زبانحال حضرت زهرا سلام الله علیها
..
..
مرحوم کریمی مراغه ای
..
..
گل باشیم اوسته من ویرورم جان عم اوغلی جان
اشکیم آخار چو شطّۀ مرجان عم اوغلی جان
..
عمریم یتوبدی باشه تمام اولدی زحمتیم
بیر آز زمان وارام سنه مهمان عم اوغلی جان
..
اون سگّیز ایل بو دهریده عمر ایتدی فاطمه
شاد اولمادی بو عمریده بیر آن عم اوغلی جان
..
سن شاهد اول بو اوچ کیشیدن یوخ رضایتیم
چون ایلیوبله حقّیمی کتمان عم اوغلی جان
..
مندن صورا بالالاریما چوخ نوازش ایت
کلثوم و زینب ایتمسین افغان عم اوغلی جان
..
رخت و اساسیمی گوز ایویندن ایتورگلن
زینب گورنده باغری اولار قان عم اوغلی جان
..
آل عطریمی او قان توکولن آستانه دن
ایله ولیک ناله وی پنهان عم اوغلی جان
..
سن آغلاسان بالالاریم آغلار من آغلارام
روحیم اولار همیشه پریشان عم اوغلی جان
..
بو آستانه محسنمون قتلگاهدور
اولدوم او یرده قانیمه غلطان عم اوغلی جان
..
گیزلینجه غسل ویر منه گیزلینجه قیل نماز
گیزلینجه قبره قوی سنه قربان عم اوغلی جان
..
غسلیم ویرنده کوینگیمی خارج ایلمه
وار بو وصیّته نچه عنوان عم اوغلی جان
..
گون گورمه میشدی جسمیمی قوی آیدا گورمه سین
تا عفّتیمده اولمیا نقصان عم اوغلی جان
..
محجوبه لیق شرفدی سعادتدى عورته
مستوره لیقدی زینت نسوان عم اوغلی جان
..
دنیا داغیلسا مسلمه چخماز حجابدن
دانماز حجابی شخص مسلمان عم اوغلی جان
..
اما ایکمجی سرّینی کشف ایتمرم سنه
بولسن ایدر گوزون یاشی طوفان عم اوغلی جان
..
اسما جنازه مه سو توکن وقته نصف شب
گزلین سوزوم اولار سنه اعلان عم اوغلی جان
..
لیکن اوچومجی علّتنی قوی ایدوم بیان
ارزشلیدور بو پیرهن الان عم اوغلى جان
..
بو کهنه پیرهن دوتوب عطرین حسینمون
منله یاتاردی هر گجه هر آن عم اوغلی جان
..
عطر حسینی توشه آپارّام مزاریمه
قبریم اولار او عطریله رضوان عم اوغلی جان
..
امّا سنونکه بوینوا شال سالدى أهل کین
زهرا اوگوندن اولدی هراسان عم اوغلی جان
..
اوندان صورا حسینی آلاندا قوجاقمه
بیر اللی آلمشام گیدوب امکان عم اوغلی جان
..
هر دم آنا دینده حسین سن گواهسن
فوراً جوابینه دیمیشم جان عم اوغلی جان
..
اما دینده قوی قولیوی باشیم آلتنا
مین عذر گلمشم ایدوب افغان عم اوغلی جان
..
بیر اللی من قنوت دوتوردوم نمازیده
اولسون او ظالمین ایوی ویران عم اوغلی جان
..
مسمار دلدی سینمی هیچ کیمسه بولمدی
آغ سود سینمده اولدی قزل قان عم اوغلی جان
..
چوخ دلخوشام اوزوم گیدیرم بوش دگول یریم
سوندورمدی چراغیمی دوران عم اوغلی جان
..
زینب کیمی یریمده نماینده قویموشام
آموزگار مکتب قرآن عم اوغلی جان
..
من یثربین خانملارینا درس دین دیدیم
آچدیم امور دینه دبستان عم اوغلی جان
..
زینبده کوفه ده ایده جاق انقلاب دین
زینبدی مرز دینه نگهبان عم اوغلی جان
..
بیر قز بویوتموشم یخاجاق کفر پرچمین
اسلامی ایلر عالمه اعلان عم اوغلی جان
..
سولدوم گل اوزلی غنچه لریمدن دویانمادیم
دنیانی ایتدیلر منه زندان عم اوغلی جان
..
وار خواهشیم گذشت ایله زهرانی اینجیدین
ایله حلال ای شه دوران عم اوغلی جان
..
تقصیریم اولسا عفو ایله الله رضاسینه
ایتمه بو بینوانی پشیمان عم اوغلی جان
..
سو قوی حسینمون باشینون اوسته هر گجه
دوزمز بالام اگر قالا عطشان عم اوغلی جان
..
خاصه گوزوم ضیاسی حسیندن مواظب اول
مرگیمده قویما چوخ اولا گریان عم اوغلی جان
..
دیدار ، کربلایه قالور ، قتلگاهده
گللوخ بلالی زینبه مهمان عم اوغلی جان
..
آللوخ آرایه نعشنى باشسیز حسینمون
قورروخ او چولده شام غریبان عم اوغلی جان
..
مقتلده سن محاسنوی منده زولفمی
خون حسینه ایلروخ الوان عم اوغلى جان
..
بجدل کسنده بارماقنی صبر ایدنمرم
یولّام بو زلفی ایلرم افشان عم اوغلی جان
..
گل ساربان گلنده منی دوت کناره چک
تا گورمیوم او ظلمی نمایان عم اوغلی جان
..
قویما حسینمون کسیلن اللرین گوروم
چوخ سختدور منه دگول آسان عم اوغلی جان
..
زینبده وای اوغول سسیمه سس ویرر منیم
تترر او قانله دولی میدان عم اوغلی جان
..
منده بالام حسینده بو دینون فداسیوخ
اسباب فخریدور بیزه قرآن عم اوغلی جان
..
گلدسته لرده چون آتامون آدی ذکر اولار
ایلر اذان بو غملری جبران عم اوغلی جان
..
مدّاحمیزدی بوش یولا سالما «کریمینی»
مولاسی نوکره ایدر احسان عم اوغلی جان
..
گرچه یوزی قرادی گنه کاریدور ولی
سن سن جزاده شافع عصیان عم اوغلى جان
..
دوشدی نفس شماریه قورتاردی سوزلرین
بیرده باخوب عم اوغلوسونا یومدی گوزلرین
..
ترک ایلدی امیر ولایت کنارینی
درک ایلدی پیمبر رحمت جوارینی
..
..
..
#فاطمیه #کریمی_مراغه_ای #فاطمیه_شهادت #ترکی #زبدةالاشعار
نظر دهید