زبانحال حضرت موسی بن جعفر (ع)
.
.
مرحوم شعاع تبریزی
.
.
گل آنا یا فاطمه بغداده بیر زندانه باخ
ظلمیله موسی ابن جعفر جان ویرور جانانه باخ
.
.
اون بیر ایلدی بیر قرانلوق یرده هارون دنی
بستۀ زنجیر ایدوب بیر تو به تو یرده منی
یوخ ایاقیمدن آچان جان اوستیم بو کونده نی
دوشموشم دلدن داخی عمروم گیدوب تالانه باخ
.
.
محبسیم تاریک اوزوم ناخوش وجودیم ناتوان
ظلم الیله گوشۀ زنداندا باغریم اولدی قان
قالمیشام ظالم الینده حالیمه یوخ بیر یانان
آغلارام صبح و مسا گل دیدۂ گریانه باخ
.
.
یوخ گناهیم بی گناهم سن که آگه سن آنا
نیلدیم هارونه بو ظلمی منه گوردی روا
قویدی حسرت اهلیمه ویردی منه زهر جفا
اود دوتوب اودلاندی قلبیم فکرت درمانه باخ
.
.
رخت ظلمی جسمدن سند ستمگر سویمادی
گه وروب سیلی گهی قمچی جفادن دویمادی
نحس ایاقیله ووروب سینمده طاقت قویمادی
آلدى الدن صبریمی ظالمده بیر طغیانه باخ
.
.
بیر طرفدن زهر ایدوب تأثیر آنا اکبادیمه
یوخ یتن بو گوشۀ غربتده کیمسه دادیمه
قالمیشام حسرت آنا یا فاطمه اولادیمه
روز و شب قان آغلارام یانّام غم هجرانه باخ
.
.
نه یانیمدا وار قزیم معصومه سینه داغلاسین
جان ویرن دمده منیم تا گوزلریمی باغلاسین
باش آچوب نعشیم کنارینده او محزون اوخشاسین
قالدی دلده حسرتیم بیر گردش دورانه باخ
.
.
نه گلور اوغلوم رضا آرام دل نور بصر
گوزلرم یوسف یولون یعقوب تک شام و سحر
یانمشام نار فراقه اولموشام خونین جگر
فرق یعقوب و منیله یوسف کنعانه باخ
.
.
ظلمیله اوز گلشنیمده گللریمدن اولموشام
بیر سوری چین و ختن آهولریمدن اولموشام
گلشنیمده نغمه خوان بلبلریمدن اولموشام
دوشموشم آیری بالام دان گلمیشم افغانه باخ
.
.
ایلیوب هارون بی دین باغریمی قان آغلارام
دوتموشام الفت بو زنجریله هر آن آغلارام
بو قرانلوق یرده اولّام دینه قربان آغلارام
تابعم جدّیم حسینه دینه باخ قربانه باخ
.
.
باخموری جدّیم پیمبردور بابام شیر خدا
حجّت اللهم حبیب لم یزل میرهدا
ال گوتورمور ظلمدن ایتمور خدادن بیر حیا
آرترور هر لحظه ظلمون تابع شیطانه باخ
.
.
جدّه جان چوخ اینجیدور آخر منی سند دغا
یوخ ووراندا بو غریبی بیر نفر الدن آلا
بو قوجا وقتیمده آخر من هارا سیلی هارا
ال تاپوب سند جفاجو بیر نفر نالانه باخ
.
.
یوخ دین سند جفاکاره جفادن ال گوتور
سبط پیغمبر حبیب کبریادن ال گوتور
وورما سیلی بو غریب بینوادن ال گوتور
ایتمه نیلی بو جمالی آیت سبحانه باخ
.
.
دوندروب سندابن شاهک قانه اشگی آلیمی
ایلمور بیرجه رعایت بو پریشان حالیمی
هر گلنده محبسه ظلمی پوزار احوالیمی
سوسنه بنزر وجودیم ظلم بی پایانه باخ
.
.
اولدوم آخر سنگدل صیّاده غربتده شکار
روزگاریم تک گونوم اولموش گوزیمده لیل تار
سینم اوستن گل بو زنجیری اوزون ایله کنار
بلکه جان تسلیم ایدم راحت آنا جانانه باخ
.
.
دامن باب الحوائجدن (شعاع) دوت آغلا یان
حل ایدر هر مشکلون اولسا سنون سائل اینان
اعتقادون محکم ایله عرض قیل دردون دایان
گور نجه کان سخادور جوده باخ احسانه باخ
.
.
.
نظر دهید