شام غریبان
.
.
.
مرحوم نادری میانجی
.
.
گلون ای شیعه دوتاق ؛ شام غریبان بوگیجه
قوملارون اوسته یاتوب؛ شاه لب عطشان بوگیجه
.
.
رسمدور هاردا اگر بیر نفر انسانی ئولر
یغیشوب قونشولاری شام غریبانه گلر
مجلس ختم قورالار اونی آرام ایده لر
کوفۀ شامیده بو قاعده دن یوخدی سراق
بولارین عادتیدور ئولدوره لر تشنه قوناق
.
.
چون ئولن ئولدی یانان یاندی ایش اتمام اولدی
آل پیغمره منزل یانان اخیام اولدی
قره گون باتدی یازیخ زینبه آخشام اولدی
قلبیدن عشق شهیدانی اولار آتمادیلار
قورخی گورموش بالالار صبحه کیمی یاتمادیلار
.
.
تازه دن قوردی یانان خیمه لری قوم ظلم
یازماق اولمور بله ظلمی یانور الده قلم
آلدی زهرا قیزی زینب الینه قانلو عَلَم
دیدی ای علقمون اوستونده یاتان قارداش اویان
ئوزی قان ایچره یاتوب زینبی آواره قویان
.
.
راحت اول یات یورولوبسان سنه قرباندی باجون
قیزلاریم آج قوری یرده گوزی گریاندی باجون
بو یانان خیمه کنارینده نگهباندی باجون
من باتان گون دوتولان آی گوگونون اولدوزییام
قورخی بلمز باجوام حیدر صفدر قیزی یام
.
.
قولارون یوخ آتام اوغلی نیجه راحت یاتوسان ؟
بدنون یاره نیجه خاکیله خونه باتوسان ؟
مهربان قارداشیدون زینبی بیردن آتوسان
کوسمشم سندن ابوالفضل بو رنگیم سارالی
گل باجون گوگلنی آل یاتما قوم اوسته یارالی
.
.
نه اولار بو گیجه گلسون باجوی یوخلاماقا؟
گر سویون یوخدی خجیلسن بو اوشاقلاردان اخا
گل حسیندن صورا سو ویردی بیزه شمر دغا
بیرده سندن داخی سو ایستمز اطفال حسین
گل گیدک سنده گورک بیز نیجه دور حال حسین
.
.
گوردی زینب سسنه ویرمدی عباس صدا
دوندی گوداله طرف قارداشنی ایتدی ندا
یا حسین زینبوون جانی اولا کاش فدا
باجون ئولسون نیجه گور قیزلارا غمخواراولدوم
ئولمدیم قالدیم عَلَم الده علمدار اولدوم
.
.
هر طرف نعشدی میدان باخاسان گوز قارالی
یا حسین زینبی گل سالما ئوزوندن آرالی
جسمدن سن یارالی منده ئورکدن یارالی
منه خاطر بو گیجه گل بو یانان خیمده قال
قیزلارین گوگلنی آل اصغری گهواریه سال
.
.
گوردی سس یوخدی دوتوب یوز شه مردانه طرف
عرض ایدوب قالمیشام آواره ایا کان شرف
یوخدی بیر دادرسیم هارداسان ای شاه نجف
قورخولی بیر گیجه دور قالمیشام آواره بابا
یاتما آسوده گلوب دردیمه ایت چاره بابا
.
.
ناگهان گلدی بو سس گلمیشم امداده قیزیم
یاتمادوم قبرده گلدوم سنه فریاده قیزیم
منم اول کیمسه چاقوردون منی سن داده قیزیم
نیچه گوندور بالا بو دشتیده ویلاندی علی
گیت قیزیم یات بو گیجه بوردا نگهباندی علی
.
.
یری وار (( نادری)) زهراده بو گون جانه گله
شاه مردان الی قوینوندا بو میدانه گله
انبیالر یغشوب شام غریبانه گله
هر باخان چشم بصیرتله بو اوضاعی گورر
اوغلی قارداشی ئولنلر بله احوالی بیلر
.
.
#شام_غریبان #نادری
#گلون_ای_شیعه_دوتاق_شام_غریبان_بو_گیجه
#ترکی
#زبدةالاشعار
نظر دهید