وداع
زبانحال حضرت امام حسین علیه السلام
.
.
.
مرحوم شب خیز
.
.
گل ای مرآت عفت ، آخرین دیدار دور زینب
چاتوب هجران باشا ، هنگام وصل یاردور زینب
.
.
محبتدن ائدوب دعوت حریم عشقه جانانیم
زهی اقبالیمه ،وصله مبدّل اولدی هجرانیم
بونون شکرانه سینده پیشکش عنوانینه جانیم
نثار پیشگاه حضرت دلدار دور زینب
.
.
منای جان آچوبدور بال و پر وجد و نشاطیمدن
اولوب محو انقباض دل کمال انبساطیمدن
ائدوب شوق لقا، آسوده خاطر هر بساطیمدن
بو بحث و فحص دن عمده نظر ، دیدار دور زینب
.
.
گرک باشدان گئچم کوی محبتده بو دور عهدیم
اگرچه واقفم آخر اولار اوز مقتلیم مهدیم
اولام ثابت قدم عشقیمده وار جدیت و جهدیم
که عشقین اولین شرطی نه چون ایثار دور زینب
.
.
منظم دور نظام کون و امکان انتظامیمدان
قتیل اولام ولیکن چکمرم ال اوز مرامیمدان
گرک عالمده اولسون زنده قد قامت قیامیمدان
جهاندا اهل اسلامه بو بیرهشدار دور زینب
.
.
حسین بن علی عالمده استکباه اگمز باش
گئچر باشدان ولی ارباب استعماره اگمز باش
جهاندا آز یاشار ، آزاد یاشارکفاره اگمز باش
حسینون آرامانیندا باش اگیماق عار دور زینب
.
.
گرک دنیا یوزوندن کفر و استکبار پاک اولسون
قیامیمدان بو دور فکریم که ظالم لرهلاک اولسون
منیم بو آرمانیم اهل دنیایه ملاک اولسون
که ظلمین ریشه سین کسماق گوزل افکاردور زینب
.
.
اگر توش اولسا سینه م یوخ غمیم شمشیر ظلامه
بو چولده دوزموشم علت بودور هر رنج و آلامه
که لطمه ویر ماسون بیگانه لر فرهنگ اسلامه
غرض فکریم جهاندان محو استثماردور زینب
.
.
هراسیم یوخ بو لشگردن منم شیر خدا اوغلی
جهان خصم اولسا باک ائتمز ولی کبریا اوغلی
باش اگمز قوم ظلامه علی المرتضی اوغلی
آتام مولی الموالی حیدر کرار دور زینب
.
.
بو چولده سود امردن دولت ایثاریدن گئچدیم
ابوالفضلیم کیمی صولتلی پرچمداریدن گئچدیم
جبیب بن مظاهر تک قوجا سرداریدن گئچدیم
که دین اولسون جوان ، چون دین منه معیاردور زینب
.
.
باجی سن بو بیاباندا منیم نایب منابیم سن
شیاطین زمانین رجمینه تیر شهابیم سن
علمدار قیامیم سن شریک انقلابیم سن
سبب نشر قیامه عمده پرچمدار دور زینب
.
.
منی جورو جفادن ئولدورر بو قوم سنگین دل
اولار امرین بو صحراده سنون مندن صورا مشگل
تحمل ائت اسیر ائدسه جفادن فرقه باطل
شهادتده اسارت وار بو بیر اسرار دور زینب
.
.
دایان سیل بلاده داغ کیمی بو قانلی صحراده
تحمل ائت منیم قتلیمده گلمه شیون و داده
اسیراولساندا ال چکمه حقیقتدن که ، آزاده
همیشه کفریله آماده پیکار دور زینب
.
.
اگرمن ئولمسم عدل الهی پایدار اولماز
بنای شرع پیغمبر جهاندا استوار اولماز
شریعت پایدار اولمازحقیقت آشکاراولماز
حسین ئولسون؛ دیریلسون دین حق ناچاردور زینب
.
.
سنه تاپشیردیم ای زهرایه مظهر آل اطهاری
بو سن بو اهل بیتیم ای کمند غم ، گرفتاری
اوزوندن جد و جهد ایله رضا ائت حی قهاری
پرستار اول بالام سجاده ، چون بیماردور زینب
.
.
بو چولدن کوچ ائدنده اهل بیتیم شامه کف بسته
سوار ایله اوزون محمل لره آهسته آهسته
عداوتدن عدو بولمز که بو اطفال دل خسته
علی اولادی ، آل احمد مختاردور زینب
.
.
مواظب اول اوشاقلاردان سنه هرچند زحمت دور
خصوصاً بو رقیه مندن که محتاج محبت دور
یتیمین کونلون آلماق حشرده پاداشی جنت دور
بو فیضه واقفم نایل اولان اخیار دور زینب
.
.
باجی هرچند الف قدین اولار بار محندن دال
تلاش ائت قیزلارین بیر بیر ولی بو چولده کونلون آل
جوان داغی گورنلر باشینا ظل محبت سال
یورولما ، سن منه، حقده سنه غمخوار دور زینب
.
.
اگرچه عاشق #شبخیز غرق بحر عصیاندی
ولی نادم دی اوز خبط و خطا سندان پشیماندی
الینده توشه سی آزدی، قیامتدن هراساندی
امیدی حشره مقبول اولسا بو اشعار دور زینب
.
.
دعا ایله خدا گئچسون قیامتده گناهندان
پشیمان دور نچون اعمال زشت و اشتباهندان
پناهنده اولوب درباریوه ، قوغما پناهیندان
منه خاطر که دربارین بیوک دربار دور زینب
.
.
#وداع_حسینیه_وداع
#گل_ای_مرآت_عفت_آخرین_دیدار_دور_زینب
#شبخیز #حسینیه_شبخیز
#ترکی
#زبدةالاشعار
نظر دهید