زبان حال حضرت اباعبدلله الحسین(ع) در شهادت حضرت علی اصغر (ع)
.
✍️ #زبدةالاشعار ✍️
.
🆔: @nohe_torki
.
مرحوم رجایی تبریزی
.
گل اصغره باخ سسله ربابی گله زینب
آل ویر بالامون نعشنی الدن اله زینب
.
.
اولموشدی بالام سوز عطشدن ایله بی تاب
باخمادی آنا لایلاینا ایلمدی خواب
آخرده اونی ایلدی اوخ دایه سی سیراب
سو ایچماقنی ایستور آناسی بوله زینب
.
.
اوچ گوندی بالام خیمه ده قالموشدی لب عطشان
آغلوردی سیزلدیردی بشیکده سوسوزوندان
رحم ایلدی سو ویردی اونا ناوک پیکان
قانه بویادی سالدی منی مشکله زینب
.
.
اوچ شعبه لی اوخ غنچه گلی ایلدی خندان
اولدی بالامون صورتی اَلقانیله الوان
اهل حرمه آغلاماقا بسدی بو عنوان
آلتی آیلیق اوشاق سوز عطشدن اُلَه زینب
.
.
آل ویر آناسی حسرتیله اوغلونا باخسون
وار حقّی اُلونجه یوزونه اشک تر آخسون
دوتسون بالا قانین اودا بیر زلفونه یاخسون
جدّیم یانینا حشرده گلسون ایله زینب
.
.
میداندا نه بیر آغلادی نه دیندی اَلیمده
ساکت ایله دوردی که دوروب ایمدی اَلیمده
اوخ حلقنه دگدی ایله دیسگیندی اَلیمده
آچدی گوزونی ایتدی سودان بیر گله زینب
.
.
اوخ دگدی بوغاز پارچالانوب قان یِره آخدی
آچدی گوزونی حسرتیله بیر منه باخدی
باشین حرکت ویردی قانی سینمه یاخدی
آهو کیمی دوشدوم بالام الده چوله زینب
.
.
بیر ظلم ایلیوب حرمله اود ووردی جهانه
دوندردی علی قیزلارینون باغرینی قانه
ایتدی بالامی اللریم اوستونده نشانه
زلفون بویادوب اوغلومون آلقانله زینب
.
.
یاتموشدی اَلیمده بالام اوخ دگدی اویاندی
خنجر کیمی بیچدی بوغازین قانه بویاندی
گل آل بولورم ایمدی آناسی نگراندی
بنزر گلی پژمرده اولان بلبله زینب
.
.
اوخ بند قفسدن بالامی ایلدی آزاد
تسلیم قضا اولدی باخوب ایتمدی فریاد
آندوردی ولی دشمنه اولسون ایوز آباد
سس چکدی قشون آغلادی بو نیسگِله زینب
.
.
رحم ایلمدی اصغره بو فرقۀ عدوان
آغ کوینگنی قرمزی قان ایلدی الوان
آچ بند قماطین بالامون تازه ویروب جان
اتمام ایلدی حجّتنی باطله زینب
.
.
بوندان صورا عالمده ایشیق گوندوزوم اولماز
هر درده و بلا گلسه دایانّام سوزوم اولماز
امّا اوخا آلتی آیلیق اوشاقدا دوزوم اولماز
واضحدی های عالمه بو مسئله زینب
.
.
آللّهیم اوگونکه منیله باغلادی پیمان
عهد آلدی که قربانلاریمیز تشنه ویره جان
قربانلار ایچینده واریدی بو قوزی قربان
عهدیم یتیشور اصغرله کامله زینب
.
.
بو چولده بالام ایلدی اثبات حقیقت
آندوردی بو کفّاره ندور دین و شریعت
ناحق توکولن قانی اولوب گویرلره زینت
فائقدی بو قان حشره کیمی هر گُله زینب
.
.
هر یاندا «رجائی» اوتورور ایلوری صحبت
جدیّم سنه باخمور ایلمور قبرینه دعوت
بولمور اونی عالمده ویرولّر ایشه قیمت
دگمز هله بو خدمتی بیر تنبله زینب
.
.
.
#اصغریه_رجایی_تبریزی
#اصغریه_شهادت
#گل_اصغره_باخ_سسله_ربابی_گله_زینب
#ترکی
.
✍️ #زبدةالاشعار ✍️
.
🆔: @nohe_torki
نظر دهید