#بهاریه
فی مدح مولانا و مولی الکونین علی ابن ابیطالب و به خلافت نشستن آن شیر پروردگار
#گریز به مصیبت مظلوم کربلا
.
.
.
مرحوم #دلریش
.
.
گتور بو بزمه ساقیا شراب خوشگواریدن
خلاص قیل بو گوگلومی فغان و آه زاریدن
نسیم صبح دمبدم وئرور خبر بهاریدن
گئدوبدی زاغیله زغن کناره لاله زاریدن
دولوبدی صحن گلستان ترانۀ هزاریدن
.
.
شه ربیع چون آچوب نقاب چهرۀ گلی
چو زلف یار خم به خم ائدوبدی زلف سنبلی
الیمى دوت ایاغیلن کناره قوی تحمّلى
واروندی شوق گورمگه اگر صدای بلبلی
کناره قویما بیر قدم کنار جویباریدن
.
.
فضای عشقیده گوگول چو آهوی رمیده دور
به سان ابروی نگار بو قامتیم خمیده دور
چو خط یار نازنین بنفشه لر دمیده دور
تغافل ائتمه می گتور بساط عیش چیده دور
اولوبدی طاق طاقتیم اماندی انتظاریدن
.
.
صباح و شام اشک ریز اولوبدی ابر آذری
تمام شاهد چمن گییوب لباس اخضری
چیخوبدی یاس باشیدن آچوبدی چتر کشمری
آتوب نقاب چهره دن قلنفوریله جعفری
تاپوبدی بلبل اوز گلین گئدوبدور اختیاریدن
.
.
ائدوبدی غنچه شوقیدن چمنده چاک پیرهن
یتوب وصاله عندلیب اولوب عجب طرانه زن
آلوبدی لاله جام اله قوروبدی طرفه انجمن
قیلوب معطر عالمی شقایقیله نسترن
چکوب کناره سرو اوزین باخاندا هر کناریدن
.
.
گئچوبدی موسم خزان دوشوبدی نوبهار اله
گئچورتمه غفلتیله آل مغنّی چنگ و تار اله
امید یوخدی کیم دوشه دوباره وصل یار اله
نه وصل یار اله دوشر نه بیله روزگار اله
که بلکه کامیاب اولاق بو فصل وصل یاریدن
.
.
آچوبدی باب رحمتین خدای لامكان گینه
دونوب هوای جنّته هوای گلستان گینه
اولوبدی سوسن عطر گل انیس ارغوان گینه
گل صباحه هم زبان اولوبدی ضیمران گینه
یتوب بو لطف گل لره نگار گلعذاریدن
.
.
یتوبدی مژده گل لره قوروبلا مجلس طرب
ائدرله نشوله نما چمن سراده روز و شب
صباح و شام نغمه ساز اولوبدی بلبل العجب
واروندی هوش گور ندور بو عیش و جنبشه سبب
مجرد اول بو فصلیده گه قید روزگاریدن
.
.
عبث دگیل بو عید اولور گوگول بو نوع شادمان
او اوچ لعین بی حیا اولوبدی دوزخه روان
خلافتینده برقرار اولوب امیرمؤمنان
بو مژده ایله مرده دل تاپوب حیات جاودان
یتر حیات عالمه او شاه تاجداریدن
.
.
بو سؤزده یوخدی شک و ریب او شاهدور ولی حق
اونون وجودی عالمه وئروبدی نظمیله نسق
اونون برعکس نوریدور بو مهر و ماهیده شفق
یازوبدیلار فضایلین زبوریده ورق ورق
گلوب بو منقبت ازل خدای کردگاریدن
.
.
او سروری که شأنینه گلوبدی هل اتی اونون
ائدوبدی فرض طاعتین ازل گونی خدا اونون
محالیدور که واصفی اولا بو ماسوا اونون
بیر آدی مرتضی اولوب بیر آدی لافتی اونون
تاپوب نظام دین حق بو شاه نامداریدن
.
.
ائدوبدی غیبیده مدد تمام انبیایه بو
اولوب یقین ظاهراً جناب مصطفایه بو
وصی اولوب پیمبره ولی اولوب خدایه بو
ائده هر حکم جاریدور سرایه بو سمایه بو
حرام زاده نون بدی گلور بو شهریاریدن
.
.
عداوت ائتسه هر دنی بو شاه تاجداریلن
یقین عداوت ایلیوب خدای کردگاریلن
بو دین حقی برقرار ائدوبدی ذوالفقاریلن
یول اوسته وئردی سائله بو شه زری قطاریلن
بو جودی گوردی قنبر ال چکوبدی تئز مهاریدن
.
.
.
نقدر خلق ائدوب شجر خدا اگر اولا قلم
مداد اولا بو ارضیده نقدر واردی بحر و یم
اولونجا حشر ایلسه تمام ماسوا رقم
یتیشمز آخره یقین مناقب شه اُمم
دوتوب سكون نه سما وجود هشت و چاریدن
.
.
هر ایکی دنیا خوار اولور دانان على ولایتین
بشرده قوّه یوخ ائده بیان اونون سخاوتین
گورنده طوطی لال اولور فصاحتین بلاغتین
سالاندا مرحب دغا یاده بونون شجاعتین
دوشر وجودی رعشیه اونون او زخم کاریدن
.
.
دئمه خدا، بصیری دی خدا صفات حیدره
بو سرورین فضائلین یازوبلا چار دفتره
او گونکه ووردی بیر قلج بو سرور عمر کافره
وئروب رواج همان قلج شریعت پیمبره
یانویدی خرمن عدو شرار ذوالفقاریدن
.
.
#گریز #حسینیه_شهادت
.
.
یتنده بو یره قلم توکندی صبر برملا
که دوشدی غملی گوگلومه گینه بیر اوزگه ماجرا
گلور خیاله گوییا بساط دشت کربلا
نه کربلا حقیقتا محل محنت و بلا
گلنده کربلا آدی گئدر گوگول قراریدن
.
.
من هانسی محنتون سنون چکوم بیانه یاحسین
هانی سنون کیمی دوزن هر امتحانه یاحسین
بویاندی حق یولیندا کیم بو نوع قانه یاحسین
بدن یارالی یرده باش گئچه سنانه یاحسین
نه ظلم لر ظهور ائدوب او قوم نابکاریدن
.
.
گوزون گورنده تشنه لب او ماه منظر اوغلوی
پیمبره شبیه اولان على اكبر اوغلوی
عداوتیله كوفیان قویوبلا بی سر اوغلوی
نشان ناوک جفا ائدوبله اصغر اوغلوی
وئروب او طفله حرمله سو تیر جان شکاریدن
.
.
گورون نه ظلم اولوبدی بیر او چولده آل حیدره
حسین کیمی هانی دوزن جفای قوم کافره
ائدوبله بیر ایچیم سوئی مضایقه او سروره
ووروبله سو یرینه اوخ ال اوسته اوخلی اصغره
او قوم ائتمیوب حیا او طفل شیرخواریدن
.
.
بو ظلمه بولمورم نئجه دوزوب آناسی قاسمون
بویاندا باشلانوب طوئی اویاندا یاسی قاسمون
اولوبدی ظلمیله کفن او طوی لباسی قاسمون
نئجه بیان ائدیم که قان اولوب حناسی قاسمون
دونوبدی قانه گوگلوموز او ظلم بیشماریدن
.
.
ووراندا خیمه گاهه اود سنان و شمر بی حیا
اوجالدی اهل بیتیدن سمایه شیون و نوا
داغیلدی آهو تک چوله او گون عیال مصطفى
قالوب چو حضرت خلیل اود ایچره حجت خدا
او قدر طاقت اولمادی چیخا کناره ناریدن
.
.
ائدوبدی حکم لشگره چو ابن سعد بی حجاب
ائدوبله آل حیدری تمام بستۀ طناب
روادی فاطمه قیزی گئده دمشقه بی نقاب
اولایدی کاش شیعه لر او گونده بو جهان خراب
دوشیدی بو سپهر دون گوروم او گون مداریدن
.
.
بو غملو ماجرانی سن گل ایله «دلریشه» تمام
محالیدورکه محو اولا گوگولدن اول جفای شام
یتیشمز آخره بو غم اگر یازیلسا صبح و شام
وئرور جزاده اجریوی بو جمعیله شه انام
واروندی هوش چکمه ال ئولونجه بو شعاریدن
.
#حیدریه_مدح #غدیریه_غدیریه_شمسی
#گتور_بو_بزمه_ساقیا_شراب_خوشگواریدن
#ترکی
.
.
نظر دهید