دفن شهدا
.
✍️ #زبدةالاشعار ✍️
.
🆔: @nohe_torki
.
#سبک_مسلمون_شهادتی … 5 سبک
مشابه
.
مرحوم خالق فکری اردبیلی
.
نهر علقمه باخوب تشنه جان ویرن بابا
عفو ایله تاپانمادوم جسموه کفن بابا
.
.
غسل ممكن اولمادی بو یارالی پیکره
یاندوم آغلادوم بابا قطع اولان بیلکلره
هی باخوب هی آغلادوم دوغرانان بدنلره
غسل ایدنمدوم سنه ای شه زمن بابا
.
.
پر پر ایلیوب عدو گل کیمین بدنلری
قطعه قطعه ظلمیلن دوغریوبلا اکبری
سینون اوسته قویموشام شیرخواره اصغری
باغریم اولدى قان سنی دفن ایدنده من بابا
.
.
غملو ماجرالری خاطریمده ساخلارام
آه سینه سوزیله ماسوانی داغلارام
تا وارام جهاندا من سو گورنده آغلارام
سؤیلرم یانا یانا تشنه جان ویرن بابا
.
.
قسمت اولمادی سنه جرعه ای فراتیدن
رنج و غصّه ایلدی حمله هر جهاتیدن
بسکه ظلم اولوب بیزه دویموشام حیاتیدن
روزگاریمی قرا ایلدی محن بابا
.
.
عالم شبابیده رنج و غصه پیریَم
باغلانوبدی قولّاریم شمر دستگیریَم
گرچه ناخوشام اوزوم ظلملر اسیریَم
شامی فتح ایده گرک بو ناخوش بدن بابا
.
.
چشمه لر کیمین گوزوم اشگینی روان ایدر
خون دل او گوز یاشین قطره قطره قان ایدر
هی یازار عذاریمه دردینی بیان ایدر
هی دییر خموش اولوب شمع انجمن بابا
.
.
سینوون یاراسینا گوزلریم فدا اولا
هانسی شل اولان ویروب سینوه بیله یارا
شهریار دین هارا كهنه بوریا هارا
بوریانی ایلورم جسموه كفن بابا
.
.
سینه ده یارالارون قلبیمی ایدوب کباب
حشر اولونجا آغلادار گوزلریمی چون سحاب
اصغری قوجاقلا سن یوخدی بینوا رباب
کوفه ده فغان ایدر بلبل چمن بابا
.
.
ای پناه بی کسان یوخدی پیر پناهیمیز
باغلانوبدی قولّاریم اوج ایدوبدی آهیمیز
قلبیمیز یارالیدور گوز یاشی گواهیمیز
یوخدی کوفه ده بیزه بیرجه رحم ایدن بابا
.
.
عندلیب تک ایدر «فکری» غصّه دن نوا
گوزیاشی توکر یوزه روز و شب او لیلی وا
قلبیده ایدر مدام آرزوی کربلا
هر یره گیدوب دیر دردینی علن بابا
.
.
#دفن_شهدا #فکری_اردبیلی
#نهر_علقمه_باخوب_تشنه_جان_ویرن_بابا
#ترکی
.
✍️ #زبدةالاشعار ✍️
.
🆔: @nohe_torki
نظر دهید