گلدیم ز بس که ناله و افغانه شامیده #حضرت_رقیه_عاصی_تبریزی

قصّه ی شام
.
.
مرحوم عاصی تبریزی
.
.
گلدیم ز بس که ناله و افغانه شامده
ائتدیم بو خرّم ائولری غم خانه شامده
.
توکدیم او قدری گوزیاشی فریاد و آهلن
طوفانه وئردیم عمریمی ویرانه شامده
.
غم چکدیم اون بیر آی بو قرانلوق خرابه ده
دوشدوم صغیر سنّیله زندانه شامده
.
نه فرش و نه چراغ و نه طبخ و نه بیر طعام
بیله رعایت ائتدیله مهمانه شامده
.
قالدیم خیال طرّه ی اکبرده، وورمادیم
بیر دفعه شانه زلف پریشانه شامده
.
من دختر شهنشه مُلک حجازیدیم
اولدیم غریب و بیکس و بیگانه شامده
.
غصّه سارالتدی رنگیمی برگ خزان کیمی
قالدیم غم آتشینده یانا یانه شامده
.
اوّل گولوب شماتت ائدن قزلار، عاقبت
هم ناله اولدیلار من نالانه شامده
.
نالم مؤثر اولدی زبس اهل شامچون
شرح ائتدیلر ملالیمی هریانه شامده
.
یاتدی یزید قزلاری مین عزّ و نازیلن
من حسرت استراحته بیر آنه شامده
.
بزم یزیده حاضر اولان گونده باشیمون
یتدی هامی بلالری پایانه شامده
.
گوردوم بابام باشی قویولوب پای تختده
باشسیز عیالی خار و ذلیلانه شامده
.
بیر شور سالدی شهره اوگون چوب خیزران
کافرلر ائتدی طعنه مسلمانه شامده
.
تپراقلار اوسته گوشه ی غربتده عاقبت
وئردیم بو خسته جانیمی جانانه شامده
.
باش آچدی عمّه لر باشیم اوسته فغانیلن
گلموبدو کیمسه شام غریبانه شامده
.
من روسیاه «عاصیه» لطفیله قیل نظر
قربان اولوم او روضه ی رضوانه شامده
.
#حضرت_رقیه #عاصی_تبریزی
#حضرت_رقیه_شهادت
#گلدیم_ز_بس_که_ناله_و_افغانه_شامده
#ترکی
#زبدةالاشعار