یا رب ایمان دفترینده مشق وحدت وئر منه #رمضانیه_دلپاک

رمضانیه
..
..
رضا غلامپور(دلپاک)
..
..
یا رب ایمان دفترینده مشق وحدت وئر منه
چشمهٔ عرفانیدن بیر جرعه حکمت وئر منه
..
دادماقا بیر دم زلال رحمتی ماه صیام
بو ضیافت خانه ده جام محبت وئر منه
..
قورموسان بیر سور بخشش هر بساطی نوریله
دعوتم اما چاتام کامه بصیرت وئر منه
..
ائیلیوب کونی منوّر ماه رخشان صیام
بو مه پر فیضیده توفیق طاعت وئر منه
..
بزم رحمتده بساط لطفوون مهمانیم
لطف قیل بو سفردن مطعوم حاجت وئر منه
..
مکتب حقّینده ای آموزگار بی بدیل
نکته نکته خط به خط درس شریعت وئر منه
..
تک مقامین ذکریده منظور تسبیحاتیدور
وای منه گر سویلسم بیر دفعه جنّت وئر منه
..
مغفرت شهرین کی مختص رحمیوه مدلولیدی
گوشه سینده لطف قیل اِذن اقامت وئر منه
..
موسم احسان نسیم لطفوون الطافینه
گل کیمی گلزار رحمتده طراوت وئر منه
..
چشمهٔ عصیان جوشان دم بیرده دشت نفسیده
جام تقوادن اوزون بیر جرعه شربت وئر منه
..
واقف ائت سرّ ثنایه راز حمده قلبیمی
مسجد و محرابیده ذوق عبادت وئر منه
..
چون بهار مصحف منزلدی بو شهر الشرف
نغمه ی داودیدن بیر خوش تلاوت وئر منه
..
یولّا گلسون سمت بخششدن سحاب رحمتی
بیرده یارب بیر ئووج بذر شفقّت وئر منه
..
عاجزم درمانده ام بیر بنده ی شرمنده ام
دوت الیمدن فیض فضلوندن بشارت وئر منه
..
نه تجارتدور بو نه سودادی نه داد و ستد
من وئریم دائم سنه غم سنده نعمت وئر منه
..
نامهٔ بخششده ثبت ائت آدیمی ای مهربان
بو رقیمی ساخلا سن روز قیامت وئر منه
..
گلمیشم دلپاک تک من لفظ استغفاریلن
تا دئیم دین اوسته عمرومجه دیانت وئر منه
..
..
#مناجات #دلپاک #رمضانیه_دلپاک #رمضانیه #ترکی #زبدةالاشعار