کوفیان سیز خانۀ ایمانی ویران ایلدوز #کوفه_عبدی_تبریزی

خطبه حضرت زینب به اهل کوفه
.
.
.
مرحوم علی اکبر عبدی قراملکی
.
کوفیان سیز خانۀ ایمانی ویران ایلدوز
تشنه لب پیغمبر اوغلون قانه غلطان ایلدوز
.
.
کلمۀ لایوفی بیجا تاپمیوبدی اشتهار
مایه ننگ اولدی تاریخ عربده بو شعار
بو عمل حاشا گلن انسانه اولسون افتخار
شرمگین اوز نسلوزی تا وار بو دوران ایلدوز
.
.
نقض بیعت ائتمیسوز سیندیرمیسوز پیمانوزی
ساتموسوز وجه قلیله دینوزی ایمانوزی
قویمیسوز یالقوز اوغولسوز محترم مهمانوزی
عار اولا دنیاده قصد قتل مهمان ایلدوز
.
.
قاری قرآن قویوبسوز آدوزی آی قوم دون
پرچم اسلامی بو، نیرنگ ائتدی واژگون
وئرمیسوز تشکیل ثارالله دن دریای خون
بو عملدن رکن دین حقی لرزان ایلدوز
.
.
بیر جنایت ایلدوز لرزان اولوبدی نه طبق
نه جنایت گورمیوب گورمز نظیرین ماخلق
قتلگهده سیندی سنگ ظلمیله مرآت حق
آخدى قان قانیله وجه اللهی الوان ایلدوز
.
.
باشه وئردی قارداشیم پیمانینی باش وئرماقی
سیندی سینه اولدی گلگون کربلانین توپراقی
ظلمیله قرآنی اوراق ایلیوب آت دیرناقی
پیکرین منکوب ائدوب اوراق قرآن ایلدوز
.
.
بیله رفتار ایلدوز یالقوز اوغولسوز شاهیله
تشنه لب گوداله یخدوز فرقۀ گمراهیله
اللروز الوان اولوب ای قوم ثاراللهیله
هیکل توحیدی جبراً تیر باران ایلدوز
.
.
ایلدوز دعوت بیزی مهمان آدیله كوفیه
مستند اعمالوز اولدی کلمۀ لایوفیه
اولمیسور ضرب المثل دنیا بوئی بی او فیه
ظلمیده حدّن گئچوب یا قوم طغیان ایلدوز
.
.
سیز دگیلدوز میهمانه سو یولونی باغلادوز
ئولدوروب انصارینی قلب شریفین داغلادوز
هم قتیل ائتدوز اوزون هم حالینه قان آغلادوز
آغلیون بو امریده دنیانی گریان ایلدوز
.
.
آغلیون دنیا بوئی سیز آز گولون چوخ آغلیون
یوخ ثمر ای داش اورک اشخاص سینه داغلیون
آغلیون گوزدن یوزه خونابۀ دل باغلیون
ظلمیله پیغمبرین سیز قلبینی قان ایلدوز
.
.
سیز دگیلدوز مثله ائتدوز مهربان قارداشیمی
وقعۀ جانسوزه سالدوز بو بلالی باشیمی
قطعه قطعه دوغرادوز فتیان آل هاشمی
ظلموزی بو عالم امكانه اعلان ایلدوز
.
.
بیر جنایت ایلدوز ای فرقۀ بی ننگ و عار
هانسی توبه یا عبادت لکۀ ننگی یووار
دامن اعرابی ائتدوز حشر اولونجه لکه دار
ایله که سیز نار جور و ظلمی سوزان ایلدوز
.
.
آغلیون چوخ آغلاسوز بوندان صورا اعمالوزه
سیز پیمبر اوغلونی ئولدورمیسوز وای حالوزه
یابن مرجانه نه خلعت باغلادی دسمالوزه
کربلاده جان به کف اجرای فرمان ایلدوز
.
.
وورمیسوز بیر اود خیام سبط پیغمبر یانوب
مأمن آل علیّ المرتضا یکسر یانوب
آغلادی غارت اولان اطفال غارتگر بانوب
اشگینی خرد و کبارین مثل عمان ایلدوز
.
.
اولدوز اغوا سیز شریحین نابجا فتواسینه
قصد قربتله جمع اولدوز کربلا صحراسینه
غرق ائتدوز محترم بیر شخصی قان دریاسینه
ناروا فرمان و حکمی الده عنوان ایلدوز
.
.
بیر گناهه مرتکب اولدوز جماعت دهریده
تشنه ئولدوردوز قوناقی سیز کنار نهریده
منطقیله ایلرم رسوا سیزی هر شهریده
ماجرا ختم اولدی فکر ائتمون که کتمان ایلدوز
.
.
اولمیسوز تابع سیز هانسی دینه هانسی مکتبه
دین اسلامین قوانینین ائدوبسوز ملعبه
وای اولا سیزده اولان دینه بو باطل مذهبه
هارداسیز اجرای دین قانون فرقان ایلدوز
.
.
قلبیمی یاندیرمیسوز اود وورمیسوز یانمیش دله
هانسی باجی صبر ائدر زینب کیمی بو مشگله
سالموسوز قارداشیمین قانلی باشین الدن اله
فخر ائدورسوز ای جماعت فتح شایان ایلدوز
.
.
شمع تک یانّام یانوب بو عالمه سالّام شرر
زینبم هرچند قول باغلى اوزوم شوریده سر
آتشین نطقیله قیلّام کوفه نی زیر و زبر
آتش خاموشی سیز بیر آتش افشان ایلدوز
.
.
وقعۀ طفدن اگرچه دستگیرم دشمنه
بو اسارت فخردور ای قوم کین پرور منه
قویمارام دنیاده یتسون آل سفیان ایمنه
درد بی درمانه فکر ائتمون که درمان ایلدوز
.
.
سیزلره نه یوز وئروب بیله أوزوزدن چخمیسوز
روح اسلامی ستمله منجنیقده سخمیسوز
وای اولا سیز خانۀ دین مبینی یخمیسوز
کورکورانه بو مشگل امری آسان ایلدوز
.
.
اولمیون بیجا یره مغرور ای اشرار پست
ظاهراً عالمده پیروز باطناً اما شکست
بادۀ نخوت سیزی دنیاده ایلوب ایله مست
خانۀ دینی اودور سیز سست بنیان ایلدوز
.
.
ای تماشایه چیخان اشخاص کور اولسون گوزوز
باخمیون بیز اهلبیته شامه دونسون گوندوزوز
بیزلره گلسوز ئولینجه شاد اولوب گولمز یوزوز
بیزلری غمگین امیر شامی خندان ایلدوز
.
.
باخمیون بیز خاندان عترت پیغمبروخ
نور عین مصطفایوخ نسل پاک حیدروخ
اهل بیت عصمتوخ نوباوه گان اطهروخ
حتک حرمت بیزلره ای قوم دونان ایلدوز
.
.
کورکورانه اولوبسوز بیر گناهه مرتکیب
بیر نجیبی ئولدوروبسوز اشقیای نانجیب
بو جنایتدن اولوبدی کون و امکان مضطریب
مضطرب کون و مکانی قوم عدوان ایلدوز
.
.
عالمه بیر شور سالدوز ای گروه بد شیم
ماسواللهى بو محنت ایلدی غرق الم
تا جهان واردور محرّم آیی واردور وار بو غم
شیعه نی بیر عمر آشفته، پریشان ایلدوز
.
.
«عبدی» مدّتدی اولوب آشفته و غرق ملال
قبریم اوسته ایلرم دعوت اونی هر ماه و سال
بیزلره منسوبدور قویمام اولا افسرده حال
بو عملدن سیز اونی غمگین و نالان ایلدوز
.
.
.
.
#کوفه_عبدی_تبریزی
#کوفیان_سیز_خانۀ_ایمانی_ویران_ایلدوز
#ترکی
#زبدةالاشعار
.