زبانحال حضرت زینب سلام الله علیها
بعد از شهادت حضرت زهرا (ع)
..
..
مرحوم حاج شفیع تفاخری اردبیلی
..
..
قان آغلاسا گوزلریم سزادور
حرمتلی آنام گئدیب الیمدن
بو بیر اودى سونمیین عزادور
محنتلی آنام گئدیب الیمدن
..
..
باخدیقجا اونون یاتان یئرینه
قلبیم چیخا آز قالور یئریندن
سجّاده سینه گوزوم دوشندۀ
محزونم او عملی خاطریندن
محرابیده مرگین ایستیوردی
سنگینیدی دردی بیر بیریندن
معبودى قبول ائدیب دعاسین
حشمتلی آنام گئدیب الیمدن
..
..
بحر غمه من کی ایله غرقم
باجادی گوزومده قانیاشیم وار
چوخ غصه لییم دوزنمورم من
نئیلیم هله ایندی بئش باشیم وار
گرچه حسنین بویوکدی مندن
دوزدور ایکی نازلی قارداشیم وار
بیلمورلر اولار منیم نه نوعی
زحمت لی آنام گئدیب الیمدن
..
..
اسرارینی گیزله دوردی دائم
اما گینه من چوخون بیلیردیم
بیر کیمسییه دردینی دئموردی
اصلا گینه من چوخون بیلیردیم
چوخ سرین آتام دا بیلمئیوردی
تنها گینه من چوخون بیلیردیم
من آگهیدیم جلالتیندن
شوکتلی آنام گئدیب الیمدن
..
..
دوشموشدی قوتارمیان ملاله
کاشانه نی یاندیراندا دشمن
پهلوسی قولی سیزیلدیاندا
چوخ یول گئجه لر ائدیردی شیون
حالینی بابام خبر آلاندا
سویلوردی عم اوغلی یاخچییام من
سیندیرمازدی اوزونی اصلا
غیرتلی آنام گئدیب الیمدن
..
..
قول باغلی آتام اسیر اولاندا
گوزیاشی منیم گوزومده داشدی
ثانی اونی مسجده چکنده
بیر حالدا دوروب دالیجا قاچدی
گرچه یارالیدی گوردی بیرایش
حیدر قولونون طنابین آچدی
گوردوک کى امامی گتدى سالم
همّتلی آنام گئدیب الیمدن
..
..
بعضاً کی بیر آز گلوردی حاله
اوندا بیزه ائیلیردى صحبت
قارداشلاریما نظر سالاردی
کلثومه ، منه ائدردی دقت
سویلردی یاخین زماندا ئوللم
نورس لریمه من اوللام حسرت
عیناً دیدیگی کیمی تئز اولدی
حسرتلی آنام گئدیب الیمدن
..
..
بیر گون منی ایسته دى حضوره
بیر بوقچا منه وئریب امانت
کوینک دى بویوردی یاخچی ساخلا
بو پیرهنه واروزدی حاجت
قارداشین حسین اونی گیینده
من ائیلییورم سنه وصیت
عطشان بوغازین اوپوب دییرسن
محنت لی آنام گئدیب الیمدن
..
..
بیل اوندا حسین کندور الیندن
گوز یاشووی توک عذاره آغلا
قارداشووی گور اوچولده یالقوز
بیر لشکره قیل نظاره آغلا
قول بوینونا سال بیر آز دایاندیر
ائت غم لرینی شماره آغلا
عرض ایله حسین اوزون بیلورسن
رأفت لی آنام گئدیب الیمدن
..
..
واضحدى دئسن دوباره قارداش
دوشمر گذرون سنون خیامه
صبر ایله بیر آز یواش یواش گئت
تا کی یئتیشه سوزوم تمامه
قوی بیرده آنام نیابتینه
بو بدرقیه وئریم ادامه
گئت عزّتیله خیاله سالما
عزّتلی آنام گئدیب الیمدن
..
..
بیر آزجا حسینی گوزلییرسن
اوندان صورا بال و پر آچارسان
تلّ اوسته چیخیب صدا ائدرسن
غم تیرینی قلبووه ساچارسان
ال باشدا حسین آدی دیلونده
میدانه ایاق یالین قاچارسان
اوندا دئمه سن نئدیم نه چاره
عصمتلی آنام گئدیب الیمدن
..
..
جان اوسته حسینی سن تاپاندا
منده بالامین یانیندا اوللام
قائل باشینی کسنده گوردم
بو زلفیمی باشی اوسته یوللام
من صبر ایلرم او چولده گرچه
گول تک سارالیب غمینده سوللام
دوز سنده دئنن هامی بلایه
طاقتلی آنام گئدیب الیمدن
..
..
سال یادووه سن «تفاخر» آغلا
زهرانین او غصّه لی مزارین
آغلا خانمین اوزوندن ایسته
بیرده گوره سن ، بقیع کنارین
هر شب تاپاسان او غملو یئرده
احبابیله آغلاماق بهارین
اوردا دییه سن دئیوردی زینب
شهرتلی آنام گئدیب الیمدن
..
..
..
#فاطمیه #تفاخری_اردبیلی #فاطمیه_شهادت #ترکی #زبدةالاشعار
نظر دهید