گل اولما رضا دیده سی خونبار اولا زینب #وداع_قدسی_قفقازی

وداع
.
.
.
مرحوم قدسی قفقازی
.
.
گل اولما رضا دیده سی خونبار اولا زینب
مظلوم حسین ، شمره گرفتار اولا زینب
.
.
بو قدر بلا داغینه یوخ تاب و توانیم
لب تشنه وئروب جانینی سردار جوانیم
پس لازمه دور حشره کیمی، روح روانیم
حسرت کش دیدار علمدار اولا زینب
.
.
دوشسه گذرون قتلگهه گان مروّت
عباسه بئله عرض ائدرم با غم و محنت
انصافیدی ای سرور دین صاحب غیرت
شام ایچره گئدوب رونق بازار اولا زینب
.
.
قارداش الیمیز یار و معیندن اوزولوبدور
خوناب بلا دیده لریندن سوزولوبدور
هر رشته ی مژگانیمه گوهر دوزولوبدور
یاقوتوه لازمدی خریدار اولا زینب
.
.
یتمیش ایکی نعش شهدا غرقیدی قانه
هر سروین ایاقینده اولوب جوی روانه
صد حیف بو گلزار بلا یتدی خزانه
لازمدی بوگون بلبل گلزار اولا زینب
.
.
چوخ داغ دگوب قلبوه آشفته دی حالون
دردیمی دئسم آرتوق اولار رنج و ملالون
میداندا اگر قانه باتا مهر جمالون
دور قمره ثابت و سیّار اولا زینب
.
.
چون برق جفادن یخیلار خاکه بو قامت
اخیامیده برپا اولی غوغای قیامت
سن ایچسن اگر سرور دین، جام شهادت
اطفالوه عالمده پرستار ، اولا زینب
.
.
پروانه کیمی آتش هجرانوه یانّام
ایّام وصالی ائلیوب فکر دایانّام
زلفیمی توکوب نعشوه القانه بویانّام
قانیله گرک عارضی گلنار، اولا زینب
.
.
بیر آه چکوب وئردی جوابین شه دوران
یاندیردی منی سوزلرون ای بیکس و نالان
گر چاره م اولا راضی دگول جانیمه جانان
چوللرده قالوب زار و دل افکار اولا زینب
.
.
لازمدی بو جان عشقیده آلقانه بویانسون
گلزار وفا خون وفائیله سولانسون
میداندا گرک شمعیمه پروانه دولانسون
اول مرکزون اطرافینه پرگار اولا زینب
.
.
ایمدی دوشه جاق خاکیله خونه تن خسته
قتلیمه هجوم آور اولار دسته به دسته
لازمدی گلوب قتلگهه نعشیمون اوسته
باشینه سالوب قاره عزادار اولا زینب
.
.
عرض ایلدی چون غارت ائدر خیمه نی لشگر
بیر قاره تاپولماز که سالام باشیمه معجر
قویماز منی افغات ائلیوم شمر بد اختر
تا نعشوون اوستونده گهربار اولا زینب
.
.
چوخ ظلم ائده جاقلار منِ مظلوم و فکاره
چوخلار ووراجاق سینمه شمشیریله یاره
اوچ گون گجه نعشیم قالی قویمازلا مزاره
«قدسی» کیمی ماتمده گرک زار اولا زینب
.
.
.
#وداع #حسینیه_وداع
#گل_اولما_رضا_دیده_سی_خونبار_اولا_زینب
#قدسی_قفقازی
#ترکی
#زبدةالاشعار