گلور مشامه یئنه عطر یار اوروجلوقدا #مناجات_محمد_هوشمند

رمضانیه
.
.
محمد هوشمند
.
.
گلور مشامه یئنه عطر یار اوروجلوقدا
اولوبدی گلشن دینه بهار اروجلوقدا
.
وئریر نوید جهان اهلینه، منادی غیب
اولوبدی رحمت حق آشکار اوروجلوقدا
.
بوآی قوناق چاغیریب خلقی مهربان الله
وئریبدی بنده لره اعتبار اروجلوقدا
.
گنه قولاقلارا لا تقنطو نداسی گلور
بشر اولوب هامی امیدوار اوروجلوقدا
.
اوروج دوتانلارا تکریم ائدیب وئریب ارزش
آچیبدی سفره نی پروردگار اروجلوقدا
.
دعا و ذکر و عبادت دی سفره نین رزقی
یازان ملک بیرینه مین یازار اروجلوقدا
.
نسیم رحمت اسور شش جهات عالمدن
وئریر اورکلره شور و قرار اروجلوقدا
.
بو آیدا اوچ گئجه مشهور اولوب شب قدره
حقیقت آختاران آخیر تاپار اوروجلوقدا
.
آچیب دی درگهینی خلقه مهربان آلله
باغشلادار اوزونی اهل نار اروجلوقدا
.
بو آیدا اهل حقیقت کمال حقه چاتار
جهنمین قاپیسی باغلانار اوروجلوقدا
.
بویوردی ختم نبی وای او کس لرین حالینا
گناهدان ائتمیه، نفسین کنار اروجلوقدا
.
بو آیدا کیمسه باغیشلاندیرانماسا اوزونی
قالار گلن ایله چشم انتظار اروجلوقدا
.
بو آیدا سیندی عدالت ستونی ظولمیله
باتیب گون عالم اولوب شام تار اوروجلوقدا
.
بو آیدا جهل و جهالت اوزون نشان وئردی
یاراندی حادثه ناگوار اروجلوقدا
.
بویاندی قانینه محراب ایچنده شیرخدا
دوشوبدو بستره بی اختیار اروجلوقدا
.
چاتوبدی کوی وصاله باشی یارالی قوناق
بو غمده شیعه اولوب سوگوار اروجلوقدا
.
بو آیدا شیعه لرین رهبری شهید اولدو
اودور که شیعه اولار دلفکار اروجلوقدا
.
علی عدالتینه خاطر اولدی قربانی
چاتیب وصاله اولوب رستگار اروجلوقدا
.
خدا بحق علی بیزلره ترحم ائله
هوای نفسین الیندن قوتار اروجلوقدا
.
علی نین آدی منی هر زمان ائدیر #مدهوش
مشام جانه گلیر عطر یار اروجلوقدا
.
#رمضانیه
#گلور_مشامه_یئنه_عطر_یار_اوروجلوقدا
#مدهوش_تبریزی
#ترکی