زبانحال حضرت صغری (س)
.
.
مرحوم نجمی تبریزی
.
.
نولوردی جده گیدن کاروان دوباره گلیدی
قرار دل بو دل زار و بیقراره گلیدی
.
.
او کاروان که گیدنده مین اشتیاقیله گیتدی
جلال و شوکت و جاهیله طمطراقیله گیتدی
حجازی ترک ایلیوب مقصد عراقیله گیتدی
گیجه نهانی گیدوب گوندوز آشکاره گلیدی
.
.
او کاروان که گیدنده دولی سپهریدی صدری
واریدی مهر درخشانی جلوه سایه لی بدری
او چرخ لایقی رخشان ستاره قدریجه قدری
او آی او گون او دولی آسمان ستاره گلیدی
.
.
اسِیدی برج مسرّتده بیرده پرچم عزّت
گوزومده جلوه نلِیدی او طمطراق او شوکت
مریضلیقیم مرض دل تاپیدی یکسره صحّت
توانیدن توکنن جانیم اختیاره گلیدی
.
.
همای اوج سعادت آچیدی پرباشیم اوسته
قانادلانیدی بو مرغ روان پربشکسته
ایچیدی شربت وصلت شفا تاپیدی بو خسته
طبیب حاذق علاج ایتماقا بو زاره گلیدی
.
.
او بیر جوان که گیدنده قرار و صبریمی آلدی
غم فراقیله مرآت قلبیمی داشا چالدی
اوزی گیدوب ولی دلده اونون گوزل آدی قالدی
فدا اولوم آدینا کاش او ماهپاره گلیدی
.
.
گلیدی اکبریم ای کاش اوزومی خاک ایلییدیم
فراق سینه سینی وصلتیله چاک ایلییدیم
ایاقینین توزونی زلفمیله پاک ایلییدیم
غبار مقدمی بو زلف مشکباره گلیدی
.
.
او سود امر که گیدنده اونی قوجاقیمه آلدیم
اوپوب یوزین بالاجا قولارینی بوینوما سالدیم
او غنچه نین غم هجرانی علت اولدی سارالدیم
گیجه گونوز بودی فکریم او شیرخواره گلیدی
.
.
گل محبتین ایمدی هامی دله ساچور اصغر
ایاق دوتوب یریرور گه دوروب گهی قاچور اصغر
فرحلنور آناسی خوردا خوردا دل آچور اصغر
بلالری او دلین بو دل فکاره گلیدی
.
.
نجه تک ایوده یتوشمز یارالی گوگلیمه مین غم
نجه سرشک بصر گوزدن آچار عارضه هر دم
آنا کیمی منه چوخ مهربانیدی خانم عمّه م
بو حالیمه منیم ایتماقلقا نظاره گلیدی
.
.
اگرچه لازم و ملزومیدی چو امر فریضه
حضور عمّه مه بو مدّتی یازیدیم عریضه
ولی نه چاره که مقدوریدی مگر بو مریضه؟
غم ومصیبتیم هاردان اولور شماره گلیدی
.
.
همیشه «نجمی» مجسّمدی فاطمه حالی
یتن دگل باشا یازماقلوقیله درد و ملالی
پوزار دل اهلین اونون غملی آتشین بو مقالی
نولوردی جدّه گیدن کاروان دوباره گلیدی
.
.
#حضرت_صغری #نجمی_تبریزی #ترکی #زبدةالاشعار
نظر دهید