبدةالاشعار #رجایی_تبریزی
نظر دهید