شهادت حضرت زهرا سلام الله علیها
.
✍️ #زبدةالاشعار ✍️
.
🆔: @nohe_torki
.
علی شهودی
.
گلشن عشقده غوغای خزاندور زهرا
زینبینین ایشی فریاد و فغاندور زهرا
.
دوشموسن بستر بیماریه مدتدی ملول
حسنینین گوزی سندن نگراندور زهرا
.
هارا کوچ ایلیسن هانسی دیاره گئدیسن
بیلیسن داغ فراقون نه گراندور زهرا
.
گورورم لحظه دیدار یئتیبدیر باشه
صورتونده حرم قدس عیاندور زهرا
.
سنده واردیر او قدر جاه و جلال و جبروت
کی سنی دوست دوتان ربِّ جهاندور زهرا
.
یئتیریب خالق اعظم سنی بیر رتبیه کی
ایندی هر یئرده آدون ورد زباندور زهرا
.
سنی پیغمبر حق امته تاپشیردی دئدی :
اولون آگاه منیم جسمیمه جاندور زهرا
.
کیم اونی ائتسه اذیت ائدیر آزار منی
بو حدیثیله داها قدرون عیاندور زهرا
.
سن او یاس نبوی سن کی اولوبسان پرپر
ملکوت اهلی سنه اشگ فشاندور زهرا
.
خانه قبره روان اولموسان ای روح حیا
مرتضانین یوزه قان یاشی رواندور زهرا
.
بو نه طوفاندی قوپوب بیت ولایتده بوگون
آخرت منزلینه اولما رواندور زهرا
.
یئری واردیر دئیه سلطان ولایت اجله
عجله ائتمه جانین آلما جواندور زهرا
.
دفنیدَن فارغ اولوب عالم رویاده علی
یاتدی گوردی بالالاردان نگراندور زهرا
.
آیری عالمدی علی نین سیخیلان قلبینده
گر دئسم خبط دئیل حضرته جاندور زهرا
.
ای نمازیندا ووران موج خضوعیله خشوع
دور قیام ایله کی هنگام اذاندور ز هرا
.
سنی تحقیر ائده اول ضربه قنفذ هیهات
عظمت سری وجودوندا نهاندور زهرا
.
ای اولان گوهر بحر شرف و جود وسخی
دامن معرفتون مهد اماندور زهرا
.
بو قارانلیق ائویمه قیل نظر ای بدر تمام
دور چراغ شرف و عصمتی یاندور زهرا
.
یئری بوشدور بو مصیبتده خدیجه آناوین
اودا جنتده یقین نوحه کناندور زهرا
.
گئتمه گئتمه دایان ای قلبیمین آرامی دایان
قویما یالقیز منی دنیاده آماندور زهرا
.
ائله شان شان ایلییب قلبیمی بو تیر فراق
قامت صبریمه باخ گورنه کماندور زهرا
.
آیریلیق ایلدی بو جمعی پریشان ای داد
آیریلیق محنتی عالمده یاماندور زهرا
.
.
#فاطمیه_شهادت
#گلشن_عشقده_غوغای_خزاندور_زهرا
#علی_شهودی
#ترکی
.
✍️ #زبدةالاشعار ✍️
.
🆔: @nohe_torki
نظر دهید