زبانحال حضرت رقیه (س) با پدر در خرابه شام
..
..
..
مرحوم حاج حیدر خسروشاهی (حزین)
..
.
ای گلشن وفایه اولان باغبان بابا
سنسیز بهار عیشیمیز اولدی خزان بابا
..
بیر بلبلم که پرپر اولوب گل لریم منیم
حقیمدی تا وارام ائدم آه و فغان بابا
..
بلبل کیمی نوایه گلنده غمونده من
مانع اولوبدی عاطفه سیز ساربان بابا
..
یولدا جدا باشیندا گوروردوم باشون ولی
قویموردولار الیم یته شمر و سنان بابا
..
قلبیم یانوردی آتش هجرونده دمبدم
آهیم ائدوردی سینه ده آتشفشان بابا
..
گلدون بو گلماقون گیجه وقتینده گویلومون
سوندوردی آتش غمین ای مهربان بابا
..
معذوریدیم اگر سنی پیشواز ائدنمدیم
غفلت دگیردی اولمادی دیزده توان بابا
..
جبرانینه او بیر عملین ایندی وار یری
تقدیم ائدم قدملریوه نقد جان بابا
..
فرصتدی درد دل دئماقا گرچه بو حضور
سوز نهانی ائتمرم اما عیان بابا
..
ایندی خرابه بزم محبّتدى حیفدور
عنوان اولا بو بزمده سوز نهان بابا
..
چوخداندی حسرتین چکورم بیله ساعتین
تا یوز یوزه قویام سنیله بیر زمان بابا
..
بو حق یولوندا هر نه بلا باشیمه گلوب
فرض ائتمیشم تمامینی بیر امتحان بابا
..
عرضیم بودور فقط منی تک قویما، یا آپار
یا قال خرابه ده منه اول همزبان بابا
..
قیل بیر وفالی عمّه مین احوالینه نظر
بار غم ایلیوب قد سروین کمان بابا
..
بیر لحظه خالقیم منى عمّه مسیز ائتمسون
احوالیمه اونون کیمی اولماز یانان بابا
..
بیر آندا گوز بو اهل حرمدن گوتورمیوب
ایلوبدی سایه سین بیزه دارالامان بابا
..
بو یولدا چوخ جفالره من ناظر اولموشام
اما یزید کافر الیندن امان بابا
..
منده آنامدا عمّه لریمده باخا باخا
ووردی سوسوز دوداقلاریوا خیزران بابا
..
ائتدی سوسوز دوداقلاریوی خیزران یارا
وار ایندیده همان یارادا تازه قان بابا
..
فرمایش ایله قارداشیم اکبر هایاندادی
گلمور ندن سراغیمه اول نوجوان بابا
..
بیرده علی اصغری گویلوم چوخ ایستیری
گر چه سزا دگول اونا بیله مکان بابا
..
ویردیم اجازه من یازا احوالیمی «حزین»
ویر سنده استطاعت نطق و بیان بابا
..
..
..
#حضرت_رقیه #حزین_خسروشاهی #حضرت_رقیه_شهادت #ترکی #زبدةالاشعار
نظر دهید